«Nur Otan» партиясы Қазақстанның өсіп-өркендеуіне қызмет етіп келе жатқан бірден-бір саяси күш екенін тағы дәлелдеді. Оған Елбасы – партия Төрағасы Нұрсұлтан Назарбаевтың төрағалығымен өткен партияның кезектен тыс ХХ съезінде қабылданған бағдарлама айғақ болады. Жалпы, әлемдегі дамыған елдердің тарихына үңілсек, елді өркендетіп, өрлету жауапкершілігін нақты бір партияның өз мойнына алғанын және соны абыроймен атқарғанын байқаймыз. Осындай өркенді өзгерістерді жүргізудің, елді жаңғыртудың және жаңа дәуірге бастайтын ұлы бастамаларды табысты жүзеге асырудың тарихи миссиясын Қазақстанда «Nur Otan» атқарып келеді.
Тұңғыш Президент қашықтан режимінде өткен мерейтойлық съездегі сөзінде «Nur Otan» партиясы еліміздегі ең басты саяси күш екенін атап өтті. Ол тәуелсіздік жылдарындағы негізгі жетістіктерге тоқталды. – 30 жыл ішінде Қазақстан айтарлықтай әлеуметтік және экономикалық жетістіктерге жетті. Бұған, ең алдымен нарықтық экономикаға көшудің және елді жаңғыртуға бағытталған түбегейлі реформаларды жүзеге асырудың нәтижесінде қол жеткіздік. Нарықтық реформалар, индустрияландыру және шетелден келген инвестиция өнімділікті арттыруға қозғаушы күш болды. Сондай-ақ экономикалық өсімді қамтамасыз етіп, жаңа жұмыс орындарын ашуға және қоғамның әлеуметтік бөлінісін азайтуға мүмкіндік берді, – деді партия Төрағасы. Нұрсұлтан Назарбаев Қазақстанның азаттық жылдарында этникалық әралуандылықты артықшылыққа айналдырып, өзінің ұлттық бірегей стандартын қалыптастырғанын еске салды. Осы үдерістегі негізгі рөл Қазақстан халқы Ассамблеясына жүктелгеніне екпін түсірді. – Экономикалық өсім жоғары болған кезеңде құрылған Ұлттық қор қаржы саласындағы «қауіпсіздік қалқанымызға» айналды. Біз 1 400 жаңа аурухана мен емхана, 1 800 мектеп және 900 балабақша салу арқылы әлеуметтік инфрақұрылымды жаңарттық. «Қазақстан – 2050» стратегиясы аясында ЭЫДҰ елдерінің стандартын басшылыққа алып отырмыз, – деді Қазақстанның Тұңғыш Президенті. Ол «Nur Otan» партиясының пандемия кезіндегі жұмысына, сондай-ақ партияны қайта жаңғырту үдерісіне тоқталды. – Біздің партия – басқару ісінде тәжірибесі мол және барлық өңірде кадрлық әлеуеті зор ең ірі саяси күш. Құрамының сапасы бойынша «Nur Otan» бүкіл Қазақстан қоғамының көрінісін, кескінін көрсетеді. Сондықтан біз алдағы уақытта да мемлекетіміздің және барша жұртымыздың әл-ауқатын арттыру үшін еңбек етуге ниеттіміз! – деді Елбасы. ХХ съезге Мемлекет басшысы Қасым-Жомарт Тоқаев қатысып, делегаттар алдында сөз сөйледі. Мемлекет басшысы қазіргі ахуалға қарамастан Қазақстан өзінің стратегиялық даму мақсаттарын дәйекті түрде жүзеге асырып жатқанын айтты. Бұл ретте, Елбасы саясатының сабақтастығын қамтамасыз ету – негізгі міндеттің бірі.Биліктің үш тармағы күш жұмылдырады
Парламенттік дода барысында елге насихатталып, одан кейінгі кезеңде қарқынды іске асырылатын «Nur Otan» партиясының сайлауалды бағдарламасын жиналған қауымға Президент Қ.Тоқаев таныстыра кетті. – Партиямыздың ХХ съезі күрделі әрі маңызды кезеңде өтіп отыр. Бұл – мемлекетіміздің қоғамдық-саяси өміріндегі айтулы оқиға. «Nur Otan» партиясы ел тағдырына жауапты ең басты саяси күшке айналды! Халқымыз бізге қашанда зор сенім артады. Әсіресе, жаһандық дағдарыс кезінде ел аманатына ерекше көңіл бөлуіміз керек. Бүкіл әлемге тараған пандемия Қазақстанға да оңай тиген жоқ. Мемлекет азаматтардың денсаулығын қорғау үшін барлық қажетті шараны қабылдады. Партия халыққа ұдайы қолдау көрсетіп келеді, – деді Мемлекет басшысы. «Nur Otan» белсенділері мен еріктілері мұқтаж жандардан көмегін аяған жоқ. Осындай нақты жұмыс пен шынайы жанашырлық береке-бірлігімізді арттыра түседі. Қ.Тоқаевтың байламынша, қазіргі кезде бүкіл әлем жаһандық өзгерістер дәуіріне аяқ басуда. Халықаралық қатынастар бейберекетсіздік-хаос құрдымына тоқтаусыз құлдилап барады. Адамдар арасындағы сенім дағдарысқа ұшырады. Соңғы жүзжылдықтағы ең терең рецессия дүниежүзілік экономиканы ондаған жылға кері шегеріп тастады. Экономистердің пікірінше, өсімнің бұрынғы қарқынын қалпына келтіру және орнықты даму үшін ғана орасан зор күш-жігер мен уақыт қажет. Салдарынан көптеген ел күйреудің аз-ақ алдында тұр. – Қазақстанды берік ететін жеткілікті қорымыз бар. Бірінші кезекте, бұл дер кезінде әзірленген дамудың нақты жоспарының арқасы. Ол қаржылық ресурстармен нығайтылған. Миллиондаған саналы, жауапты азаматтарымыздың қолдауы арқасында біз ішкі саяси тұрақтылықты сақтап, отандық бизнесті қолдап, мемлекеттің барлық әлеуметтік міндеттемелерін орындай алдық. Мұнда жақынға көмек, қажыр-қайрат, жанашырлық секілді халқымыздың дәстүрлі құндылықтары шешуші рөл атқарды. Пандемия кезеңінде азаматтарымыздың жаппай жанпида еңбегіне, бір жағадан бас, бір жеңнен қол шығарған ынтымақты іс-қимылына куә болдық, тәнті болдық. «Біз біргеміз!» ұраны қазақстандық патриотизмнің формуласына айналды, – деді Қасым-Жомарт Кемелұлы. Ол билеуші партия мен оның белсенділері халықты топтастыруда баға жетпес үлес қосқанын баса айтты. – Нақты істер партиясы – «Nur Otan» пәрменді қимылдарымен өзінің көшбасшылығын және Қазақстанның болашағы үшін бүкіл жауапкершілікті әрі қарай да арқалауға дайын екенін паш етті. Дәл осындай күйзелісті шақтарда көшбасшы партияның, Үкіметтің және қоғамымыз алдынан бірегей мүмкіндіктер ашылары даусыз. Осынау тарихи мүмкіндікті пайдалану үшін біз елге дамудың жаңа парадигмасын ұсынуға тиіспіз. Бұл жерде биліктің барлық тармақтарының – Президенттің, Үкіметтің және заң шығарушы биліктің күш жұмылдырғаны аса қажет. Сондықтан алдағы сайлау бүкіл қоғамымыз үшін ерекше маңызды, – деді Мемлекет басшысы.Баршаға – лайықты өмір!
Қасым-Жомарт Тоқаев 5 институционалдық реформада және «100 нақты қадам» ұлт жоспарында Елбасы тұжырымдаған жүйелі жаңғыртуға соны серпін берілетінін мәлім етті. – Осы мақсатта біз партиямыздың 2025 жылға дейінгі «Өзгерістер жолы: Әр азаматқа – лайықты өмір!» сайлауалды бағдарламасын қабылдап отырмыз. Бұл – егжей-тегжейлі пысықталған, жіті есептелген, шынайы өмірмен біте қабысып жатқан құжат. Экономикадағы қиыншылықтарға қарамастан «Nur Otan» Үкіметпен бірге осы бағдарламаны жүзеге асыруға алдағы бесжылдықта 21 триллион теңге бағыттауды жоспарлап отыр. Бағдарлама еліміздің әлеуметтік өрлеуін және халықтың әл-ауқатын арттыруды көздейтін нақты шаралардың тиімді кешенінен тұрады. Партия халықтан келіп түскен ұсыныстар мен ескертпелерді ескерді. Демек, біздің партияның бағдарламасын бүкіл ел әзірледі десек артық айтқандық болмас! – деді ел Президенті. Көшбасшы партияның «Өзгерістер жолы: Әр азаматқа – лайықты өмір!» сайлауалды бағдарламасында негізгі төрт басымдық бар. Біріншісі – әр азаматқа өз әлеуетін жүзеге асыруы үшін тең мүмкіндік жасау. – Біз әлеуметтік-экономикалық саясатта нарық тәсілдерін басшылыққа аламыз. Қаржыны және жәрдемақыны негізсіз, оңды-солды таратуды доғару қажет. Мемлекет атаулы әлеуметтік көмекті, шын мәнінде мұқтаж адамдарға беруі керек. Ең бастысы – әлеуметтік әділдік. Сол себепті мұқтаж жандарға қамқорлық жасауға баса мән береміз. Әлеуметтік саясатты жүргізгенде қиындыққа тап болған азаматтарға атаулы көмек көрсету шаралары күшейтіледі. Алдағы 5 жыл ішінде әлеуметтік төлемдерді жыл сайын индекстеу үшін 3 триллион теңгеден астам қаражат бөлінеді, – деді Қ.Тоқаев. Ортақ зейнетақы мөлшері де жыл сайын индекстелетін болады. Бұл ретте, «Nur Otan» мұны инфляция деңгейіне 2% қосып жүзеге асыруды ұсынып отыр. Мысалы, инфляция 6 пайыз болса, 8 пайыз қосылады. Тұрақты күтімге мұқтаж және жеке көмекші қызметін пайдаланбайтын І топтағы мүмкіндігі шектеулі азаматтардың бәріне қосымша әлеуметтік қолдау көрсетіледі. Осыған орай, берілетін арнаулы жәрдемақы ең төменгі күнкөріс деңгейінің 1,4 есе мөлшеріне тең болады. Алдағы 5 жыл ішінде партия ерекше күтімді қажет ететін адамдарды арнаулы техникалық құралдармен жабдықтап шығуға ниетті. Сондай-ақ оларға толықтай оңалту-сауықтыру қызметтері ұсынылады. – Ең бастысы, әр адамға табыс табу мүмкіндігін беру керек. Бұл ретте, біз нақты шаралар қабылдаймыз. Соның нәтижесінде, 2025 жылға қарай мүмкіндігі шектеулі азаматтарды жұмыспен қамту көрсеткіші 30 пайызға жетеді. Осындай жандардың кәсіби қызметпен айналысуымен бірге, білім алуына да жағдай жасау маңызды. 5 жыл ішінде колледждер мен жоғары оқу орындары инклюзивті білім беру жүйесімен толық қамтылады. Сонымен қатар мектепке дейінгі барлық мекемелер мен мектептерде бұл көрсеткішті кезең-кезеңмен 70 пайызға дейін жеткіземіз, – деді Мемлекет басшысы.Дені сау, ақылды ұлт – Мәңгілік ел ұстыны
Екінші басымдық – саламатты, интеллектуал ұлт қалыптастыру. Осы орайда, жаһандық жаңа сын-тегеуріндерді ескере отырып, білім беруге, ғылымға, денсаулық сақтауға, мәдениетке және спортқа жұмсалар қаражат шығыны ұлғайтылады. Партия үшін бұл – адами капиталға, еліміздің болашағына салынған стратегиялық инвестиция! Атап айтқанда, денсаулық сақтау саласын қаржыландыру көлемі ЖІӨ-нің 5%-ынан асырылатын болады. Қазақстан ғасыр үдерісінде туындауы мүмкін жаңа эпидемияларға дайын болуы тиіс. Бұл ретте, Бірыңғай ұлттық жүйені құру аяқталады: ол цифрландырудан, телемедицинадан, биологиялық қауіпсіздік инфрақұрылымынан құралмақ. Нұр-Сұлтан және Алматы қалаларында 2 ғылыми-инновациялық көпбейінді клиника тұрғызылады. Аймақтағы медицинаны дамыту үшін еліміздің барлық облысында дамыған елдер деңгейіндегі 20 заманауи медициналық орталық салып, іске қосады. Аудандық ауруханалар, перзентханалар, ауылдағы емдеу мекемелерін қажетті барлық құрал-жабдықтармен жарақтандырады. Дәрігерлердің жалақысы 2023 жылға қарай 2,5 есе жоғарылайды. Басты мақсат – қазақстандықтардың орташа өмір сүру ұзақтығын 75 жасқа дейін жеткізу. Бұл – Қазақстанның жаңа тарихында бұрын-соңды болмаған жетістікке айналмақ. Осыған байланысты саламатты өмір салтын ілгерілетуге және бұқаралық спортты өркендетуге баса мән беріледі. Тек шағын және орташа қалаларда ғана емес, сондай-ақ барлық тірек ауылдарда балалар мен жасөспірімдердің спорт клубтары ашылуы қажет екені мәлімделді. Сонымен бірге жаттықтырушы-оқытушылардың жалақысын арттырған жөн делінді. Әрбір ауылдық округте спорт нұсқаушысы лауазымын енгізу мәселесі пысықталады. – Еліміз бәсекеге қабілетті болу үшін білім және мәдениет саласын өркендетуге, жастарды қолдауға баса мән беруіміз керек. Бүкіл Қазақстан бойынша 800 жаңа мектеп салынады. Соның арқасында біз апатты және үш ауысыммен оқытатын мектептердің мәселесін толық шешеміз. Барлық мектептер интернетпен, компьютермен және пәндік кабинеттермен қамтылады. Ауыл мектептерінің дамуына ерекше көңіл бөлінеді. Шағын қалалар мен аудан орталықтарында, ауылдық жерлерде орналасқан 5 мыңнан астам мектеп жаңғыртылуы керек. Педагог мамандарға сұранысты арттырып, білім сапасын жақсарту мақсатында олардың жалақысы 2 есе көбейеді, – деді Қ.Тоқаев. Жаһандық білім және инновациялық жүйеге енген заманауи зерттеу университеттері білім экономикасының негізін құрауы тиіс. Қазақстанда «Назарбаев университетінің» үлгісі бойынша тағы да кем дегенде 2 озық өңірлік жоғары оқу орны ашылады. 2025 жылға қарай жоғары білім алу үшін бөлінетін гранттың саны 50 пайызға артады. Бұл – 75 мың жас азаматымыз жоғары білімді тегін алады деген сөз! Студенттерге материалдық қолдау көрсету ісі жалғасын табады. Студенттердің стипендиясы 2 есе, магистранттар мен докторанттардың стипендиясы 1,5 есе өседі. 2025 жылға қарай колледждер мен университеттер жатақханаларындағы орындар саны кем дегенде 50 мыңға артады. «Алғашқы жұмыс орны» жобасы іске қосылады. Бұл жоба жылына 5 мың адамды қамтитын болады. Бизнес саласындағы келешегі зор идеяларды жүзеге асыру үшін жас кәсіпкерлерге жыл сайын 10 мың грант ұсынылады. Жұмыс істеп жүрген жастарға жылына 3 мың жалдамалы пәтер беріледі. «Nur Otan» жастар ұйымдары мен Еріктілер қозғалысының жобаларын қаржыландыру көлемін 1,5 есе арттыруға ықпал етпек. Осындай қолдау шаралары оқымайтын және жұмыс істемейтін жастардың санын 2025 жылға қарай 100 мың адамға азайтуға мүмкіндік береді. Сонымен қатар балаларға қосымша білім беру, бос уақытты тиімді пайдалану, шығармашылық қабілетті дамыту мәселелері шешімін табады. 3 пен 6 жас аралығындағы балалар мектепке дейінгі біліммен толық қамтылуы тиіс. Мұнда тұрғылықты жеріне қарамастан баланың бәріне бірдей көңіл бөлінеді. – Біз «Рухани жаңғыру» бағдарламасын белсенді түрде жүзеге асыра береміз. Бұл аса маңызды құжат ұрпақтың санасын серпілтіп, ұлттың жаңа болмысын қалыптастыруға арқау болады. Бұдан бөлек, мемлекеттік тілдің қолданылу аясын одан әрі кеңейтуге күш жұмылдырамыз. Ана тілімізді ардақтамасақ – елдігімізге сын! – деп нықтады Мемлекет басшысы. Кез келген шаруашылық қызметімен айналысқан жағдайда табиғатты сақтау және оны қорғау міндеті басты қағидаттың біріне айналады. Жаңа Экологиялық кодекс және «Жасыл өсім» тұжырымдамасы қабылданады. «Nur Otan» прагматизм құндылықтарын, үнемділік, қанағатшылдық және ұстамдылық мәдениетін орнықтырмақ.Партия халыққа жақын бола түседі
Үшінші басымдық – экономика мен өңірлерді орнықты дамыту. Ел Президентінің пайымдауынша, әлемдік экономика барған сайын ұзақ депрессия тұңғиығына батуда. – Қазақстан да үлкен қысымға кезікті, соған қарамастан дағдарыс жаңа экономикалық модельді құру үшін жүйелі реформалар жүргізуге мүмкіндік береді. Жаһандық экономикалық ғылымның және саналы саясаткерлердің ойлары бір жерде тоқайласады: адамзат тарихында теңдесі жоқ қазіргі жаһандық дағдарыс жағдайында экономикалық процестерді басқарудағы мемлекеттің рөлі объективті түрде артуда. Немесе солай болуы тиіс. Үкіметтің басты міндеті – азаматтар өмірінің лайықты сапасын қамтамасыз ету. Біздің Үкімет осы іргелі мұратқа жетуге ұмтылады. Оның күш-жігері біріншіден, қатаң, бірақ теңгерімді макроэкономикалық саясат, екіншіден, жеке секторды қолдау, үшіншіден, азаматтар алдындағы әлеуметтік міндеттемелерді орындау арқылы экономиканың өсіміне қол жеткізуге шоғырланатын болады, – деді Қазақстан Президенті. Мұндай стратегия бюджет шығыстарын қатаң бақылауға алуды, қайтарымы жоқ, тиімсіз жеңілдіктер мен субсидияларды жоюды, төмен инфляцияны сақтауды және теңгенің еркін айырбас бағамын сақтауды қарастырады. Алдағы 3 жыл ішінде инфляция 4%-ға дейін, тіпті одан да төменге азайтылады. Нәтижесінде, ипотека арзандайды. Белсенді индустрияландыру – өңдеу өнеркәсібі өндірісінің көлемін 1,5 есе ұлғайтуға ықпал етеді. Деректерді сақтау және өңдеу саласына салынатын инвестиция 6 есе көбейеді. Ауыл шаруашылығы өнімдерін өндірумен және өңдеумен шұғылданатын 7 ірі экожүйе түзіледі. Оған 350 мыңдай фермер мен үй шаруашылықтары тартылмақ. Бұл жаңа жұмыс орындарының құрылуына және ауылдықтардың тұрақты табыс табуына жол ашады. Жаңа суармалы жерлердің 600 мыңнан астам гектары игеріледі. 2025 жылға қарай ауыл шаруашылығының жалпы өнімінің көлемі үштен бірге, ал экспорт ауқымы 2 есе артпақ. Кәсіпкерлікті қолдау аясында бәсекелестікті дамытуға, заң үстемдігін нығайтуға, сот жүйесін жаңғыртуға ерекше назар аударылады. Бұл базалық элементтерсіз тиімді нарықтық экономика құру мүмкін емес. Қазақстан бизнес жүргізу үшін қолайлы жағдай жасалған әрі барынша дамыған елдер тобына кіруі тиіс. Өңірлердегі тұрмыс сапасын жақсарту – көшбасшы партияның басты назарында болады. Жаңа өңірлік стандарттарға сәйкес 3,5 мыңнан астам ауыл жаңғыртылады. Барлық қалалар мен ауылдар сумен қамтылады. 246 ірі елді мекенге газ тартылады. Мұндай елді мекендерде 900 мың адам тұрады. Олардың 350 мыңнан астамы – Нұр-Сұлтан, Қарағанды, Жезқазған және Теміртау қалаларының тұрғындары. 53 тазалау қондырғысын орнату және жаңғырту арқылы еліміздің барлық өңіріндегі ағын суды тазартуға мүмкіндік туады. Бұл – осы саладағы түйткілді мәселенің ұтымды шешімі болмақ. Жол құрылысы қолға алынады. Әр ауылға дейінгі барлық жолдар, яғни 27 мың шақырым жол жөндеуден өткізіледі. Облыс орталықтары мен республикалық маңызы бар қалалар жылдамдығы жоғары 5G интернетімен қамтамасыз етіледі. Сонымен қатар ауылдардың 99 пайызы осындай мүмкіндікке ие болады. Ауылдық жерлерге қажет мамандарды, дәрігерлерді, мұғалімдерді тартуға назар аударылады. Оларға үй салу үшін жылына 22 мың жер телімі бөлінеді. Облыс орталықтарында және шағын қалаларда жылына 25 мың жер телімі беріледі. Жалпы алғанда, алдағы 5 жылда шамамен 1 миллион отбасы үшін 100 миллион шаршы метрден астам тұрғын үй салынады. Соның ішінде 300 мыңға жуық пәтерді әлеуметтік тұрғын үй ретінде жеңілдікпен пайдалануға болады.Ел өмірін жақсартатын бағдарлама
Мемлекет басшысы Тәуелсіздігіміздің 30 жылдығы Мәжіліс және мәслихат депутаттарының сайлауымен басталып жатқанына, оның символдық мәні зор екеніне назар аударды. – Алдағы сайлау қоғамның біртұтастығын және береке-бірлігімізді бекемдей түседі деп сенемін. Бұл науқанның ашық, әділ әрі заңды өтуі үшін барлық жағдайды жасаймыз. Мен Мемлекет басшысы ретінде мұны жіті қадағалаймын, – деді Қасым-Жомарт Тоқаев. Өз кезегінде Нұрсұлтан Назарбаев партияның негізгі 3 қағиданы әрдайым басшылыққа алғанын және алдағы уақытта да соны ұстанатынын атап өтті. Бұл – жауапкершілік, жұдырықтай жұмылу, ортақ мұрат-мақсатқа адалдық. – Бүгін жарияланып отырған «Nur Otan» партиясының бағдарламасы – қаржылық, адами және басқа да ресурстармен қамтамасыз етілген және жан-жақты таразыланған өршіл мақсаттар мен міндеттер. Бағдарлама – қолға алған реформаларымыздың заңды жалғасы. Мен Тәуелсіздік жылдары әрқашан нақты мақсаттар белгіледім. Соларға жету үшін түрлі қиындықты жеңіп, аянбай тер төгу керек деп айтып келемін, – деді «Nur Otan» партиясының Төрағасы. Елбасы партияның реформа жүргізу тәжірибесі мол және барлық жоспарды жүзеге асыруға саяси ерік-жігері жеткілікті екенін нықтады. – Партияның жаңа бағдарламасы орындалады! Бұл құжат елді одан әрі жаңғыртуға және барша қазақстандықтың тұрмыс сапасын жақсартуға жол ашады. Сайлау науқанын ойдағыдай өткізу үшін партия республикалық және аймақтық штабтардың жұмысын үйлесімді ұйымдастыру қажет. Кандидаттар, белсенділер, сенімді өкілдер барлық аймақтарды аралап, әр сайлаушыға жетуі керек, – деді ол. Нұрсұлтан Назарбаев Республикалық сайлауалды штабтың жетекшісі болуға партия Төрағасының Бірінші орынбасары Бауыржан Байбектің кандидатурасын ұсынды. Сөз соңында партия Төрағасы елдің тәуелсіздігі мен тұтастығын сақтап, халықты Президент Қ.Тоқаевтың айналасына топтастыру және мемлекетімізді одан әрі өркендету үшін еңбек ете беретінін мәлім етті. Мемлекет және қоғам қайраткері, саясаттанушы, праймериз жеңімпазы Берік Әбдіғалиұлы партия филиалдары әрбір аудан, қала, облыстың төл ерекшелігін ескеретін 216 өңірлік арнайы бағдарлама қабылдап, ел алдында соны орындауға міндет алғанын жеткізді. «Ауылдың тұрғыны ретінде мені «Nur Otan» партиясы сайлауалды бағдарламасындағы «Ауқатты ауылдар» бөлімінің болғаны қатты қуантады. Ауылдың өмір сапасын жақсарту дегеніміз – ең алдымен халықтың өзі жиі көтеретін газ, ауызсу, жол, интернет пен ұялы телефон байланысы мәселесін шешу. Осының бәрімен ауылдарды жақын арада қамту бағдарламада нақты қарастырылған. Дәл осындай шешімдер экономикамыздың басқа бағыттарына да арналған», – деді ол. «Атамекен» ұлттық кәсіпкерлер палатасының басқарма төрағасы Абылай Мырзахметов кәсіпкерлер бар үмітін тек жалғыз партиямен – «Nur Otan»-мен ғана байланыстыратынын айтты. «Елбасы жетекшілік ететін партия бизнес пен қоғам арасындағы байланыстырушы көпірге айналды. Қазіргідей дағдарысты кезеңде бизнес өкілдеріне ең әуелі тұрақтылық пен ертеңгі күнге деген сенім қажет. Оны біздің «Nur Otan» партиясы ғана бере алады! Партияның бағдарламасында шағын несиелер көлемін ұлғайту, салықтар санын қысқарту, салық салуда цифрлы технологияларды енгізу сияқты көптеген ұсыныстар бар. Мұның бәрі елдегі шағын және орта бизнесті одан әрі дамытуға, яғни ұлттық экономиканы күшейтуге мүмкіндік берері сөзсіз. Елбасы бастаған реформалардың нәтижесінде елімізде іскерліктің өркендеуіне барлық жағдай жасалды. Біз нарықтық экономикаға көштік, отандық кәсіпкерліктің тұтас буыны қалыптасты, жаңа өндіріс орындары ашылды», – деді ол. 2016 жылы «Nur Otan» партиясы мен «Атамекен» палатасы өзара ынтымақтастық туралы меморандумға қол қойды. Ал биылғы жылы ҰКП орталық аппараты базасында бастауыш партия ұйымы құрылды. «Nur Otan» құрамына 30 мыңнан астам кәсіпкер кіреді. Сондықтан бизнестің проблемасын көшбасшы партия жақсы біледі және ұтымды шешуде. Белгілі спортшы-жеңіл атлет, волонтер, праймериз жеңімпазы Ирина Эктованың айтуынша, жастар «Nur Otan»-ға жақ. «Елбасының саясаты – жақсылық пен бейбітшілік саясаты. Мұны біз пандемия кезінде көрдік. Достарыммен бірге Biz Birgemiz акциясына қатыстым. Волонтер болып, қаламыздағы жүздеген отбасына бардық. Азық-түлік жеткізіп, ыстық тамақ тасыдық. Осындай игі істер арқылы партия адамдарға жақындай түсті. Бағдарлама жобасында спорт пен денешынықтыруға көп көңіл бөлінгені өте маңызды. Бұл – денсаулықтың негізі. «Nur Otan» келесі 5 жылда барлық жастар ел үшін қажетті мамандықтар бойынша колледждерде тегін оқи алатындай етеді! ЖОО гранттары 50%-ға артады. Стартап жобалар жүйелі қолдауға ие болады. Бағдарламада бұдан басқа көптеген игіліктер қарастырылған. Жастар шетелге кетіп жатыр деген пікір бар. Менің ойымша, бұл жерде жаман ештеңе жоқ, өйткені көптеген адамдар оқуға, жұмыс істеуге, жаңа тәжірибе жинауға барады», – деді И.Эктова. Көпбалалы ана, волонтер Әлия Әбсеметова праймериздегі өз жеңісін – партия бағдарламасында айтылған «баршаға тең мүмкіндік берудің» көрінісіне балады. Көшбасшы партия аналардың көңілінен шығып келеді. «Бағдарламада отбасылардың әл-ауқатына бірінші кезекте көңіл бөлінгені сүйсінтті. Әйелдердің өз әлеуетін жүзеге асыру – «Nur Otan»-ның сайлауалды бағдарламасының бір басымдығы! Мемлекет әйелдер үшін – көпбалалы аналар, жалғызбасты аналар, жетім балалар үшін көп қамқорлық жасауда. Бірақ енді осы жұмысты бір жерден жүргізетін кез жетті. Сарапшылар Отбасы істері және балалар мен әйелдер құқығын қорғау агенттігін құруды ұсынып, талқылауда. Осы идеяны қолдауымыз керек. Маған партиямыздың сайлауалды бағдарламасы өте ұнайды. Ол баршаға түсінікті тілмен жазылған. Келесі 5 жылға басымдықтар нақты белгіленген, атқарылатын шаралар қолмен қойылғандай көрсетілген», – деді көпбалалы ана. Айтыскер ақын Мұхтар Ниязов партияның биыл өткізген праймеризі саяси өмірге айрықша серпін бергенін, бұл шараны тіпті айтысқа ұқсатқанын да атады. «Биыл тұңғыш рет өткен партияның алдын ала сайлауы – праймеризді мен айтысқа ұқсатамын. Ел аумағында өткен айтыс-дебаттарды дүйім жұрт тамашалады. Пікірталастар ашық және әділ өтті. Белгілі айтыскер ағаларымыз – арқаның сал-серісі Аманжол Әлтаев пен айтыстың ақтаңгері Айбек Қалиев саяси додада жүзден жүйрік шығып, жеңіп шықты. «Nur Otan» осылайша тыңнан түрен салып, көзі ашық, көкірегі ояу азаматтарды қоғамдық істерге тартып, ел саясатына араласуға ұйыстырып жүр. Соңғы жарты жылда барлық аймақта партияның өңірлік бағдарламалары талқыланды, халық сүзгісінен өтті. Мен де Қызылорда қаласының және облыстың бағдарламасын дайындауға үн қостым. Бірде-бір партия дәл осындай халықтық талқылаудан өткен, әр ауыл, әр аймақтың мәселесін шешуді көздеген 216 бағдарлама жасаған емес!», – деді Мұхтар Ниязов. Съезд қорытындысы бойынша «Өзгерістер жолы: Әр азаматқа – лайықты өмір!» атты партияның сайлауалды бағдарламасы қабылданды. Сонымен қатар Парламент Мәжілісіне сайлауға қатысу үшін партияның 126 мүшесінен тұратын партиялық тізім бекітілді. Олардың ішінде 77 кандидат партияішілік праймериз қорытындысы, ал 49 адам орталық партиялық квота бойынша анықталды. Партиялық тізімге Мәжілістің іс басындағы депутаттарының тек 20%-дан азы кіре алды. Кандидаттардың жалпы тізімінде мемлекеттік басқару саласының өкілдері – 13%, білім және денсаулық сақтау саласы – 12%, үкіметтік емес ұйымдар – 9% және өнеркәсіп – 8%. Сондай-ақ экономистер – 28%, заңгерлер – 20%, кәсіпкерлер – 17%. Тізімнің үштен бірі – әйелдер. Кандидаттардың орташа жасы бұрынғы партиялық тізімдермен салыстырғанда 4 жылға төмендеп, 48 жас болды.Айхан ШӘРІП