ХХІ ғасырдың ең үлкен дерті – жол-көлік апаты. Қазір жеңіл көліктің соқтығысуы қалыпты жағдайға айналды. Автобус та одан қалыспай тұр. Биылдың өзінде ел астанасында екі бірдей автобус апаты болды. Соның бірі – күні кеше Пушкин көшесі мен Абылай хан даңғылындағы қоғамдық көліктің трактормен қақтығысы.
Қарсы беттен келе жатқан автобус тракторға жол бермеген. Astana LRT апаттың мән-жайын түсіндіріп, қар тракторының жүргізушісі солға бұрылғанда қарсы беттегі №40 бағыттағы автобусқа соқтығысқанын айтады. Қатты соққының кесірінен GAZelle микроавтобусын жанап өткен. Автобустың алдыңғы бөлігі мен сол жақ қыры және екі жақтағы әйнек терезелері сынған.
Апат салдарынан 7 адам ауруханаға жеткізілді. Бір жұбатарлығы, зардап шеккендердің арасында балалар болмаған. №1 қалалық ауруханаға жеткізілген науқастың алтауы тексерістен кейін, тұрғылықты жері бойынша амбулаторлық емдеуге жіберілген. Ал біреуі травматология бөліміне жатқызылды. Қазір науқастың жағдайы орташа.
Дәл осындай апатты жағдай 23 қыркүйек күнінде де болған еді. Ол кезде жолаушылар таситын автобус жүк көлігімен соқтығысқан болатын. HOWO көлігін басқарған 22 жастағы жүргізуші А-187 көшесінің бойымен екінші жолмен келе жатқан. Байырқұм көшесінен Мұстафа Кемал көшесінің қиылысында, тегіс емес жолдың бойында жүргізуші көлік құралын жіберместен №64 автобуспен қақтығысқан. Апат салдарынан көлік жүргізушісі мен жолаушылар жарақат алды. 22 жолаушы қалалық ауруханаға түсіп, медициналық көмек көрсетілген.
Ал осыдан он күн бұрын №53 автобус теміржол жиегінде тепловозға соғылған. Қоғамдық көлік тепловоз келгенше, өтіп үлгермекші болған. Осы видео әлеуметтік желіде кеңінен таралды. Қуантарлығы, сол сәтте қоғамдық көлікте ешбір жолаушы болмады. «Қоғамдық көліктің жүргізушісі әкімшілік жазаға тартылады. Ол жұмыстан шеттетіліп, қайта оқуға жіберіледі» деп мәлімдеді Astana LRT басқармасының өкілі.
Бұл видеоның өзіне түрлі комментарийлер жазылып жатыр. Оның арасында «Нұр-Сұлтанда автобустың соқтығысуы челленджге айналып кеткен жоқ па?» дегендер де бар. Құдай сақтасын, бұл челленджге айналатын нәрсе емес. Адам тағдырына салғырт қарауға болмайды. Қазір Қазақстан өлім деңгейі бойынша әлемде бірінші орында тұр. Жол қозғалысы қауіпсіздігі жөніндегі жалпы қауымдастықтың бас хатшысы Алексей Алексеевтің айтуынша, Қазақстандағы жол апатына ұшырау қаупі Норвегиямен салыстырғанда 11 есе жоғары екен.
Жақында Астанада өткен Дүниежүзілік денсаулық сақтау ұйымының баяндамасында еліміз жол апаты бойынша әлемде – бірінші орында. Сонда біздің жолдарымыз жылына үш мыңнан астам адамның өмірін жалмап отыр. Оған қоса, 30 мыңнан астамы ауыр жарақат алады. 24,2 апаттық жағдайдың соңы өліммен аяқталуда. Апаттың барлығына жолдың нашарлығы себеп емес, жүргізушінің жауапсыздығы да бар. Ал көлік жүргізушісі өзінің ғана емес, өзгенің де өміріне жауапты екенін сезіне ме екен?!