«Ақ жол» партиясы ұсынған жас отбасыларға арналған ипотеканы субсидиялау жүйесін сайлаушылар әлеуметтік әділеттік деп бағалады. «Ақ жол» демократиялық партиясының үгіт-насихат тобы Ақтөбе облысының кәсіпкерлері мен қаржы секторының өкілдерімен кездесу өткізді. Ақтөбе өңірінен алдағы сайлауда «Ақ жол» партиясынан облыстық, қалалық және аудандық мәслихаттарға кандидаттар ұсынылды. Облыс өкілдері Мәжіліс депутаттығына кандидаттардың партиялық тізімінде де бар. Алғаш рет барлық аудандық мәслихаттарға партия филиалынан 3 үміткерден, облыстық мәслихатқа 6 және қалалық мәслихаттарға 7 үміткер ұсынылды. Кездесу барысында Парламент Мәжілісінің депутаты Дания Еспаева қатысушыларды партияның сайлауалды бағдарламасымен таныстырды. Бағдарламаның бизнесті қолдауға және әлеуметтік салаға қатысты бағыттары сайлаушылардың ерекше қызығушылығын тудырды. Кәсіпкерлер бизнеске арналған несие бойынша пайызды төмендету жөніндегі «Ақ жол» ұсынған шаралардың өзектілігін атап өтті. Ақтөбе облыстық филиалының төрағасы, облыстық мәслихат депутаты Асқар Садықов «Ақ жол» ҚДП алдағы уақытта да Қазақстанның ұлттық мүддесіне қызмет етіп, демократияны нығайтуға, бизнесті қолдауға, сыбайлас жемқорлыққа қарсы әрекет ететіндігін мәлімдеді. Әңгіме барысында тұрғындар жас отбасыларға арналған ипотекалық бағдарламаның жоқтығын атап өтті. Сондықтан партия ұсынған жас отбасылар үшін ипотекалық несие бойынша пайыздық мөлшерлемелерді субсидиялау жүйесінің әр баланың туылуына қарай 25% пайыздық мөлшерін жабуы – әлеуметтік әділдік деп бағалады.
«Бүгінде үкіметтік бағдарламалар көпбалалы отбасыларға бағытталған. Бірақ ешқандай отбасы бірден үлкен болмайды. Жастарды әрбір кезекті баланың дүниеге келуіне кезең-кезеңімен ынталандыру керек. «Ақ жол» партиясы 2012 жылдан бері мынадай ұсыныс жасап келеді: 1- бала туған кезде 25%-ға және одан әрі әрбір келесі баланың туу кезінде ұлғайтатын болса, онда екінші бала туған кезде мемлекет ипотеканың 50% субсидиялайды, ал 4-бала туған кезде мұндай отбасы ипотеканы 0% дейін төмендете отырып, көп балалы отбасылар санатына ауыстырылады» – деп атап өтті Д.Еспаева.Кездесуге қатысқандар Әлеуметтік медициналық сақтандыру қоры (ӘМСҚ) жұмысының тиімділігі мәселелерін көтерді. Олардың пікірінше, арнайы қор құрумен қызмет көрсету және дәрі-дәрмекпен қамтамасыз етудің сапасы жақсармаған. Осылайша олар партияның жеке шоттар туралы бастамасын толығымен қолдады. Кездесуге қатысушылардың бірі- бұрынғы ауған жауынгері ӘМСҚ жүйесіне көшкеннен бері арзан және тиімсіз дәрі-дәрмектердің ұсынылуына наразылығын білдірді. «Әрбір азаматқа қорда оның жеке шоты бекітілуі тиіс, онда оның төлемдері есепке алынады және салымшы өзінің немесе оның жақындарының келісімі бойынша ғана оның емделгені үшін ақша төлеуі мүмкін. Сапасыз ем жасалған немесе нашар қарым-қатынас жағдайларында- тұтынушының мұндай қызметтерге ақы төлеуден бас тартуға құқығы болуы тиіс. Сонымен қатар Қордың өзі салымшылардың алатын медициналық қызметтерінің сапасын бақылауға және пациенттердің шағымдары бойынша тұрақты жұмыс жүргізуге (қажетті шаралар қабылдауға) міндетті. Сонда ғана емдеу мекемелерінің қызметкерлері өз міндеттеріне мұқият қарайтын болады, ал адал медицина қызметкерлері олардың ауыр еңбегіне лайықты еңбекақы алатын болады», - делінген «Ақ жол» партиясының сайлауалды бағдарламасында. Үгіт-насихат тобының мүшелері сұрақтарға жауап беріп, сайлаушыларды олардың мүдделерін қорғау жөніндегі жұмыстарды жалғастыра беретініне сендіріп, аймақтағы кәсіпкерлер мен қаржыгерлерді «Ақ жол» үшін дауыс беруге шақырды. Өңірде «Ақ жол» партиясының сайлауалды үгіт-насихат жұмыстары жалғасуда