Жиі болмаса да, осы уақытқа дейін балабақша мен түрлі бейімдеу орталықтарында тәрбиешілердің баланы ұрып-соғып, зорлық көрсеткен фактілері кездесіп жататын. Дегенмен бұл жолғысы бәрінен асып түскен секілді. Амалсыздан бір тәрбиешінің тәртібін бүтін ел болып қарайтын күнге жеттік.
Былтыр 18 қарашада Атырау қаласындағы сөйлеу қабілеті жетілмеген бүлдіршіндерге арналған «Алтын балық» балабақшасының тәрбиешісі баланы аяусыз соққыға жыққан. Ал зардап шеккен баланың әкесі Рашид Түкешовтің қолына оқиға толықтай жазылған 25 бейнежазба тиген. Бірақ нақты дәлел боларлық бейнежазбалар арқылы құзырлы органдарға шағым түсіргенімен, 1 жылдан астам уақыт өтсе де, тәрбиешіге еш шара қолданылмаған. Осыдан кейін өзге амалы болмаған соң бүлдіршіннің әкесі қоғам назарын бұру үшін барлық бейнежазбаны әлеуметтік желіге шығарып, Бас прокуратура мен Еңбек және халықты әлеуметтік қорғау министрлігінен, Атырау облысының әкімдігінен көмек сұрап үндеу жариялаған болатын. Расында да, баланы ұрып-соққан тәрбиешінің іс-әрекеті бейнежазбада тұр. Бүлдіршіннің жалынғанына қарамастан басынан ұрып, құлағын тартып, аяғын басқанын көргенде біз де бұл істі жайына қалдырмау керегін түсіндік. Біз баланың әкесі Рашид Түкешовпен хабарласқан едік. Ол 1 жылдан астам уақыттың ішінде әділдік іздеп, шарқ ұрғаннан бас сұқпаған есігі қалмағанын айтып отыр. – Әбден күйзеліске түстік. Атырау қалалық Полиция басқармасы істі үнемі кейінге қалдырып келді, еш нәтиже жоқ. Оқиға 2019 жылы 18 қарашада болған. Сөйлеу қабілеті жетілмеген балаларға арналған мемлекеттік мамандандырылған «Алтын балық» балабақшасының тәрбиешісі ұлым Ермековті бірнеше мәрте ұрған. Тәрбиешінің аты-жөні – Мария Ізмағанбетова. Зорлық-зомбылық фактісін бейнематериалдан анық қарауға болады. Осы мәселені шулатып көтергенге дейін тәрбиеші сол балабақшада жұмыс істеп жүрді. Ұлым невропатологтың есебінде тұр. Ол оқиғаны айта алмайды, бірақ барлығы анық көрініп тұрса да, шу шығармасақ, қимылдамайтын құзырлы органдарға өкпеміз бар. Тәрбиеші баланың денсаулығына қасақана зиян келтірді, сол үшін жазалануы тиіс. Сот процесін кейінге қалдырмауды талап еттік, енді істің әрі қарай қалай өрбитінін бақылаймыз, – дейді ол. Бір қызығы, Атырау қаласының Білім бөлімі тәрбиешіден түсініктеме талап етумен шектеліпті. Бірақ Мария Ізмағанбетованың адвокаты сот шешімін күтуді сұрап, нәтижесінде тәрбиешіден түсініктеме де алынбаған. Бейнежазба әлеуметтік желіде таралып, қоғам талқысына түскенге дейін қалалық білім бөлімі оқиғаға қатысты еш жауап бермей келген. Соңында Білім және ғылым министрлігіне қарасты Білім саласындағы сапаны қамтамасыз ету департаменті аз-кем түсініктеме берді.
– №20 «Алтын балық» балабақшасында тәрбиеленушіге тәрбиеші тарапынан қол жұмсау дерегі болды. Бұл туралы баланың ата-анасынан қалалық білім бөліміне арыз түсті. Біз өтінішті Атырау облысы бойынша Білім саласындағы бақылау департаментіне жолдадық. Тексеру қорытындысы бойынша, департамент тәрбиешіге айыппұл салды. Тәрбиеші жұмыстан босатылды. Тәрбиеленушінің ата-анасы Полиция департаментіне шағым жолдаған, қазір іс қозғалып, аталған факт бойынша тергеу жүргізіліп жатыр. Қылмыстық кодекстің 110-бабы «қинау» бойынша іс қозғалды, – делінген хабарламада.
Алғашында баланың ата-анасы прокуратура мен қалалық полицияға тәрбиешінің үстінен шағым түсіргенде іс қозғала басталғандай болған. Дегенмен Қылмыстық кодекстің қай бабын арқау еткені де айтылмапты. Осылайша, бірінші іс жабылған. Енді Атырау қалалық Полиция басқармасы Қылмыстық кодекстің 110-бабы «қинау» бойынша іс қозғап, сотқа дейінгі тергеуді аяқтаған. Сонымен, іс прокуратураға жолданған көрінеді. Егер аталған бап бойынша тәрбиешінің қылмысы дәлелденсе, 2 жылға дейін бас бостандығынан айырылуы мүмкін.
Қайткен күнде де тәрбиешінің іс-әрекетін ақтап ала алмасымыз анық. Қанша жерден бейтарап қарасаңыз да – шындығы сол. Бір ескере кетер дүние бар, дамыған елдерде балаға қол көтеру «азаптау» деп танылып, кісі өлтіру қылмысына теңестіріледі. Бұған айтар уәж жоқ, себебі баланы «келешек» деп білсек, «келешекті» қорлағаннан не күтуге болады?
Мадияр ТӨЛЕУ