Индустрияландыру картасы аясында жобаларды іске асыру барысы «Nur Otan» партиясының «Индустриялық-инновациялық даму бағыты» бойынша комиссия отырысында талқыланды.
Жиынға жетекшілік еткен партиялық куратор, Мәжіліс депутаты Альберт Рау бірінші кезекте индустрияландыру картасын қайта жандандырудың жаңа тәсілін атады.
– Пайыздық мөлшерлемені субсидиялау мен Индустрияландыру картасының жобаларына кепілдік беруді, индустриялық инфрақұрылым жүргізу бойынша жақсартылған шарттарды, осыған орай міндеттемелердің мониторингін қарастыру қажет. Бұдан басқа, қаржыландыруға байланысты даму институттары желісі бойынша бөлінетін қаражаттың 50 пайызын карта жобаларына бағыттап, Премьер-Министр мен өңірлердің әкімдері арасындағы меморандумның индикаторына тиісті жылға енгізілетін жобалардың санын қосу керек, – деп мәлімдеді Альберт Рау.
Еліміздің әр облысында атқарылған ауқымды жұмыстар жөнінде есеп берген Индустрия және инфрақұрылымдық даму вице-министрі Аманияз Ержанов сөз арасында 2020 жылдың негізгі жобасына тоқталды. Олар – Алматыдағы КМК Investment ЖШС металлургиялық, елордадағы ModeX Astana ЖШС көлемді-блокты үй құрылысы, Қарағанды облысындағы Qaz Carbon ЖШС ферроқорытпа зауыттары. Сонымен қатар Алматыдағы Hyundai Trans Kazakhstan жеңіл автокөліктер, Саран қаласындағы автобустар, карьерлік және жол-құрылыс техникасын шығару, Қарағанды облысындағы QazTehna ЖШС және Шығыс Қазақстан облысындағы «Үлбі-ТВС» ЖШС жылу бөлетін құрамалар өндірістері де осы жылдың негізгі жобаларының қатарына кіреді.
– Биыл 995,9 млрд теңге инвестиция көлеміндегі 18,8 мыңнан астам жұмыс орнын құру көзделген 206 жобаны іске қосу жоспарланып отыр. Олардың ішінде 77 жоба (5,8 мың жұмыс орны) ауылдық жерлерге, 15 жоба (1 мыңнан астам жұмыс орны) моноқалаларға бағытталды. Барлық мәлімделген жобалар толыққанды жүзеге асқан жағдайда өндірілетін өнімнің жалпы күтілетін көлемі – 3 млрд АҚШ долларын, оның ішінде экспортқа шығарылатыны – 800 млн АҚШ долларына жуық қаражатты құрайды, – деп атап өтті Аманияз Ержанов.
Спикердің айтуынша, қазіргі таңда жалпы сомасы 432 млрд теңгеден асатын 51 жоба пайдалануға берілген, 127 жобаны осы жылдың соңына дейін іске қосу жоспарланып отыр. Сонымен қатар 13 жобаны пайдалануға беру мерзімдерінің орындалмауы және 15 жобаны келесі жылға ауыстыру тәуекелі байқалған. Өңірлер арасында инвестиция көлемі бойынша Қарағанды (203,1 млрд теңге), Ақтөбе (138,3 млрд теңге) және Алматы (104,1 млрд теңге) облыстары көш бастап тұр. Жобалар саны бойынша – Ақтөбе (23), Шымкент қаласы (21), Ақмола және Павлодар облыстары (14) алда тұр.
Талқылау барысында Альберт Рау өңірлік партиялық кураторлар тарапынан индустриялық жобалардың іске асырылуына мониторинг жүргізу қажет екенін баса айтты.
– Индустриялық жобаларды қазіргі қалыптан тыс дағдарыс жағдайында іске асыруды жалғастыру – біздің экономикамыздың әртараптандырылуы мен орнықтылығы үшін аса маңызды. Шектеу шараларына қарамастан, жобалардың басым бөлігі іске қосылатыны қуантады, – деді партиялық куратор.
Отырыс қорытындысы бойынша комиссия Үкімет үшін бірқатар ұсыным қабылдады. Атап айтқанда, іске қосуға дайын жобалардың жұмысын жүргізу үшін шетелдік мамандар шақыру, карта жобаларын іріктеу, сапалы мониторинг жүргізу басқа да ұсыным бар. Сондай-ақ Индустрия және инфрақұрылымдық даму министрлігіне Алматы қаласында жалғанбаған болат құбырларды өндіру кезінде тек қазақстандық болатты пайдалану, Шымкент қаласының әкімдігімен бірлесіп, жыл соңына дейін металлургия зауытын іске қосуды қамтамасыз ету туралы ұсыныс әзірленді.
Энергетика министрлігі KEGOC АҚ жанындағы бірыңғай есеп айырысу-қаржы орталығымен бірге ЖЭК жөніндегі картаның іске асырылатын жобаларына шарт жасасуды қамтамасыз етеді.
А.ЖАСАН
