Нұр-Сұлтанда Қазақстан Қарулы күштері шығармашылық ұжымының «Сарбаз сахнасы» жалпы әскери фестивалінің қорытынды концерті өтті.
Әр өңірден келген 400 әскери қызметші өнерін ортаға салды. Қатысушылар төрт номинация бойынша өзара бақ сынады. Олар: вокал (жеке, ансамбль құрамында), аспапты ансамбль (үрмелі, соқпалы, фольклорлы), фотограф, суретші, қолөнер шеберлері.
Қатысушылар әскери-патриоттық тақырыптағы отандық және шетелдік композиторлардың шығармаларын орындады. «Шығыс» өңірлік қолбасшылығы екі номинация бойынша жеңімпаз атанды. Атап айтқанда, Жасұлан Тәжиев «Вокал» бойынша, «Жаңа ғасыр» фольклорлық-этнографикалық ансамблі аспаптық орындауда жеңімпаз атанды. Ұжымдық бишілер арасында Құрлық әскерлері Әскери институтының «Семсер» би тобы жеңімпаз атанды. Жеке орындауда І орынды Қарулы Күштер қызметкері, Ұлтық қорғаныс университетінен Сәния Жұлдыз иеленді.
Фестивальдің бас жүлдесін «Оңтүстік» өңірлік қолбасшылығы әскери бөлімінің «Талисман» би тобы алды. Әр номинацияда жеңімпаздар мен бас жүлде иегеріне бағалы сыйлықтар, «Сарбаз сахнасының» статуэткасы мен диплом табыстады. Гала-концерт пен марапаттау рәсіміне Қорғаныс министрінің бірінші орынбаса-
ры – ҚР ҚК Бас штабының бастығы генерал-майор Мұрат Бектанов қатысты. Ол қатысушыларға сайысқа қатысқаны үшін алғыс білдіріп, шығармашылық табыс тіледі.
– Қазақстан Қарулы күштері шығармашылық ұжымының «Сарбаз сахнасы» жалпы әскери фестивалінің басты мақсаты – көркемөнерпаздардың өнерін сараптау. Идеологиялық және мәдени-демалыс жұмыстарының тиімділігін арттыру, талантты әскери қызметшілерді анықтау. Біз қатысушылардың өнеріне тәнті болдық. Өнеріне қолдау көрсеттік, – деді ол.
Шара соңы гала-концертпен аяқталды. Дәстүрлі «Сарбаз сахнасы» байқауы жыл сайын төрт кезеңге бөлініп өткізіледі. Атап айтқанда, Қарулы Күштердің өңірлік қолбасшылықтары, роталар, ботальондар, бригадалар арасында өтіп жүр.
Еске сала кетейік, Қорғаныс министрінің бастамасымен биылдан бастап Қарулы Күштердегі «Жас Ұлан» әскери әндер фестивалі «Сарбаз сахнасы» және «Жас Сарбаз» болып екіге бөлінді.