«Бар әлем саған жолын ашар, талабың болса таудай». Ержан Максимнің Junior Eurovision байқауында орындаған әні осы жолдармен үндесті. Талантты әнші байқауда 2-орын алды.
Толған ай. Ай жарығында арманына қол созған бала. Жеткіншектің қолына қонған қыран. Артынша бәрінің көбелекке айналған көрінісі. Ержанның әнін лед экранда дәл осы сюжет демеді. Қатысушы «Арманыңнан қалманы» алғашында ағылшынша шырқады. Әншінің ерекше үні шет тілдегі нұсқамен үйлескені тіпті керемет. Залдағы көрермен мен әділқазының таңдай қаққаны көрініп тұрды. Сәлден соң Ержан әнін қазақша жалғастырды. Көзінде жалын оты маздаған өрен Польша төрінде барын салды. Арман-көбелекпен бірге билеп, дауыс деңгейін көрсетті. Өзін еркін ұстап, сенімді сезінген ол жүлделі орынның боларын сезген сыңайлы. Өйткені байқау басталардың алдында да сенімді екенін жеткізді. Шынымен де, әділқазыны орындаған әніңе иландыру үшін сөз бен сазды түсіне білу керек. Ержан Максим арманынан қалмайтынын, талабы ел мен елді жалғайтынын дәлелдеді.
Байқау қорытындысы бойынша жас әнші 2-орын иеленді. Ержан Максим бас аяғы 227 ұпай жинады. Әр елдегі әділқазылар оған 148 ұпай берді. Бұл – әділқазы тарапынан қойылған ең жоғары ұпай. Демек, Ержанның өнері мен таланты әлемге ұнаған. Ал көрермен тарапынан 78 ұпай алды. Жарыста жанкүйер мен әділқазының бағасын қосқанда 278 ұпай жинаған польшалық Вики Габор жеңіске жетті. Польша үміткеріне қазылар 122 ұпай сыйласа, 3,77 миллион жанкүйер дауыс берген. Үшінші орынды Испания намысын қорғаған Мелани Гарсия иеленді.
Шетелдік БАҚ Ержан Максимге көрермен дауысы жетіспегенін жарыса жазды. Еліміздегі белді тұлғалар, әншілер Ержанға дауыс беріңдер деп әлеуметтік желіде үндеу тастады. Соның ішінде Димаш Құдайбергеннің Іnstagram-ға «Дауыс берейік «бауырсақ-балапанға» дегені ерекше әсер қалдырды. Жазбаның астына пікір жазғандардың ішінде шетелдіктер бар. Олар да Ержанның талантын мойындап, ары қарай дами түсуіне тілек білдірді.
Өз кезегінде Ержан тыңдарманына дауыс бергені үшін алғыс айтты. «Құрметті достарым, апа-ағаларым, ата-әжелерім! Маған дауыс бергендеріңіз үшін көп-көп рақмет! Осы жеңіске сіздердің арқаларыңызда жетіп отырмын» деп видеоүндеу жолдады. Кейінірек Іnstagram парақшасында «Баршаңызға алғысым шексіз. Менің жеңісім – елімнің жемісі» деп қуанышына ортақтасқан еліне, дауыс берген көрерменіне ілтипат көрсетті.
Өренінің жеңісіне сүйсінген елі оны жан-жақтан құттықтады. Президентіміз бастап, министр қостады. Соның бірі – Мәдениет және спорт министрі Ақтоты Райымқұлова. Ведомство басшысы Ержан Максимге ары қарай табыс тілеп, қазақ мәдениетін әлемге танытқаны үшін құттықтаухат жолдады.
«Құрметті Ержан! Сізді Junior Eurovision song contest – 2019 байқауында жүлделі екінші орын алуыңызбен шын жүректен құттықтаймын! Сіз Польшаның Гливице қаласында өткен Junior Eurovision халықаралық ән байқауындағы жарқын өнеріңізбен кезекті рет асқақ арманға деген құлшынысы зор дарынды, еңбекқор әнші екеніңізді паш еттіңіз. Расында, сіздің орындауыңыздағы әсем ән әлем халықтарының қазақ мәдениетімен таныса түсуге деген құштарлығын оятқаны сөзсіз. Алдағы уақытта да жаһандық байқауларда сәтті өнер көрсетіп, жарқын жетістіктеріңізбен ел мерейін үстем ете беріңіз. Осынау сәтті пайдалана отырып, Сізге зор денсаулық, толайым шығармашылық табыс тілеймін!» делінген министрдің құттықтауында.
Қазақстан Junior Eurovision байқауына осымен екінші рет қатысты. 2018 жылы аталған сайысқа ел атынан Данелия Тулешова барған-ды. «Өзіңе сен» әнін орындаған жас әнші 6-орын алды. Мұнда да Польша үміті Роксана Венгель топ жарған болатын.
Айзат АЙДАРҚЫЗЫ