Кеше Мәжіліс Төрағасы Нұрлан Нығматулин Үндістан Республикасының мемлекеттік сыртқы істер министрі, парламент істері жөніндегі мемлекеттік министрі Велламвелли Муралидхаранмен кездесті.
Тараптар екіжақты соның ішінде парламентаралық қатынасты дамытудың өзекті сұрақтарын талқылады.
Н.Нығматулин Қазақстанның Тұңғыш Президенті – Елбасы Нұрсұлтан Назарбаев тәуелсіздік алған бірінші күннен бастап, Үндістанмен өзара қарым-қатынасты нығайтуға ерекше көңіл бөліп келе жатқанын, ал Мемлекет басшысы Қасым-Жомарт Тоқаев Қазақстанның мұрагерлік сыртқы саясатын қамтамасыз ететінін атап өтті.
Мәжіліс Төрағасы екі ел арасындағы қарқынды саяси диалог алдағы уақытта ортақ мүдделер жолында белсенді дами беретініне сенім білдірді.
Осы жолда парламентаралық ынтымақтастық үлкен рөл атқарады. Мәжіліс Төрағасының пікірінше, бейінді комитеттер мен достық топтар арқылы тығыз іскерлік байланыс орнатып, заң шығаруда тәжірибе алмасудың маңызы зор.
Өз кезегінде мәртебелі мейман Қазақстан мен Үндістанның ғасырлардан жалғасқан рухани үндестігі барын алға тартты. Велламвелли Муралидхаран Үндістанға бірнеше рет келіп, екі ел арасындағы мәдени тамырластықты одан әрі тереңдетумен қатар, әріптестік қатынасты күшейтуге серпін бергені үшін Қазақстанның Тұңғыш Президенті Нұрсұлтан Назарбаевқа Үндістан халқының құрметі ерекше екенін атап өтті.
Кездесуде Еуразиялық экономикалық одақ аясында ықпалдастық үлкен мүмкіндіктерге жол ашқаны сөз болып, басым бағыттар ретінде энергетика, логистика, ақпараттық технология, туризм салалары аталды.
Н.Нығматулин атап өткендей, үндістандық әріптестермен бірлескен жұмыс парламенттер арасындағы байланысты нығайтып, елдеріміздің стратегиялық ықпалдастығын жан-жақты дамытуға мүмкіндік береді.