Алматыда «Nur Otan» партиялық бақылау комиссиясы жергілікті атқару органдарының өкілдерімен біріге отырып қаланың дәріханаларына мониторинг жүргізді.
Тексеру нәтижесінде кейбір дәрілік заттардың бағасы негізсіз көтерілгені анықталды. Мәселен, Наурызбай ауданында цианкобаламин дәрумені бекітілген бағадан 30 пайызға қымбат болған. Алатау, Түрксіб аудандарында циклоферон мен амбробене 10 пайызға қымбат сатылған. Анықталған заңбұзушылықтар бойынша түсініктемелер жазылды. Хаттамалар құзырлы органдарға тапсырылды. – Бүгінде жұмыс сапары барысында біз 3 ауданды араладық. Өкінішке қарай, 3 дәріханада дәрі бағасының негізсіз көтерілгенін анықтадық. Әсіресе, пандемия кезінде мұндай қадамға баруға мүлде болмайды. Кәсіпкерлерге, дәріхана иелеріне айыппұл салынатынын ескертемін, – деді партиялық бақылау комиссиясының инспекторы Ержан Жұмағұлов. Айта кету керек, Қазақстанда ДСМ жылына екі рет дәрілік заттардың көтерме және бөлшек сату бағасына шекті баға бекітеді.Әбілмансұр ЖАСАН