Орталық сайлау комиссиясы 7 желтоқсанда өткен отырысында «Қазақстан халық партиясының» партиялық тізімін тіркеп, Парламент Мәжілісі мен жергілікті мәслихаттар сайлауы барысын байқауға келген шетелдік байқаушыларды аккредитациядан өткізді.
ОСК отырысына саяси партиялардың, Бас прокуратураның, Әділет, Ішкі істер және Қаржы министрліктерінің өкілдері, бейнеконференцбайланыс режимінде аумақтық сайлау комиссиялары, онлайн режимінде бұқаралық ақпарат құралдарының өкілдері қатысты. Жиында қаралған алғашқы мәселе бойынша баяндама жасаған Ортсайлауком мүшесі Асылбек Смағұлов ОСК-ға 20 қарашада «Қазақстан Халық партиясының» Парламент Мәжілісі депутаттарын сайлауға кандидаттар ұсыну туралы құжат тапсырғанын, партиялық тізімде 114 адам болғанын айтты. Сонымен қатар тізімге аты енгізілген Г.Қайыржановтың өз кандидатурасын партиялық тізімнен қайтарып алу туралы өтініш жазғанын да атап өтті. Осыған байланысты «халықшылдар» тізіміндегі кандидаттар саны кеміп, 113 адамдық тізім бекітілді.
Ал шетелдік байқаушыларды аккредитациядан өткізу мәселесі жайлы баяндаған Ортсайлауком мүшесі Анастасия Щегорцова 2020 жылғы 22 қазанда сайлауды халықаралық бақылау институты ашылған сәттен бастап Орталық сайлау комиссиясының 2 отырысы өткізіліп, 39 байқаушы аккредитациядан өткенін хабарлады. Оның ішінде ТМД Парламентаралық Ассамблеясынан 29 байқаушы, ТМД байқаушылар миссиясы құрамынан 6 байқаушы, Ислам ынтымақтастығы ұйымынан 4 байқаушы бар. Ал 7 желтоқсанда бұл тізімге жаңа байқаушылар қосылды. Баяндамашының сөзіне қарағанда, Орталық сайлау комиссиясына Сыртқы істер министрлігінен аккредиттеуге ЕҚЫҰ ДИАҚБ-нан 12 бақылаушының және 5 шет мемлекеттен 11 бақылаушының кандидатурасы ұсынылған. Осылайша, 2020 жылдың 7 желтоқсанына дейін алдағы сайлау барысын байқау үшін 62 халықаралық байқаушы ресми түрде тіркелді.
А.СҰЛТАН
