Павлодар облыстық «Nur Otan» партиясы филиалының мүшелеріне шаруалардың ұжымдық шағымы жайлы ақпарат берілді.
Өткізілген шара барысында «ВЕК-ПВ» ЖШС, «Шәріпов», «Сторожук», «Пшеничников» шаруа қожалықтарының иелері Железин ауданының әкімдігінде шаруа қожалықтарының басшыларына моральдық қысым көрсеткені және оларды басқа заңды тұлғалардың пайдасына жер учаскелерінен бас тарту туралы өтініштерге қол қоюға мәжбүрлегені анықталды. Жұмыс тобы заң талаптарын елемеу және Железин ауданы басшылығы тарапынан тиісті бақылаудың болмауы халықтың наразылығы мен тұрғындардың мемлекеттік органдарға деген сенімсіздігін тудырады деп санайды. «Nur Otan» партиясы мүшелерінің қатысуымен өткен отырыста тағы бір мәселе қаралды. Железин ауданы әкімі аппаратында ауылшаруашылық жерлерінің мемлекеттік инспекторының бос орны бар. Бұл мамандық иесінің міндетіне мемлекеттік бақылау, ауылшаруашылық жерлерін пайдалану мен қорғау жұмыстары кіреді. Бірақ бұл міндеттерді орындау аудан әкімі аппаратының мемлекеттік заң бөлімінің меңгерушісіне жүктелгені белгілі болды. Ал бұл жұмысты мемлекеттік инспектор орындаса, мұндай олқылықтар туындамайтын еді. Жиында бұдан басқа да сыбайлас жемқорлыққа жақын бірқатар мәселе көтерілді. Жұмыс тобы Железин ауданы әкіміне ұсыныстарын жеткізді. Отырыста олардың барлығы кезең-кезеңімен іске асырылатыны айтылды.Әбілмансұр ЖАСАН