Ақмола облысының тұрғыны, 70 жастағы әжей полиция қызметкерлеріне ұлын тауып бергені үшін алғысын білдірді. Іздеу жұмыстарына учаскелік инспекторлардың әлеуметтік желілерде таратқан хабарламасы үлкен көмек болыпты.
Астрахан ауданының орталығы Астраханка ауылында 7 мыңға жуық адам тұрады. Сол себепті мұнда үш бірдей учаскелік полиция инспекторы қызмет көрсетеді. Адам жоғалды деген хабар түскенде олардан бөлек аудандық полиция бөлімінің кезекшіліктегі жеке құрамы да жұмылдырылды. «Қарашаның 25-і күні кезекші бөлімге Зоя Абасова есімді 70 жастағы әйел телефон шалды. «Кеше кешке сағат 21.00-де ұлым Сергей үйден шығып кетіп еді, содан хабар жоқ. Балыққа кетті деп естідім. Мұз әлі бекімеген, суға батып кетеді ғой. Бұрын мұндай айтпай кететіні жоқ еді. Үйге де тез оралатын» деп қатты алаңдаулы ана уайымын айтты. Осының алдында ғана біздің ауданда 3 балықшы жоғалып, бірі батып кеткен болатын. Ол туралы республикалық ақпарат құралдарына дейін жазды», – дейді Ақмола облысы Астрахан аудандық ПБ Астраханка ауылдық учаскелік полиция инспекторы, полиция капитаны Сәлімжан Ержанов. Содан іздеу жұмыстарына кірісіп кеткен топ ауыл тұрғындарына сұрау салып, оның достарынан, Молодежный көшесіндегі көршілерден жауап алған. Әлеуметтік желілерде аудан халқымен байланысып отыратын топтарға да шұғыл хабарлама жіберген. Өзенді жағалап, балықшылар отырады-ау деген жерлерді шолып шыққан. Кездескен балықшылардан сұраған. Бірақ екі күн бойы хабар шықпайды. «Содан үшінші күн дегенде әлеуметтік желідегі топқа ол кісінің қайда жүргені туралы хабар келіп түсті. Жедел экипажбен сол мекенжайға қарай жөнелдік. Келсек, Сергейдің өзі хабарды естіп, үйіне барғалы машинаға отырып жатыр екен. Содан анасына хабарлап, өзінен жауап алып, қандай да бір құқықбұзушылыққа немесе қылмысқа қатысы жоғын тексердік. Өзі жасамаса да, ұшырап қалуы мүмкін деген нұсқаларын да қарадық. Әйтсе де, 41 жастағы бойдақ жігіт қой, көңіл көтергісі келген болар. Өзі де анасын уайымдатып қойғанына өкінішін білдірді. Тексеруден кейін оны аман-есен отбасына табыстадық», – дейді учаскелік полиция инспекторы Алмас Купешев. Полиция қызметкерлерінің халықпен барлық мүмкіндікті пайдаланып, етене жақын бола түскені құптарлық іс. Әсіресе, учаскелік полиция инспекторларының WhatsApp мессенджерінде ауылдастар тобына қосылып, олармен емен-жарқын сұхбатта болуы ауылда бұрыннан қалыптасқан әдет екен. Тіпті, осы соңғы оқиға сияқты әлеуметтік желінің арқасында кейбір қылмыстардың ізі суымай ашылған уақыты да болыпты. «Ауылымызда көп қылмыс бола бермейді. Мал бағып, егін еккен шаруа жандар болғандықтан, олардың артық қақ-соқпен ісі жоқ. Көбіне тұрмыстық-отбасылық жанжалдар және мал ұрлығы жиі кездеседі. Ондайда мессенджерлердің көмегі көп. Мал жоғалып кетті деп хабар жібереміз. Көрген адам болса, жауап жазады. Кейде іздеген адамымыздың телефонын WhatsApp-тағы топтардан тауып алып жатамыз. Бұл өте тиімді және ыңғайлы байланыс тетігі болып тұр. Тіпті, WhatsApp-та біздің бар екенімізді білетін ауылдастар желіде сөйлескенде өздерін сыпайы ұстайды. Бұл да бір профилактиканың нышаны деуге болады», – дейді аудандық ПБ жедел уәкілі, полиция капитаны Аязбек Тайшыбеков. Астраханка ауылы халықаралық күрежолдың бойында орналасқан. Халқы негізінен ауыл шаруашылығымен, тасымалмен күнелтеді. Аудан орталығы саналатын ауылда жедел ахуал тұрақты. «Карантин басталғалы ауылдағы ауруханалар да, біздің ішкі істер органдары да тәулік бойғы кезекшілік режиміне ауысқан болатынбыз. Сондықтан халықаралық тасжол да, ауылдағы ахуал да біздің ұдайы қадағалауымызда. Мал ұрлығына қарсы күндегісін кешкі рейдтерге шығып тұрамыз. Онда бізге шаруа қожалықтары өкілдері мен қазір «волонтер» атап жүрген бұрыннан бар қоғамдық көмекшілеріміз көмектесіп тұрады. Сергейді іздеген кезде де осы ауылдастардың үлкен көмегі болды. Әйтсе де, біз оның жоғалмағанына сенімді едік. Өйткені оның ауылдан кеткенін ешкім көрген жоқ. Ол – жұмыссыз адам. Басқа жаққа жұмыс іздеп кетуі мүмкін. Бірақ әке-шешесі жақсы тұрады. Табыс табуға кетті дейтіндей мұқтаждығы жоқ. Сондықтан да қарияның көңілі үшін іздеу жұмыстарына бірден кірістік», – дейді Сәлімжан Қайратұлы. Ал бауыр еті баласымен қайта табысқан ананың қуанышында шек жоқ. Алғысын білдіру үшін ол ішкі істер органы басшылығы атына хат жазып, оған қоса видеосын да жолдапты. Бұл материалдар Ақмола облыстық ПД ресми аккаунтында жарық көрді.Нұрлан ОРАЗҒАЛИЕВ