Нұр-Сұлтанда «Болашақ» қорының ұйымдастыруымен ХІІ қысқы салтанатты қайырымдылық кеш өтеді.
Іс-шараның мақсаты – ерекше күтімді қажет ететін балаларға қолдау көрсету. Атап айтқанда, аутизммен ауыратын балаларды қоғам назарынан тыс қалдырмау. Көпшілік ортасынан шеттетпей, қатарластарымен тең дәрежеде білім алу, спортпен айналысуға жағдай жасау.
Бұған дейін өткен қайырымдылық кештерінде Майк Тайсон мен Геннадий Головкиннің қолтаңбасы қойылған бокс қолғабы, «Формула-1» жарысының бірнеше дүркін жеңімпазы Михаэль Шумахердің баскиімі, қолдан тоқылған түркімен кілемдері, спортшы Илья Ильиннің спорттық формасы аукционда сатылды. Былтыр Илья Ильин мұндай игі бастама қоғамда жаппай қолдау тапса, құба-құп деген ойымен бөліскен еді. «Маған қамқорлық жасау идеясы ұнады. «Қайырымдылық қорына не бересің?» деп сұрағанда, медальдарымды сыйға тартсам ба екен дедім. Кішкентайымнан жеңіп алған марапатым өте көп. Бірақ бұл тым қарабайыр болып көрінді. Сондықтан спорттық формамды беремін деп шештім. Форманы 2015 жылы Грозныйда өткен чемпионатта киген едім. Спорттық формаларым әр жарысқа арнайы тігіледі. Әр чемпионат – мен үшін жеке бір тарих. Осындай үш формам бар. Бірі – Тұңғыш Президент музейінде. Бұрын Лондон Олимпиадасында чемпион болған кезімде өз қолыммен сыйға тартқан едім. Екіншісі – Алматыда өткен әлем чемпионатында ки-генім. Бірақ оның қайда екенін, шынымды айтсам, білмеймін. Қайырымдылық шараларына қатысудан ешқашан бас тартқан емеспін. Өмірде бір-бірімізге қолдан келгенше көмектескеніміз абзал» деген еді.
Биыл өтетін шараның артықшылығын «Болашақ» қайырымдылық қорының басшысы Динара Шайжүнісова айтып берді.
– Қысқы бал – жай ғана концерттік кеш емес. Демеушілер мен атымтай жомарт азаматтар, еріктілердің балаларға жасаған айрықша қамқорлығы. Қайырымдылық балын өткізуге жанашыр кәсіпкерлер, ірі кәсіпорын өкілдері, компаниялар айрықша үлес қосып отыр. Жиналған қаражат «Әрбір бала мектепке баруға лайық» жобасына және балалардың білім алуына жұмсалады. Болашақта аутизмге шалдыққан балалардың жалпы білім беретін мектепте оқуына толықтай жағдай жасағымыз келеді. Олардың білім алып, арманына қол жеткізуіне көмектесеміз. Қайырымдылық – қоғам үшін өте маңызды, – деді Динара Шайжүнісова.
Дәстүрлі қайырымдылық шарасы ерекше күтімді қажет ететін балалар үшін айрықша кеш болмақ.
М.БАҚЫТ