Бұл туралы «Nur Otan» партиясының кезектен тыс XX Съезінде мемлекет және қоғам қайраткері, саясаттанушы, праймериз жеңімпазы Берік Әбдіғалиұлы хабарлады.
– Халқымыз бүгін өте бір жауапты кезеңді бастан кешіп отыр. Әлемге жайылған пандемия, саяси қайшылықтар мен қаржылық қиындықтар белең алды. Мұның бәрі – біздің елге де әсер ететіні сөзсіз.
Осындай шақта – отыз жылдық белесті еңсерген Тәуелсіздігіміздің тұғырын нығайтып, мақсатымызды бір арнаға тоғыстыру – алдымызда тұрған ең өзекті мәселе.
Қазақ елі бүгінде – ұлт пен ұлыстың басын қосып, бір атаның баласындай татулық орнатқан шуақты шаңырақ. Бұл шаңырақтың діңгегін көтеріп, өз қолымен уығын қадаған Елбасымыздың – ерен еңбегі.
Нұрсұлтан Назарбаевтың тапсырмасына сәйкес, «Nur Otan» партиясы «қайта жандануды» қолға алып, партияның алдын-ала сайлауын өткізді.
Аудандық партия филиалының төрағасы ретінде арнайы осы праймеризге қатысып – өңірлік сайлауалды бағдарламамызды жерлестеріміздің алдында талқылап, қорғап шықтық.
Осы жолы – республика бойынша әр-бір аудан, қала, облыс партия филиалдары – әр-бір аймақтың ерекшелігін ескеретін – 216 өңірлік арнайы бағдарламасын қабылдап, ел алдында соны орындауға міндет алды.
Жаңа ғана Президентіміз Қасым-Жомарт Кемелұлы таныстырған Партияның сайлауалды бағдарламасы – осы 216 құжаттың жиынтығы деп айтуға әбден болады.
Мемлекет басшысының жақында ғана жасаған Жолдауындағы реформаларға негізделген кесек-кесек бағыттардан тұратын бұл құжат – іске асыруға ыңғайлы, барлық шығындары есептелген нақты бағдар.
Маңыздысы – қарапайым азаматтарды мемлекет деңгейдегі шешім қабылдауға және оларды жүзеге асыруға араластыру көзделген.
«Халық үніне құлақ асу» тұжырымдамасы аясында «Nur Otan»-ның «тікелей байланыстың» жаңа форматтарын енгізіп жатқаны қуантады.
Бұл, бір жағынан, қоғамның жауапкершілігін арттырса, екінші жағынан, сыбайлас жемқорлықтың алдын алуға ықпал етеді.
Ауылдың тұрғыны ретінде – мені бағдарламадағы «Ауқатты ауылдар» бөлімнің болғаны қатты қуантады. Өйткені, Ауыл – ұлтымыздың берекесі.
Ауылдың өмір сапасын жақсарту дегеніміз – ең алдымен халықтың өзі жиі көтеретін – газ, ауыз су, жол, интернет пен мобильдік телефон байланысы мәселелерін шешу.
Осының бәрімен ауылдарды жақын арада қамту – бағдарламада нақты қарастырылған.
Дәл осындай шешімдер – экономикамыздың басқа бағыттарына да арналған.
Бұларды ойдағыдай іске асыруға Президент жанындағы Жоғарғы экономикалық кеңес, жақында құрылған Стратегиялық жоспарлау және Бәсекелестік агенттіктері сияқты нақты тетіктері – үлкен сеп болады деп сенеміз.
Алты жыл бұрын Ұлытаудың төрінде берген сұхбатыңызда: «Ұлытау – келешекте туризм орталығы болып, халқымыз келіп тәу ететін қастерлі жері болып қала береді» деп атап өттіңіз.
Былтыр Ұлытауда өткен халықаралық туристік форумда Мемлекет басшысы Қасым-Жомарт Кемелұлы бірқатар тапсырма беріп, соның аясында Ұлытау өңірінде этнотуризімді дамыту жұмыстары және «Жошы хан» тарихи-мәдени кешенінің құрылысы – қарқынды жүргізілуде.
Партия бағдарламасында – алдағы жылдары Сарайшықта, Ордабасы мен Сауранда, Берел мен Шіліктіде, Бозоқта – туристер келетін арнайы визит-орталықтарын салу бар. Сайлау – елдігіміздің сынға түсер шағы.
Халқымыздың бірлігі мен ынтымағының арқасында – бұл сыннан да абыроймен өтетінімізге кәміл сенемін! – деді Берік Әбдіғали.
