Нұр-Сұлтанда «Қазбат» көркем фильмінің тұсаукесері өтті. Бұл фильмде Қазақстанның Ұлттық ұланы ел үшін ерлік көрсеткен батырларды экранға шығару арқылы қаза болған жауынгерлерге құрмет білдірген. Оқиға желісі әскери қызметшілердің тәжік-ауған шекарасында бітімгерлік қызмет барысында бастарынан өткерген шынайы оқиғасымен өрілген.
Туындыны «АЮ СИНЕМА» кинокомпаниясы Қазақстан Ұлттық ұланының қолдауымен жарыққа шығарып отыр. 1995 жылы 7 сәуір күні Пшихарв шатқалында Қазақстан ішкі әскерінің жетінші құрама ротасы содырлардың тұтқиылдан жасаған шабуылынан от пен оқтың құрсауында қалады. Жаудың күші басым болған ұрыста 17 әскери қызметші оққа ұшып, 33-і жараланған еді. Ауған жағынан шабуыл жасаған содырлар бір сағаттың ішінде Тәжікстан аумағына өтіп кетуді жоспарлаған болатын. Бірақ оларға қарсы жасалған шабуылдың өте күшті болғандығынан, бес сағатқа созылған қарулы қақтығыстан кейін кері шегінуге мәжбүр болды.
«Бұл фильмнің ең маңызды мақсаты – идеологиялық тұрғыдан ер-азаматтардың санасына оң әсер етіп, жас ұрпақты патриоттық сезімге тәрбиелеу, Отанға деген сүйіспеншілігін және оның қауіпсіздігіне жауапкершілігін арттыру, ықпал ету болып табылады» дейді идея авторы Қазақстан Ұлттық ұланының Бас қолбасшысы Руслан Жақсылықов.
Туындының бас продюсері – Данияр Ибрагимов, қоюшы режиссер – Асқар Ұзабаев, фильмнің қоюшы бас операторы – Максим Задарновский.
Кинода Дәурен Серғазин, Ринат Дошибеков, Халық Рахат, Дияс Мырзахмет, Шарифбек Закиров, Индира Шынболатқызы секілді талантты актерлер ел есінен өшпейтін тарихи қанды оқиғаның кейіпкерлерін сомдаған. Фильмнің теледидарға арналған нұсқасы келесі жылы 7 сәуірден бастап, аталған қарулы қақтығыстың 25 жылдығына орай Qazaqstan телеарнасы арқылы көрерменге жол тартады.
Ақбота ӘЛІМ