Пандемия кезінде тауар құнынан қымбат сатылып, тіпті дәріханаларда таптырмай қойған медициналық бетпердені атыраулық кәсіпкерлер өздері өндіре бастады. Жаңа зауыт жылына 30 млн дана медициналық бетперде шығарып, сапалы отандық өніммен өңірлер сұранысын қанағаттандырады.
ХХІ ғасырдың індеті болған пандемия әлем елдерін есеңгіретіп жіберді. Алғашқы соққысында адам шығыны көп болғаны соншалықты, адамдардың жүйкесіне әсер етті. Емдеу хаттамасы сан мәрте ауысып, халықты аман сақтап қалуға жанталас басталған кезде Қазақстанда дәрі-дәрмек пен бірреттік бетперде іздеп сабылған жұрттың жанайқайы әлем елдеріне жеткені ақиқат.
COVID-19 елге жеткенде Батыс өңірлер жаздың аптап ыстық күндерінде дәріханаларды жағалап, ұзын кезекке тұрып дәрі мен бетпердеге қолы жетпей, зар илеп қалды. Атырау өңірі «қызыл жолақта» қалып, өңірлермен байланыс үзілді. Ақиқатында дүйім ел атыраулық кәсіпкерлердің жергілікті халықты сақтау үшін жанталасып, көршілес елдерде құны шарықтап кеткен дәрілерді бірнеше есе бағамен сатып алып, облыс ауруханаларына жеткізгеніне куә болды. Тігін кәсібімен айналысатын мамандар қауіптен қорғайды деген матадан тәулік бойы бетперде тігіп, еріктілер тегін таратты.
Бүгінде өмір мен өлім арасындағы арпалыста бетпердемен де, дәрімен де өздерін қамтамасыз еткен атыраулықтар, енді медициналық бетперденің өңірде өндірілетініне қуанышты.
Атырауда медициналық бетпердені өндіруші – «Доктор Хаус» ЖШС.
Зауыт ішінде жұмысшыларға барлық жағдай жасалған. Жұмыстан шыққан соң жуынуға арналған кабиналар, киім ауыстыратын бөлме де бар. Жұмыс орнына кіреберісте жұмысшылар дезинфекциялық құрылғы дәлізінен өтіп, цехтағы өз орнына барады. Цех екі бөлікке бөлінген. Бірінші бөліктегі бөлмеде Ресейден әкелінген 4 құрылғы мен сол құрылғыда жұмыс істейтін мамандар, екінші бөлігінде бетпердені сапасына сай сараптап, арнайы қорапқа салып қаптайтын жұмысшылар отырады. Бірреттік, тоқылмаған материалдан жасалған, пайдалану уақыты 2 сағаттан аспайтын үшқабатты ересектерге арналған медициналық бетперделерді жылына 30 млн данамен шығару қуаты бар зауытта қазір 20 адам жұмыс істейді. Тапсырыс мол түскен жағдайда 4 құрылғы өз қуатына қосылады. Бұл кезде адам саны да көбейеді.
Зауыт инженері Мұхтар Махметов: «Ресейлік төрт құрылғының 3-еуі толық қуатында жұмыс істеп тұр. Сұранысқа ие тауардың сапасына аса мән беріледі. Балаларға арналған бетперде шығару жоспарда бар. Бірақ ол тұтынушылардан тапсырыстың түсіне сай жүзеге асады. Ол үшін Ресейден алынған құрылғының бірін балалардың өлшеміне сай қабаттап тігетін құрылғының бөлшектерімен алмастыру қажет. Балаларға арналған бетперде материалының өзі ересектердікінен өзгеше болатынын айтқан жөн», – дейді ол.
3 құрылғы тоқтаусыз жұмыс істеп тұрған жерде бізге бетперденің дайындалуын ыждағатпен түсіндірген цех операторы Нұролла Жантуминді сөзге тарттық.
– Әлем елдері COVID-19 індетімен күресуде. Бізге де бұл індеттің алғашқы соққысы қиын болды. Індетті жұқтырмаудың бір амалы бетперде тағу өте маңызды болып тұр. Бірақ оны дұрыс пайдаланған абзал. Екіншіден, әр адам бетперде тағу арқылы өзін ғана емес, басқаларды да қорғайтынын естен шығармауы қажет. Басшымыздың өңірде бетперде өндіру туралы шешімін халық та қуана қабылдады. Өйткені COVID-19 індеті елге келіп, жан-жақтан бетперделер әкелініп сатыла бастағанда халықта сенімсіздік болды. Ал біздің зауыттың өнімдері ресейлік сынақтан өткен құрылғылардан, арнайы материалдан дайындалатын отандық өнім. Құрылғыны басқарып отырғандар да, бетперделерді сараптап, арнайы орама жасап қаптап отырғандар да жергілікті мамандар. Сондықтан елімізге белгілі кәсіпкер Махмут Мералиев басқарып отырған «Доктор Хаус» ЖШС шығарып отырған өнімдерді сатып аларда халық еш күмәнданбаса болады, –дейді Нұролла Қылышұлы.
Зауыттан шығып, дәріханаларда сатылатын медициналық бетперделер Қазақстанда ең алдымен мемлекеттік тіркеуден өткізіледі. Тіркеуге дейін бұл бұйымдар міндетті түрде сараптамаға жіберіледі. Сараптаманы өткізудегі мақсат – оның сапасын, тиімділігі мен қауіпсіздігін тексеру. Бұл – біздің елдің заңнамалық талабы. «Доктор Хаус» ЖШС желтоқсан айында тексеруден өтіп, тауарларын сатылымға шығарады.
Үкімет тарапынан қолдау көріп, отандық өнім қатарын толықтырғалы отырған медициналық бетперде зауыты еліміздің барлық өңірінде сатылымға шығып, сұранысты толық өтеуге мүмкіндік беретіні сөзсіз.
Тұрсын ЖҰМАБЕКҚЫЗЫ,
Атырау облысы
