Музыкалық жас көрермен театры баспасөз қызметінің хабарлауынша, актер Расул Усманов халықаралық жобада басты рөлдердің бірінде ойнайды.
2020 жылдың 16-31 желтоқсан аралығында Санкт-Петерборда Музыкалық комедия театрының сахнасында француз композиторы Клод-Мишель Шенбергтің «Мисс Сайгон» мюзиклі өтеді. Қойылымды сахналауға атақты режиссер Корнелиус Балтус жетекшілік ететін халықаралық топ жұмылдырылған. Естеріңізде болса, аталған режиссердің тобы аты аңызға айналған «Бал вампиров» мюзиклінің ресейлік нұсқасын жасаған-ды.
Театр ұжымының айтуынша, көп кезеңді кастинг өткен. Ұлттық колоритті көрсетуді мақсат еткен кастингтен ең мықты әртістерді таңдап алған. Олардың дені Петербор көрермендерінің алдында алғаш рет өнер көрсетпек. Солардың бірі – танымал кино және театр актері, «Сахнагер-2019» Ұлттық театр жүлдесінің лауреаты, Нұр-Сұлтан қаласында алғаш ашылған Музыкалық жас көрермен театрының жетекші актері Расул Усманов. Расул негізгі құрамдағы басты рөлдердің бірінде (Туи) ойнайды.
Нұр-Сұлтан қаласы әкімдігінің Музыкалық жас көрермен театрының басшылығы мен ұжымы жоба ұйымдастырушыларына және қойылымның барлық актеріне сәттілік тілейді. Ал Расул Усманов халықаралық жоба актерлерімен бірге тыңғылықты дайындық жасап жатыр.
Айбике ЖАНАСЫЛ
