Бұл туралы Еуразия бірінші арнасы хабарлайды.
40 күн дағдарыс орталығын паналап жүрген қызылордалық 6 баласы бар әйел араша сұрады. Отбасындағы ұрыс телефоннан басталған.
Қиналып, қорғансыздың күнін кешкен келіншектің есімі – Ләззат Әбенова. Мұндай жайт елімізде жүздеп, бәлки мыңдап саналады.
Көпбалалы ана Ләззат Әбенова: «Бізде күнде қырғын, күнде айқай-шу! Оң қолым да сынды, аяғым да сынды. Соңғы рет басымды жарды. Даудың басы бұ жолы телефоннан басталды. Қызға телефон алып берейік дедім, сабақ онлайн болды ғой, содан басталды ғой қырғын. Енеміз алмайсыңдар дейді, біз аламыз дейміз. Сонымен қырғынның аяғы шығыңдар үйден деді ғой. Шыдамның шегіне жетті», – дейді.
Ал Ләззат Әбенованың баласы Нұрислам: «Біздің мамамызды күнде ұрады. Самокатпен ұрады ішіп келіп, күнде айқайлап төбелеседі. Ішіп келіп ұрады бәрімізді. Мамамызды талай ұрды», – дейді.
Ал бұл жайтқа қатысты «Келін емес күң болдым, не істесем де жақпадым» деген Ләззаттың сөзін қайынжұрты жоққа шығарды. Кетіп қалу – келіннің әдеті дейді.
Ләззаттың қайынбикесі Айша: «Бұл Ләззат деген әйел 5 жыл бұрын да осылай сотқа беріп күйеуін сөйтіп ажырасып кеткен болатын. Сөйтіп, 6 ай жүріп, сотқа беріп алиментін төлеп тұрған менің інім. Сөйтіп, 6 ай жүрді де үйге келіп кірген-тұғын. Қаңғырып келді де өзі үйге кірді. Ешкім қол көтерген жоқ. Ешкім қатты сөйлеген де жоқ. Нұрисламды қорқытып қойған олар», – деген уәжін айтады.
Бұл жайтқа қатысты психолог Серікгүл Сали: «Бала дұрыс өсуі үшін ол балада бір ғана орта болуы керек. Ол бала қорғаныста, қауіпсіз ортада болуы керек», – дейді.
