Елордадағы «Вена орамы» тұрғын үй кешені жанындағы жаңа көшеге қазақтың аяулы ақын қызы Фариза Оңғарсынованың есімі берілді. Салтанатты ашылу рәсіміне қоғам қайраткерлері, депутаттар мен көпшілік қауым жиылды.
Нұр-Сұлтан қаласы әкімінің орынбасары Бақтияр Мәкен ашылу салтанатында: «Қазақтың ұлы ақыны, ардақты қызы Фариза апамыздың есімін қаламыздың жаңа көшелерінің біріне беріп отырмыз. Қазақтың ақын қызы Парламент қабырғасында да халықтың мұңын жоқтап, көп еңбек сіңірді. Ақын қыздың есімін көшеге беру келесі ұрпаққа да тәрбиелік маңызын береді деп ойлаймын. Апамыздың аты мәңгі өшпесін! Осы көше апамыздың есімімен даңғыл жолға айналсын» деді.
Ашылу салтанатына жиылған қоғам қайраткерлері, депутаттар Фариза Оңғарсынова туралы естеліктерімен бөлісті. «Ақынын сыйлаған елге әруақ та, Алла да риза болады. Фариза кең адам еді, мінезі қаттылау болғанымен, жан-жағына жақсылық жасап жүретін шалқар жан еді. Мына көшенің өзіндей кеңдігін көріп, қуанып отырмыз. Фариза ақиқаттың ақыны болды, шындықты айтып өтті. Шындықты айтудың өзі – ерлік. Елдің шындығын, елдің мұңын өле-өлгенше күйттеп кетті. Ал қазір Фаризаға деген халықтың шексіз махаббатын көріп жүрміз. Фариза қазақтың қызы бола отырып, ұлы да бола білген адам. Қазақ өзінің игі жақсыларына ешкімді теңгермейді. Бірақ Фаризаны Махамбетке теңеді. Мен дәл сондай ұлыларға теңеген басқа қайраткерлерді білмеймін. Фариза өз заманында Махамбеттің орнын жоқтатпаған, соны толтыруға тырысқан ұлы тұлғалардың бірі болды» деді қоғам қайраткері, жазушы Алдан Смайыл.
Фариза Оңғарсынова көшесін ақынның ұлы Алмас Оңғарсынов пен Нұр-Сұлтан қаласы әкімінің орынбасары Бақтияр Мәкен ашты. Енді елорда төрінде Оңғарсынова көшесі салтанат құрады. Көше бойымен жүріп өткен әр жолаушының жадында ақын есімі мәңгі сақталмақ.
Гүл БЕКЗАТ