Атырауда қазақтың көрнекті жазушы-драматургі, ҚР еңбек сіңірген қайраткері, республикалық «Махамбет» атындағы, Халықаралық Шыңғыс Айтматов атындағы сыйлықтардың лауреаты Рахымжан Отарбаевтың құрметіне арналған ІІІ республикалық театр фестивалі өтуде.
Қасиет дарыған аймақта «Айналайын, Атырау! Сен жаман балаңды тербеткен алтын бесіксің ғой, елдігіңнен де, ерлігіңнен де айырылмашы...» деп қалам қуатымен әлем әдебиетіне қара сөздің құдіретімен еніп, тамсандырған Рахымжан Отарбаевтың ІІІ республикалық театр фестивалі шымылдығын ашты.
Театр фестивалінің ашылу салтанаты аясында баспасөз мәслихаты өтіп, қаламгердің баспадан жаңа шыққан кітаптарының тұсаукесері өтті. Жиынға КСРО халық артисі, Еңбек Ері Асанәлі Әшімов бастаған театр майталмандары, қоғам қайраткерлері мен Рахымжан Отарбаевтың отбасы қатысты.
Жеке кітап болып «Қазына» баспасынан жарық көрген «Бас» романының тұсаукесер лентасын КСРО Халық артисі Асанәлі Әшімов және аталған баспа үйінің иесі Алмас Шәйкенов пен жазушының ұлы Ермерей Отарбаев қиды.
Ал Мәскеуде басылып шыққан қос кітап – «И был я подобием твоим…» және «Плач Чингисхана» кітаптарының тұсаукесер рәсімін Мәскеу қазақтар қоғамының төрағасы, «Художественная литература» баспасы директорының орынбасары Ермек Алданов пен жазушының қызы, республикалық Шабыт фестивалінің жүлдегері, алғашқы төлтуындысы Ресейде жарық көріп оқырманына танылған Қаракөз Отарбаева жасап, жұртшылық тарапынан қошемет көрсетілді.
Осы шара аясында қарымды қаламгердің мәңгілік өмірі басталғаннан кейін құрылған «Рахымжан Отарбаевтың руханият қорының» да тұсауы кесіліп, қордың мақсаттары айтылып, жұртшылық қор жұмысының сүбелі болуына тілектестік білдірді.
Көрнекті жазушы-драматург Рахымжан Отарбаевтың отты қаламынан шыққан шығармаларының тұсаукесер шарасында қаламгердің үзеңгілес әріптестері, сыйлас ағалары, достары жасындай жарқырап өткен Махамбет рухтас қаламгердің адами болмысы мен шығармашылық ерекшеліктері туралы естеліктерін айтты.
Ол – Қазақстанды ғана емес, алыс-жақын шет мемлекеттерді мойындатқан санаулы суреткердің бірі. Бүгін оның рухына ас берілді, енді міне жалғасы үлкен шараға ұласып жатыр. Ұмытпай, елеп-ескерген үлкен-кішіге алғысым шексіз.
Жазушының жан жары, қаламгердің шығармаларын оқырманына шашаусыз жеткізуге жұмыс істеп, аманат арқалап жүрген Сәуле Отарбаева республикалық деңгейде аталып өтетін айтулы шараны өткізуге қолдау көрсеткен аймақ басшысы Нұрлан Ноғаевқа, қаламгердің шығармаларын жоғары деңгейде сахналап, көрермен ықыласына бөлеп жүрген Махамбет атындағы академиялық қазақ драма театры ұжымына алғыс айтты.
Рахымжан Отарбаев атындағы ІІІ республикалық театр фестивалі салтанатты түрде ашылды.
Фестивалдің ашылу салтанатының шымылдығын ашқан Атырау облысының әкімі Нұрлан Ноғаев: «Рахымжан Қасымғалиұлы – проза мен драматургияда орнын тапқан адам. Әлеуметтік проблемаларға ешқашан бейжай қарамай, ұлтжанды азамат болған ол – тек біздің өңіріміздің емес, бүкіл қазақтың мақтанышы. Рахымжан Отарбаев –Әбіш Кекілбаевтың, Әбу Сәрсенбаевтың, Хамит Ерғалиевтің, Фариза Оңғарсынованың асыл қазынасының мұрагері. Ұлттық мәдениетіміз пен өнеріміздің дамуына өлшеусіз үлес қосқан оның талантын басқа жұрт та танып, шығармалары бірнеше әлем тіліне аударылды. Уақыт бөліп, фестивальге арнайы келіп қатысып отырған Рахымжан ағамыздың ағайындарына, дос-жолдастарына ризашылығымды білдіремін. Осы фестивальге келген театр ұжымдарына, басшыларына алғысымды айтамын. Сіздердің өнерлеріңіз арқылы көрермен Рахымжан ағамыздың шығармаларын жан-жақты түйсініп, сан қырына қанығып шығармаларды жүректерінен өткізеді», – деді.
Қазақстанның Еңбек Ері, фестивальдің төрағасы Асанәлі Әшімов Рахымжан Отарбаевтың мәдениет саласындағы, соның ішінде, театр өнеріндегі еңбегін атап өтіп, драматургтің адами, азаматтық қасиеттерін сипаттады.
Рахымжан Отарбаевтың ұлы Ермерей Рахымжанұлы фестиваль қонақтары мен атыраулықтардың ыстық ықыласына ризашылығын білдірді.
– Осы шара басталғалы халықтың отансүйгіш қасиетін, әкеме, оның шығармашылығына деген құрмет сезімін байқап отырмыз. Сондай-ақ осы фестивальге келген барлық артиске әкеме деген сый-құрметтеріңіз үшін алғысымды айтамын, – деді қаламгердің ұлы Ермерей.
Бес күн бойы Атыраудың тұрғындары еліміздің тоғыз театр ұжымының өнерін тамашалай алады. Олардың өнерін сараптаушы қазылар алқасының төрағасы – КСРО халық артисі Асанәлі Әшімов, театр саңлақтары Есмұхан Обаев және Сердеш Қажымұратұлы, Талғат Теменов, театртанушы,сыншы, қаламгер Ұларбек Нұрғалымұлы, Айзат Қыдыралиева мен Қаракөз Рахымжанқызы сияқты қазылар құрамы бағалайтын болады.
Фестивальдің шымылдығын Қалибек Қуанышбаев атындағы Мемлекеттік академиялық музыкалық-драма театры «Әміре» драмасымен ашты.
Бір апта бойы Атырау халқы мен қала қонақтары қарымды қаламгер Рахымжан Отарбаевтың шығармаларымен сусындап, қара сөздің құнарына қанығатын болды. Бұл қалам ұстаған қаламгер үшін де, қаламгерді құрметтеген оқырман үшін де, таптырмас байлық, рухани азық екені сөзсіз.
Атырау облысы