Қасым ханға арналған монументалды ескерткіш бой көтереді. Ескерткіш Сарайшық қалашығының маңынан орын теппек. Бұл туралы Премьер-Министр Асқар Мамин Мәжіліс депутаттарына берген жауабында айтты.
Депутаттар Сарайшық қалашығына қатысты кешенді жоспар күтті. Тақырып бойынша Үкіметке сауал жолдады. Үкімет басшысы сауалға жауап беріп, республикалық бюджеттен 52,2 млн теңге қарастырылғанын айтты. Аталған қаржы «Сарайшық» мемлекеттік тарихи-мәдени мұражай-қорығы» РМҚК қызметін қамтамасыз етуге жұмсалмақ. Сарайшық қалашығын консервациялау мен қалпына келтіруді қамтамасыз ету үшін 58 млн теңге бөлінеді. Аталған қаржы 2020-2022 жылдарға арналған республикалық бюджет жобасынан қарастырылмақ. Одан бөлек музей-қорықтың қызметін қамтамасыз етуге 163,1 млн теңге жұмсалады. Сондай-ақ Мәдениет және спорт министрлігіне музей-қорықтың материалдық-техникалық базасы мәселелерін қосымша қарау тапсырылды. Олар 2020-2022 жылдарға арналған республикалық бюджетті нақтылау кезінде база мәселесін жіті қадағалайды.
Сондай-ақ Асқар Мамин Алтын Орданың 750 жылдығын республикалық деңгейде мерекелеу жоспарланғанын айтты. Осыған орай, 2020 жылға арналған мереке жобасы әзірленді. 2019 жылы 10-11 қазан күні музей-қорықта «Жошы ұлысы және Сарайшық – Қазақ мемлекеттілігінің бастауында» атты халықаралық ғылыми-тәжірибелік конференция өткен. Жиынға Түркия, Ресей, Қытай мен Германиядан келген ғалымдар қатысқан. Іс-шара барасында музей-қорықтың виртуалды нұсқасы таныстырылған.
– Келесі жылы музей-қорықта Керуен сарайдың, ортағасырлық Сарайшық қалашығы цитаделінің қақпасы қалпына келтіріледі. Сарайшық қалашығының маңында Қасым ханға монументалды ескерткіш орнату жоспарланып отыр, – дейді Үкімет басшысы.
Қазіргі таңда ғылыми-реставрациялау жұмыстарын жүргізуге ғылыми-жобалау құжаттамасы әзірленіп жатыр. Асқар Маминнің сөзінше, 2020 жылы ортағасырлық Сарайшық қалашығының қорғау аймақтарын анықтау бойынша жұмыс жүргізіледі.
Айбике ЖАНАСЫЛ