2020 жыл ешкімге оңай тимеді. Біз бүгін ауыртпалыққа толы сәттерден гөрі, елді елең еткізген жақсылықтарды бөлісуді жөн көрдік. Әсіресе, елімізді әлемге танытқан қазақтарды еске алмақпыз.
Әлемге танылған диджей Ақсу қаласының теміржолшысы екенін кім білген?! Павлодар облысының тумасы ең алғаш былтыр Saint Jhn-ның Roses әнінің ремиксімен танылды. Міне, сол кезден Imanbek атымен танымал болған Иманбек Зейкенов әлемге әйгілі әншілердің әндерін орындап, бүгінде музыка саласының Оскары саналатын АҚШ дыбыс жазу академиясының Grammy сыйлығына ұсынылды.
Grammy – америкалық дыбыс жазу академиясының сыйлығы. АҚШ дыбыс жазу қауымдастығы 14 наурызда 1958 жылы құрылған. Музыка саласындағы ең жоғары марапаттың бірі саналады. Сыйлықтың музыканттар арасында «Оскар» аталуы сондықтан. Recording Academy Grammy-дің жеңімпаздарын жыл сайын музыканың 30 жанры бойынша марапаттайды. Сыйлық жеңімпаздарының есімі 2021 жылдың 31 қаңтарында белгілі болады.
Қызығы, Иманбек ән айтқанды бала кезінен ұнатқан. Ал 8 жасында әкесі сыйлаған гитарада ойнап бастаған. Мамандығы – теміржолшы. Теміржол институтында оқып жүргенде-ақ Ақсу теміржол станциясында жұмыс істеді. Музыкамен айналысу – хоббиі. Арнайы музыкалық білімі жоқ. Сондықтан диджей пультін игеруді әлі де үйреніп жүр.
Ақтаулық альбинос қыз. Есімі – Әсел Қалағанова. 10 жасынан модель мектебінде оқып, жарнамаға жиі түсіп жүр. Тіпті ол америкалық өнімнің жарнама ролигіне түсіп, еліміздің көрікті жерлерін көрсеткен.
Әселдің өзінен аумай қалған Камила есімді сіңлісі бар. Жеткіншектердің ақшыл түсті қас-кірпігі мен шашы бірден байқалады. Бір қызығы, олардың бауыры Алдиярда мұндай ерекшелік жоқ. Жаратылысы бөлек қыздар бүгінде көптің назарында жүр.
Дәрігерлердің айтуынша, Қазақстанда альбиностың дүниеге келуі бір миллион адамнан біреуге тең. Бұл терідегі мелонин жетіспеушілігінен болуы мүмкін. Сондықтан олар күндіз қалағанынша көшеге шыға алмайды. Көшеде көп жүру қатерлі ісікке алып келуі мүмкін. Сол себепті шектеу бар. Күнге қыздырынуды былай қойғанда, көшеге кешкі 6-7-ден кейін ғана шығуы керек екен.
Junior Eurovision XVIII ән байқауында Қазақстан намысын қорғап, екінші орын алған Қарақат Башанова биыл танымал бола түсті. Бұл байқауда Франция атынан өнер көрсеткен Валентина бірінші, нидерландылық Unity тобы үшінші орын алды. Биылғы Junior Eurovision байқауына Беларусь, Франция, Грузия, Қазақстан, Мальта, Нидерланд, Ресей, Сербия, Испания, Украина, Польша және Германия елдерінің өнерпаздары қатысты.
18-ші Junior Eurovision ән байқауының жеңімпазы қазылар алқасының дауыс беруі және онлайн дауыс беру арқылы анықталды. Дауыс беру жүйесі 50% қазылар алқасының шешімі және 50% онлайн дауыс беру нәтижесіне байланысты болды. Junior Eurovision – Еуропалық хабар тарату одағы (European Broadcasting Union – EBU) ұйымдастыратын ән байқауы.
Ережеге сай, балалар арасындағы Евровидение (Junior Eurovision) мен негізгі Евровидение (Eurovision song contest) конкурсына Еуропа хабар тарату аймағына кіретін елдер ғана еш кедергісіз қатысады. Ал Еуропадан тысқары елдер EBU құрамына серіктес мүше бола алады. Қазақстан және мемлекеттік “Хабар” телеарнасы 2016 жылы Еуропалық хабар тарату одағына серіктес мүше ретінде кірген. Қазақстан бұл одаққа серіктес мүше болмай тұрып-ақ, Eurovision байқауын көрсете бастаған
«Оскар» жүлдесінің иегері – Жайдарбек Күнғожинов. Ол бұл марапатты «Томирис» фильміндегі трюктері үшін алды. Nomad Stunts каскадерлер тобының жетекшісі, трюктер қоюшы, каскадер Жайдарбек Күнғожинов әлемдік каскадерлер академиясының (АҚШ) «Таурус» сыйлығын иеленген еді.
Бұл жыл сайын әлемнің үздік каскадерлері, қоюшылары мен экшн-мамандарын марапаттайтын беделді сыйлық. Бұл – Қазақстан тарихындағы бірінші сыйлық.
«Томирис» фильмі 2019 жылдың күзінде прокатқа шықты. Біздің дәуірімізге дейінгі 6 ғасырдағы оқиғаларға арналған фильм ұлы дала патшайымы – аңызға айналған Томиристің өмірі туралы баяндайды.
Елді таңғалдырған тағы бір оқиға – Ақтауға қоқиқаздың ұшып келуі. Сол кезде құстар шаһар маңындағы Қаракөл аумағына аялдаған.
Мамандардың айтуынша, Ақтауға қоқиқаздар Ақмола облысындағы Қорғалжын мемлекеттік табиғи қорығы аумағындағы Теңіз және Қорғалжын көлдерінен ұшып келген.
Ауа райы суытқан соң оңтүстікке, яғни Хазар қорығына немесе одан да әрі Иран жаққа өтіп кетеді. Қаракөл аумағы – «Қызыл кітапқа» енген қанаттылар тұрақтайтын мекен. Сондықтан да бұл жер табиғат қорғау инспекторларының жіті бақылауына алынған.
«Ескі жыл есірке, жаңа жыл жарылқа» демекші келер жыл елімізге тек қуаныш, жақсылық әкелсін. Халқымыздың мақтан етер азаматтары көбейе берсін!
