Nur Otan партиясының тұрақты түрде өткізетін қоғамдық қабылдауына келетін азаматтардың қатары көп. Әсіресе, елордадағы партияның Республикалық қоғамдық қабылдау бөлмесіне еліміздің әр аймағынан әлеуметтік, тұрмыстық проблемаларын алға тартып хабарласатын тұрғындардың мәселесі тиісті органдардың қатысуымен сан мәрте талқыланып жүр. Партия мен депутаттық фракция олардың жағдайына мұқият назар аударып, түйткіл түйінін тарқату үшін тиісті шаралар жасап келеді.
Бұл жолы да Nur Otan партиясының Республикалық қоғамдық қабылдау бөлмесінде Nur Otan партиясының хатшысы Ғабидолла Оспанқұлов азаматтарды қабылдады. Кездесу барысында партия хатшысы тұрғындардың көкейінде жүрген сауалына жауап берді.
Қоғамдық қабылдаудың алғашқы қонағы Нұр-Сұлтан қаласының тұрғыны Тұрар Саттарқызы авторлық жобасы «Қара шаңырақ» тәлім-тәрбие бағдарламасына қолдау сұрап келді. Бұл бағдарлама бойынша бүгінгі күні еріктілер ретінде отбасылық құндылықтар, өскелең ұрпақты отаншылдыққа тәрбиелеу бағытында жұмыс атқарып жатқаны белгілі болды.
Тағы бір елордалық тұрғын Мұрат Қасымов Ақмола облысы Целиноград ауданындағы жұмыс орнынан Nur Otan партиясының бастауыш партия ұйымын ашқысы келетінін жеткізді. Ол сондай-ақ партия қатарына кіруге ниетті екенін танытты.
Қабылдаудың келесі қонағы Семей полигонынан зардап шеккен Болатбек Әбдікәрім өзінің III топтағы мүгедек екенін, қазіргі кезде Семей полигоны, Арал теңізі және Чернобыль апатынан зардап шеккен азаматтардың мүддесін қорғап жүргенін айтты. Ол сонымен қатар баспана мәселесін сөз етіп, қоғамдық көліктерде Семей полигонынан, Арал теңізі және Чернобыль апатынан зардап шеккен азаматтарға жеңілдік көрсетілуін сұрады.
Қарағанды қаласынан байланысқа шыққан мүмкіндігі шектеулі ұлы бар Күлбасира Мырзаханова Қазақстан азаматтарының борыш жүктемесін азайту жөніндегі тізімге қосу туралы өтінішін білдірді. Ал Қарағанды қаласындағы ХҚКО басшының орынбасары, II топ мүгедегі Бақытжан Тәшенов қызметін Нұр-Сұлтан қаласына ауыстыру мәселесі бойынша Ғабидолла Абдоллаұлының кеңесіне жүгінді. Бақытжан өз кезегінде партияның Орталық аппаратына жұмысқа ауысу мүмкіндігін қарастырып жүргенін сөз етті.
Бейнебайланыс арқылы Ақтөбе облысынан хабарласқан Айшуақ Дәрменұлы мектеп оқушылары мен студенттерге және қоғамның әлсіз топтарына көмектесу мақсатында «Логотерапия және өмірге құштарлық» деген кітап шығарғанын айта келе, еңбегін таратуға қолдау көрсетуін өтінді.
Ақтөбе қаласының тағы бір тұрғыны, «Алаш мүгедектер қоғамы бірлестігі» төрағасы Әлімбек Елеусізов мүмкіндігі шектеулі балалардың әлеуметтік жағдайын бағамдау мақсатында алдымен өңірде «Отан-Ана» автошеруін және елордада министрлік өкілдерінің қатысуымен форум өткізу туралы идеясымен бөлісті.
Қабылдауға Алматы мен Шымкент өңірінен де тұрғындар байланысқа шығып, өз ұсыныс-тілектерін білдірді.
Тұрғындардың өтініші мен құқықтары әрдайым басты назарда болатынын айтқан, олардың әр сауалдарына толықтай жауап берген Nur Otan партиясының хатшысы Ғабидолла Оспанқұлов қабылдауда айтылған барлық өтініштер партия тарапынан тұрақты қадағалауға алынатынын жеткізді.
Әбілмансұр ЖАСАН