«Nur Otan» партиясы Талдықорған қалалық филиалында Алматы облыстық «Jas Otan» Жастар қанатының ұйымдастыруымен «Қазақстанның 100 жаңа есімі» жобасының жеңімпаз жастарымен кездесу өтті. Олар әңгіме барысында мемлекет тарапынан көрсетіліп жатқан қолдауларды сөз етті.
Кездесуге қатысқан «Nur Otan» партиясы Алматы облыстық филиалы төрағасының бірінші орынбасары Жанболат Жөргенбаев жастар тарапынан атқарылып жатқан игі істерді назарға ұсынды.
– Белсенді жастарымыздың атқарған жұмыстары ауқымды. Мысалы, партияның «Ардагерлерді ардақтайық» жобасы аясында 152 Ұлы Отан соғысы ардагерлері мен тыл еңбеккерлеріне азық-түлік түрінде және 80 ардагерге мекенжайлық көмек көрсетілді. Түркістан облысы Мақтаарал ауданында болған төтенше жағдайға байланысты гуманитарлық көмек көрсету бойынша штаб құрылып, 15 жүк көлігі керуенімен 260 тонна азық-түлік пен құрылыс материалдары жөнелтілді, – деген Жанболат Әкебайұлы пандемия кезінде BizBirgemiz, «Бетперде тақ, жақыныңа жанашыр бол!», «Дәрігерлерге мың алғыс» акциялары аясында іске асқан шараларға кеңінен тоқталды. Сондай-ақ «Қазақстанның 100 жаңа есімі» жобасының жеңімпаздары жайлы да ерекше атап өтті.
– Жоба жеңімпаздарының атқарған жұмыстары ауқымды. Елдос Баялышбаев мүгедектерге арналған фитнес орталығын ашып, талай жанға қолдау көрсетіп отыр. Сонымен қатар Алакөл жағасында пансионат ашып, әлеуметтік кәсіпкерлік саласын жүргізуде. Тағы бір жеңімпазымыз Елдар Сапаров үкіметтік емес ұйымдармен жұмыс істеуде облыстық азаматтық альянсын қолға алып, қазіргі кезде ауқымды жұмыстарды жүзеге асыруда. Ол өңіріміздегі жас әрі белсенді депутаттардың бірі, – деді ол.
Жиында сөз алған Елдар Сапаров, Елдос Баялышбаев мемлекеттік бағдарламалар арқылы еліміздің өсіп-өркендеуіне үлес қосуға болатынын, кәсіпкерлікпен айналысуға барлық жағдай жасалғанын айтты. Баспанасыз, жұмыссыз жүрген жастардың жайын да тілге тиек етіп, олардың санын азайту жөнінде ұсыныстарын жеткізді. Кездесу соңында жастар көкейінде жүрген сұрақтарын қойып, соған сай тұшымды жауап алды.
