Алматы қаласындағы Достық үйінде Қазақстан халқы Ассамблеясының Тұңғыш Президент – Елбасы күніне арналған «Елі сүйген, елін сүйген Елбасы» атты кездесу өтті.
ҚХА Төрағасының орынбасары – Хатшылық меңгерушісі Жансейіт Түймебаев жиынның Қазақстан халқы Ассамблеясының 25 жылдығы аясында өтіп отырғанын айтты. «Қазақстанның Тұңғыш Президент күні – барша қазақстандықтар үшін ерекше мереке. Тұңғыш Президент – Елбасы Нұрсұлтан Назарбаевтың тәуелсіз Қазақстанды құрып, дамытудағы қайраткерлік тұлғасы мен тарихи миссиясын паш етеді. Қазақстанның тәуелсіз, зайырлы 30 жылдық жаңаша тарихының әрбір кезеңінде ұлт Көшбасшысының саяси қолтаңбасы айқын көрінеді. Елбасы Қазақстан халқын бір мақсат, бір мүдде, бір болашақ жолына жұмылдырып, елімізді ұлтаралық келісім мен бірліктің мекені ретінде әлемге танытты», – деді ол. Жансейіт Қансейітұлы биылғы Ассамблеяның 25 жылдығының басты оқиғасы – Нұрсұлтан Назарбаевтың төрағалығымен 11 қарашада өткен Ассамблея кеңесіне тоқталды. «Елбасы Қазақстан халқы Ассамблеясының Төрағасы ретінде тәуелсіздіктің бүкіл кезеңіндегі бірлік пен келісім саясатын сараптап берді. Ассамблея азаматтық қоғамның әмбебап құрылымының барлық үздік сипаттамасына ие болып, достық, бейбітшілік, тыныштық пен сенім – Қазақстанның қоғамдық өмірінің ажырамас бөлігіне айналуы үшін маңызды үлес қосты. Тәуелсіздігіміздің дамуы мен ұлттың қалыптасуы жолында дәл осылар негізгі алғышарт болды» деп атап өтті. Отбасының амандығы, бірлік, қонақжайлық және еңбексүйгіштік, ынтымақ пен құрмет, бір-бірімізді қолдауға және өзара көмекке дайын болу сияқты Қазақстан халқының ортақ құндылықтарына тоқталды. «Қоғамдық келісім мен бірліктің қазақстандық үлгісін одан әрі жетілдірудің стратегиялық бағыттарын белгіледі. Тұңғыш Президент Отанға деген сүйіспеншілігімізді үнемі қастерлеп отыру, оның тарихи тағдыры үшін ортақ жауапкершілігімізді нығайту қажеттігін тапсырды», – деді ол. Жиынға Елбасының жанында жүріп, саяси мектебінен өткен, өмірлік тәжірибесінен сабақ алған, сұхбат құрған азаматтар қатысты. Атап айтсақ, олар: Президент Архиві жанындағы Қоғамдық кеңес төрағасы, көптеген ғылыми еңбектердің авторы Борис Жапаров; ҚХА кеңесінің мүшесі, Қазақстанның Тұңғыш Президентінің 2001-2004 жылғы баспасөз хатшысы Жанай Омаров, «Алматы ақшамы» газетінің бас редакторы, Президент сыйлығының иегері Қали Сәрсенбай, «Уйғур авази» республикалық қоғамдық-саяси газетінің бас редакторы, «Қазақстан ұйғырлары республикалық этномәдени орталығы» қоғамдық бірлестігінің мүшесі Ершат Асметов. Жиналғандар қоғам өмірінде, жастар арасында Тұңғыш Президенттің мемлекет қалыптастырудағы тарихи рөлін айшықтау мақсатында Елбасымен кездескен жылы естеліктерімен бөлісті. Тұңғыш Президент күніне арналған дөңгелек үстелден кейін қатысушылар «Нұрсұлтан Назарбаев: әлемдік ауқымдағы саясаткер» атты халықаралық онлайн конференцияға қосылды.Гүлнар ЖҰМАБАЙҚЫЗЫ