Қазақтың ұлы ақыны Абайдың 175 жылдық мерейтойына орай, 2020 жылдың 5 шілдесінде 50-ден астам елде халықаралық «Абай домбырасы-party» мәдени шарасы өтеді.
Ақордада Мемлекеттік хатшы Қырымбек Көшербаевтың төрағалығымен Абайдың 175 жылдық мерейтойын өткізу жөніндегі мемлекеттік комиссия отырысы өткен болатын. Сол жиында 2020 жылдың 8 қаңтарында елордадағы Qazaqstan орталық концерт залында хакім Абайдың 175 жылдық мерейтойының басталуына арналған салтанатты шара өтетіні белгілі болған еді. Осы шарадан кейін Абай тойы кең ауқымда әр жерде жалғасады.
«Тұңғыш Президент – Елбасы Нұрсұлтан Назарбаев жыл сайын шілденің бірінші жексенбісінде Ұлттық домбыра күнін атап өту бастамасын көтерген болатын. Осыған орай, 2020 жылдың 5 шілдесінде 50-ден астам елде халықаралық «Абай домбырасы-party» мәдени шарасы өтеді» деп хабарлады Сыртқы істер министрлігінің баспасөз қызметі. Сонымен қатар Абай атындағы Қазақ мемлекеттік академиялық опера және балет театры мен «Астана Опера» театры А.Жұбанов пен Л.Хамидидің «Абай» операсымен шетелге гастрольдерге шығады. Ал Наурыз мейрамында шетелде білім алып жатқан жастар елшіліктерде «Ұлы Абай – халық жүрегінде» атты Абай шығармашылығы негізінде диктант жазып, #МенАбайдыоқимын халықаралық челленджіне қатысады. Абай Құнанбайұлының шығармалары әлемнің 30 тіліне аударылады. Бұдан бөлек, Ресей Федерациясында қолданыс аясы кең 10 тілге Абайдың «Қара сөздері» мен өлеңдері атақты жазушылар мен аудармашылардың қатысуымен аударылып, Ресей баспаларында басып шығару жоспарланған. Елшіліктер М.Әуезовтің «Абай жолы» романын араб, түрік, грек, армян, моңғол, вьетнам тілдеріне аударуға атсалысуға дайын екенін айтқан. Кембридж университеті баспасында Британ кеңесімен бірлесіп, Абайдың өлеңдері мен қара сөздері кіретін жинақты ағылшын және қазақ тілдерінде басып шығару жоспарға алынған. Бұдан бөлек, еліміздің Сыртқы істер министрлігі Тұңғыш Президент – Елбасы кітапханасымен және Ұлттық аударма бюросымен бірлесіп, шет тілдерде жарық көрген Абай шығармаларының тұсаукесерін Германия, Бельгия, Люксембург, Қытай, Түркия, Біріккен Араб Әмірліктерінде өтетін халықаралық кітап көрмелерінде өткізбек.
Бірқатар шет мемлекеттерде пошта маркасы шығарылып, Абай орталықтары мен ескерткіш ашылады.
Әділ БЕК