Қарағандыда бейнелеу өнері музейінде «Күзгі блюз» атты көрме ашылды. Онда қаладағы көпсалалы гуманитарлық-техникалық колледжі студенттерінің жұмыстары қойылған.
Экспозицияда сәулет, дизайн, театр және сәндік өнерді зерттейтін техникалық бөлім студенттерінің шығармашылық жұмыстары жинақталған.
Әсіресе, үш дипломдық жұмыс көрмеде негізгі орынды алып тұр. Олар: Жастардың демалыс орталығы, Суретшілер үйі, Көрме павильоны. Барлығы Қарағандыда студенттер таңдаған нақты учаскелер үшін құрылған. Көрмеде тұрғын үйлердің макеттері бар.
– Көрмеге «Идея» атты жұмысымды әкелдім. Ағылшын жазушысы Алан Мурдың «V –Вендетта» графикалық новелланың кейіпкерлерінен шабыттанып жасаған шығармам. Алан Мур комикс жанрында көптеген шығармаларымен танылған қаламгер. «V –Вендетта» шығармасының желісінде жұмбақ революционердің өмір тарихы суреттеледі. Яғни, V – революционер және ол жалын арқылы өзіне тартады. Бір сөзбен айтқанда, идея, философия арқылы берілген. Осы графикалық новелла кейіпкеріне еліктеп, «Идея» атты жұмысым дүниеге келді, – дейді дизайн бөлімінің 4-курс студенті Андрей Балашев.
Аталған көрме облыстық бейнелеу өнері музейінде осымен екінші рет өткізіліп отыр. Бұрын оқу орны базасында және сәулетшілер үйінде ұйымдастырылыпты. Қарағанды көпсалалық гуманитарлық-техникалық колледжінің директоры Алена Павлюк «Күзгі блюз» көрмесін өткізуді дәстүрге айналдырсақ деген ойын жеткізді.
«Бұл жерде біздің колледжді бітірген түлектер мен оқып жатқан студенттеріміздің жұмысы қойылған. Көрмеде архитектуралық макеттерді, көркем-графикалық жұмыстарды, костюмдердің коллаждары мен эскиздерін тамашалауға болады. Барлығы 40 жұмыс қойылып отыр»,– деді Алена Павлюк.
Жалпы, көрмеден студенттердің кәсіби дайындық деңгейін ғана емес, сонымен қатар Қарағанды жастарының қала мен ауылдың жаңа эстетикалық кеңістігін құруға деген ықыласын байқауға болады.
Сондай-ақ көрмеде сәулет, дизайн, графика, кескіндеме, ассамблея, маска, қуыршақ жобалары ұсынылады.
«Күзгі блюз» көрмесі 3 желтоқсанға дейін жалғасады. Кіру ақысы – 200 теңге.
Б.БАЗАР