Жапония әуежайын қазақша сөйлетіп, «Ұмытылмас күнді» шырқатқан Димаш бүгін ABU TV SONG FESTIVAL шоуына қатысады. Әр елден келген таңдаулы әншілер бас қосқан фестивальде Құдайбергеновпен қатар авcтралиялық Дан Сұлтан, түріктің Мұстафа Сандалы бар. Cондай-ақ үнді елінің мақтанышы Алла Ракха Рахман мен оңтүстіккореялық Twice де өнер көрсетеді.
«Жапония сияқты бай тарихы бар елде қонақ болғаныма қуаныштымын». Әнші instagram парақшасында осылай деп жазды. Димаш Құдайбергеновті жанкүйерлері әуежайдан ерекше атмосферамен қарсы алды. Көк түсті кеудеше киген Diers (фанклубтың атауы-ред) «Ұмытылмас күнді» қазақша шырқағанда әнші таңданысын жасырмады.
Күн мен қыран бейнеленген көк туды ұстаған жапонды көрдіңіз бе? Жапония Құдайбергеновке осындай ерекше құрмет көрсетті. Осыдан-ақ «спорт пен мәдениет әлемді жақындастырады» деген сөз еске түседі. Жанкүйерлеріне тәнті болған әнші бәріне қолтаңба үлестіріп, суретке түсуге тырысты.
Артынша ол фестиваль алдында NHK каналына сұхбат берді. Жапон телеарнасына берген сұхбатында қазақша сөйледі. Әрине, әдептен озбайтын Димаш бағдарлама барысында осы күнге жетуіне еңбегі сіңген барлық жанға алғыс айтумен болды. Өзінің шығармашылық жолын айта келе, білім берген, қолдау көрсеткен ұстаздарына алғыс білдірді.
Димаш: «Қазақстанда туып-өскенімді мақтан тұтамын. Жердің қай бұрышында жүрсем де, халық шығармашылығын бойыма сіңіргенімді мақтан тұтамын. Отанымның рухын сезініп өскен ұлмын» деді.
Жапон журналистері қазақтың ұлттық аспабы домбыраға қызығатындарын жеткізді. Өйткені Димаш жиі домбырамен өнер көрсетеді. Әрі домбыраны сөйлете біледі. Ұлттық аспаптың күші мен жігерін танытып, өзін сенімді сезінеді. Домбырада ойнағанда ұлтын әлемге танытатынын, кей елге беймәлім Қазақстанды ашатынын ұғады. Сондықтан да ол сұхбатында «Домбыра – қазақтың жаны» деді.
Сұхбатта ол қазақ тілінде сөйлеп, тілшілермен аудармашының көмегімен тілдесті. Тележүргізушілер де өз таңданысын жасырмады. Қазақ тілінің дыбысталуына таңғалып, Димаш үнінің сиқырына елітті. Сондай-ақ әнші жапон жұртын фестивальге шақырды. «Домбыраның құдіретін көрсетіп, әніммен бірге ерекше күйге бөлеймін» деді. Димаш ABU TV SONG FESTIVAL ән фестивалінде басқа да танымал әншілермен бірге өнер көрсетеді.
«Тыңдалмаған сөз жетім». Абайдың осы сөзін әнмен алмастырсақ, Димаш орындайтын қазақтың әні қандай бақытты?! Әлем қосыла шырқап, шамасы жеткенше жаттап жүр. Осыны білген әнші жеңіл әнді емес, салмақтысын таңдайды. Қытай елі «Дайдидауды», Жапония «Ұмытылмас күнді» үйренді. Ендігі кезек америкалықтарда ма? Құрама штат тұрғындарынан «Самалтауды» есітуге дайынбыз ба? Өйткені Димаш Нью-Йоркте Arnau шоуын ұйымдастырады. Dears-тың ерекше фанклуб екенін білеміз. Ендеше, бұл әншісін таңдандырамын деген америкалық Dears-тарға берілген мүмкіндік.
Айбике ЖАНАСЫЛ