Заңнамалық жаңа түзетулерге сәйкес, «темір тұлпарлы» азаматтарға жүргізуші куәлігін үнемі өзімен бірге алып жүру қажет болмай қалады. Мәжіліс Спикері Нұрлан Нығматулиннің төрағалығымен өткен палатаның жалпы отырысында депутаттар «Кейбір заңнамалық актілерге жол жүрісі мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.
Құжат Мемлекет басшысының Ұлттық қоғамдық сенім кеңесінің ІІ отырысында берген тапсырмасын жүзеге асыруға бағытталған. Президент қолында жүргізуші куәлігі және көлік құралының тіркеу құжаттары болмағаны үшін ғана жүргізушілерге әкімшілік айыппұл салуды доғару керегін айтқан. Өйткені бұл құжаттар ішкі істер органдарының деректер базасында онсыз да бар. Демек, жеке құжатын көрсетсе, соны базамен салыстыру арқылы полицей рөлде көлік иесі не ұрлықшы отырғанын, басқа да жайттарын анықтай алады. – Цифрландыру дәуірінде, қажетті ақпараттық инфрақұрылым, сондай-ақ тиісті деректер базасы болса, онда жүргізушілерден өзімен бірге үнемі жүргізуші куәлігін және техпаспортты алып жүруін талап ету – сорақылық, өткен ғасырдың қалдығы. Көркем тілмен түйсек, бүкіл әлем «цифрлы автобанмен» жүйткіп жүргенде жол шетінде шаң жұтып тұра беруге болмайды. Сондықтан ел Президенті Қасым-Жомарт Тоқаев осы мәселенің байыбына баруды және заңнамаға тиісті өзгерістер енгізуді тапсырды. Депутаттар әзірлеген заң жобасы Мемлекет басшысының аталған тапсырмасының заң жүзінде орындалуын қамтамасыз етеді, – деді Нұрлан Зайроллаұлы. Енді жүргізушіге және көлігіне қатысты барлық ақпаратты полиция қызметкерлері оның жеке куәлігі негізінде деректер базасынан өз бетінше табуы тиіс. Егер тиісті құрал-жабдығы болмаса, бұл – жүргізушінің емес, ІІМ-нің проблемасы. Дегенмен мұндай жеңілдік тек Қазақстан азаматтарына ғана беріледі. Шетелдіктер, соның ішінде Ресей азаматтығын алғанымен, елде қалған «экс-отандастар» сол бұрынғыдай жүргізуші куәлігі мен техникалық паспортын ала жүруі міндет. Н.Нығматулин заң жобасын жеделдетіп қабылдау қажетін атап өтті. Оның байламынша, бұл заң жобасы полиция қызметкерлерінің өздеріне де керек. – Қазіргі коронавирус пандемиясы жағдайында қол жанаспай өзара әрекеттесуге деген сұраныс күшейді. Сол себепті банктер, ХҚКО-лар, тұтастай алғанда, қызмет көрсету салалары қызмет көрсетудің цифрлы тәсілдеріне белсенді көшіп жатыр. Бұл адам денсаулығын қорғау үшін маңызды. Ендеше жол полицейлерінің де жүргізушілермен байланысын мейлінше азайтқан жөн, – деп түйді Мәжіліс Төрағасы. Жүргізушілерге қарастырылған осындай әкімшілік жаза түрін жою үшін Әкімшілік құқықбұзушылық кодексіне өзгеріс енгізіледі. Сонымен қатар заң жобасында автобустарды пайдалану мерзімін он жылмен шектеу енгізілмек. Яғни, он жылдан асқан автобустарды бастапқы тіркеуге тыйым салынады. Бұл жол қозғалысы қауіпсіздігін күшейту үшін қажет көрінеді. Жеке көлікке қарағанда қоғамдық көлік әлдеқайда көп адамды таситыны мәлім.Айхан ШӘРІП