«Nur Otan» партиясының ХХ съезі жайлы ой бөліскен саясаттанушы Қазыбек Майгелдинов партия мүшелерінің барлығы сайлаушылар мен қоғам алдында жауапкершілік пен Тұңғыш Президент анықтаған стратегиялық бағыттан ауытқымаудың маңызын сезінетінін айтты. Оның ойынша, партия съезінде саяси ұйым сайлаушылардың, ұйым мүшелерінің, сарапшылар мен бәсекелестердің сансыз сауалына нақты жауап берді.
«Nur Otan» съезі – еліміздің алдында тұрған түрлі сын-қатерге қарсы партияның барлық мүшелерінің мақсат-мүддесі бір арнаға тоғысып, біріге түскенін көрсетті. Әрбір нұротандық, қатардағы партия мүшесінен бастап, Мемлекет басшысы, бизнес-құрылымдардың, министрліктер мен ведомства басшылары, депутаттарға дейін қоғам мен сайлаушылар алдындағы жауапкершілікті сезініп отыр, әрі Тұңғыш Президент – Елбасы анықтаған стратегиялық бағыттан ауытқымақ емес», – деді саясаттанушы әлеуметтік желідегі жазбасында.
Сонымен қатар Қазыбек Майгелдинов Президент Қасым-Жомарт Тоқаевтың елдегі жағдайды мұқият сараптау нәтижесінде әзірленген сайлауалды бағдарламаны таныстырғанына тоқталды. Бұл сайлауалды бағдарлама партияның «қоғамдық қабылдауларының» жұмысы нәтижесінде, жергілікті жерден жиналған 20 мыңнан астам өтінім мен тілектің негізінде әзірлегенін атап өтті. Әрі «Nur Otan»-ның соңғы бір жарым жыл ішінде Нұрсұлтан Назарбаевтың тапсырмасына сәйкес жүйелі түрде қайта жанданғанын, партиялық кадр саясатын өзгертіп, «балласттан» құтылғанын және партияішілік демократиялық сайлау – праймериз өткізгенін атап өтті.
А.СҰЛТАН
