Алматы қаласында Nur Otan партиясы жанындағы Балалар құқықтарын қорғау жөніндегі республикалық кеңестің сараптама тобының басқосуы өтті. Сараптама тобы балалардың құқықтары мен заңды мүдделерін қорғауды қамтамасыз ету жүйесін жетілдіру бойынша ұсыныстарды зерделеу және жинау мәселесін қарастырады. Бұл іс-шараны өткізудегі мақсат – Жол картасының «Бақытты отбасы» партиялық жобасымен танысу, қиын жағдайға тап болған отбасыларға көмектесу және балалық шақтың қорғалуын қамтамасыз ету құралдарын енгізу, балалардың құқықтары мен бостандықтарын қамтамасыз ететін мекемелердің қызметін өңірлік деңгейде бағалау.
16 өңірдің әкімдері балалар мен отбасыларды қорғау бойынша тәжірибелік шараларды қарастыратын Жол картасына қол қойып, оны жүзеге асыра бастады. Әрбір Жол картасында отбасылардың қаржылық жағдайын жақсарту, балалар үшін қауіпсіз орта құру, жұмыспен және қосымша біліммен қамтамасыз ету және учаскелік қызметтерді, учаскелік инспекторларды, дәрігерлер мен мектеп психологтарын мекемеаралық үйлестіру бойынша 70-тен астам шара көзделген. Олардың бәрі кәмелетке толмағандарға қатысты зорлық-зомбылықты анықтауы және алдын алуы тиіс.
«Балалардың құқықтарын қорғау жөніндегі кеңестің сараптамалық тобы бүгінгі таңда 16 өңірге барып, әрқайсында орта есеппен 11-13 аудан мен қала, шалғай ауылмен танысып, әр облыстағы ондаған әлеуметтік нысан мен балалар мекемелерінің жұмысын зерттеді. Облыс және ведомство басшыларының айтуынша, балаларды қорғау мен отбасымен жұмыс істеу саласында осындай кең ауқымды, тәуелсіз, кешенді мониторинг ұзақ уақыттан бері өткізілмеген. Балалар өмірінің барлық салаларын – отбасы, мектеп, мектепке дейінгі мекемелер, көшелер, аулаларды зерделей отырып, біз «Бақытты отбасы» Жол картасына балалардың қауіпсіздігін қамтамасыз ету үшін жүйелі шараларды ұсынамыз. Бұл балаларды қараусыз қалдыру, суицидтің және балалар қылмысына жол бермеу, сонымен қатар тиісті инфрақұрылымды қамтамасыз ету мен балаларға қауіпсіз жағдай жасау жөніндегі шаралар» деп атап өтті Nur Otan партиясы жанындағы Балалардың құқықтарын қорғау жөніндегі республикалық кеңес төрағасының орынбасары Динара Зәкиева.
Жалпы орта білім беретін мектептер, жекеменшік балабақшалар, кәмелетке толмағандар арасындағы қылмыстың алдын алу бойынша жұмыс, қала шетінде тұратын отбасылардың өмір сүру жағдайы, денсаулық ерекшеліктері бар балаларға оңалту қолжетімділігі, инклюзиямен қамту пайызы, колледждердің, кешкі мектептердің тәрбие жұмысы, мамандандырылған интернаттардың, балалар үйінің, кәмелетке толмағандарды бейімдеу орталығының, мамандандырылған мектептердің жұмысы, қосымша білім берумен қамту және қала шетінде тұратын балалардың оларға қолжетімдігі, оқушылар сарайларының жұмысы, мектептерде қосымша білім беру, аулаларды балалар ойын алаңдарымен, жарықтандырумен қамтамасыз ету, электр қалқандарын, люктерді қоршау, жолдардың қауіпсіздігі және қала балалары үшін ең қауіпсіз және қолайлы жағдайлар жасау Алматы қаласы топ сарапшыларының назарында болады.
– Бүгінде біз барлық аймақтарда болып, жағдаймен танысып шықтық. 200-ге жуық елді мекендерді араладық. Отбасын қолдау, балалар мен аналар құқын қорғау жүйесімен таныстық. 1 500-ге жуық мекеме мен отбасына барып, енді қорытынды нәтижесін шығаруға Алматыда үлкен жиын өткіздік. Бұл жиында маңызды мәселелер талқыланды. Іс-шарада отбасына көмектесу, отбасындағы зорлық-зомбылық қарым-қатынастарға жол бермеу, қосымша білім берумен қамтамасыз ету, өмір мен отбасындағы түрлі салалар, инклюзивтің қолжетімдігі, балалар құқын қорғау салалары қамтылды. Алматының өзге қалалардан ерекшелігі көп екені айтылды. Бұл қаладан өзге өңірлерге үлгі көптеген мысалдар келтіруге болады. Алматыда жеке құрылымдар жұмысы жақсы дамыған. Жекеменшік бала бақшаның өзі 700-ге жуық. «Осындай мекемелерде балалар қауіпсіздігі қалай сақталып жатқанына мониторинг жасала ма?» деген сұрақтар қойылды. Бүгінгі жиында дамуында ерекшеліктер бар балалар мен үлкендер жайы да қозғалды. Оларды сауықтыру барлық аймақта өткір мәселе болып тұр. Көші-қон мәселесі, кәмелетке толмағандар арасындағы қылмыс жағдайы да талқыланды, – дейді Динара Зәкиева. – Бүгінгі жиында байқағанымыз, әр аймақтың өзінше бірегей тәжірибелері бар. Мәселен, Павлодар облысында балалар арасында қылмысты азайту үшін тәжірибе өткізіп жатыр. Олар өз дерекқорын жасаған. Қорытынды жиында бүкіл аймақтардың жағдайы толық қамтылып, баяндалады деп ойлаймыз. Сол кезде жақсы тәжірибелерді ортаға салып, бөлісуге болады».
Nur Otan партиясы жанындағы Балалардың құқықтарын қорғау жөніндегі республикалық кеңестің жұмыс тобы бағдарлама шеңберінде Алматы қаласында 12-19 қараша аралығында жұмыс істеп, қалаға қарасты 8 ауданға барып, жағдаймен танысады.