Павлодар облысында осыдан тура 35 жыл бұрын перзентханада белгісіз себеппен екі отбасының балалары ауысып кеткен. Бұл шындықтың беті енді ғана ашылып отыр. Туған ата-анасымен қауышқан атпалдай азаматтардың оқиғасы құдды бір шытырман оқиғалы телехикаяның желісі ме дерсіз.
Павлодар облысының Железин ауданында туып-өскен Нариман мен Ержан бүгінгі күнге дейін қалыпты өмір сүріп келді. Мұндай жағдайға тап болатыны екеуінің түсіне де кіріп шықпаған. Тек айналасындағы дос-жаран, таныстарының барлығы бірауыздан «сендер ата-аналарыңа ұқсамайсыңдар дегенді жиі айтатын», – дейді жігіттер. Алайда оған ешкім аса мән бермеген. Осылай жылдар бір-біріне жалғасып өтіп жатты. Екеуі де отбасын құрып, бала-шағалы болды. Нариман туған ауылында тұрып жатыр. Ал Ержан Павлодар қаласына қоныс аударған. Екеуі бір-бірін танымаса да, жерлес болған соң бертін келе ортақ таныстары пайда болған. Міне, оқиғаның өрбуіне осы таныстарының пікірі себеп болған. Олар Нариман мен Ержанның бір-бірінің ата-аналарына қатты ұқсайтынын айтқан. Тіпті, фотоларын да көрсетіпті. Бұл жайт жігіттерді ойландырмай қоймайды. Жылдар бойы елден естіп келе жатқан күмәнді сейілту үшін Нариман облыс орталығына барып, ДНК тестін тапсырған. – Тестілеудің нәтижесі бойынша Нариман мен әкесінің ДНК көрсеткіштері 99,99 пайызға сәйкеспейтінін көрсетті. Төбемізге жай түскендей болды. Одан кейін ол тағы бір тестілеу жасатып, анасының ДНК-сымен сәйкестігін тексерді. Өкінішке қарай, оның да көрсеткіші дәл солай болып шықты. Бұл жағдай Нариман мен ата-анамызға қаншалықты ауыр соққы болғанын айтып жеткізу қиын, – дейді Нариманның жары Махаббат Хамитова. Кейін анықталғандай, Нариман мен Ержан бір күнде, 1985 жылы 8 шілдеде Железин аудандық перзентханасында дүниеге келген. Екі ұл да отбасының тұңғыштары. – Әлі күнге дейін сене алар емеспін. Теледидардан осы тектес оқиғалар туралы көптеген фильмдер, бағдарламалар көрдім. Бірақ мұндай жағдай өзімнің басымнан өтуі мүмкін екенін тіпті ойламаған да едім. Мені осы күнге дейін бағып-қаққан, өсірген әкем Өмірбай Хамитов. Бұл жағдайға қарамастан оны туған әкем деп есептеймін және қатты жақсы көремін, – дейді Нариман. Ал Ержан Әнуарбек Қуанышевтің отбасында тәрбиеленіп, өсті. Ол да тұмсықтыға шоқыттырмай, қанаттыға қақтырмай өсірген ата-анасын барлығынан артық жақсы көретінін, құрметтейтінін айтып отыр. Балалары перзентханада ауысып кеткенін білген екі отбасы жақында жүздесті. Бұл кездесудің қаншалықты жүрек елжіретер, көңіл тебірентер сәт болғаны айтпаса да түсінікті. Туыстарымен ақылдаса келе Нариман екі отбасының тағдырын түбегейлі өзгерткен қателік үшін жауапқа тартпақ ниетпен перзентхананың үстінен сотқа арыз түсірді. Ол мұндай сорақылықты кешіруге болмайды деп есептейді. Егер екі жігіттің ортақ таныстары пайда болмағанда, бұл шындық ешқашан ашылмаған күйі қалар еді. Павлодар облыстық сотының баспасөз хатшысы Жанар Жұматаева Железин аудандық перзентханасының үстінен арыз түскенін растап отыр. Істің анық-қанығы алдағы уақытта белгілі болады. Міне, 35 жылдан кейін железиндік екі азамат биологиялық ата-аналарымен жүздесті. Үлкендер болса балаларымен қауышып, туған немерелерін көріп, мәз болып қалды. Олардың өмірі енді бұрынғыдай болмасы анық. Бұдан былай Ержан мен Нариманның екі әкесі, екі анасы бар. – Әрине, мені өсірген ата-анама деген көзқарасым ешқашан өзгермейді. Олар мен үшін өмірдегі ең қымбат жандар болып қала береді. Ал биологиялық ата-аналарыммен қарым-қатынасымыздың қалай өрбитінін уақыт көрсетеді. Біз барлығымыз үлкен сынақты бастан кешірдік. Сот мәселенің анық-қанығына жетіп, тиісті құқықтық бағасын береді деп сенемін, – дейді Ержан Қуанышев.Данияр ЖҰМАДІЛ, Павлодар облысы