Сәтбаев қаласында «Ұлы дала үні» атты халықаралық айтыс өтті. Жыр бәйгесіне ел ақындарынан бөлек, Моңғолия, Қырғызстан, Қытай Халық Республикасынан келген шайырлар жиналды. Жас ақындар айтысы Nur Otan партиясының және облыс әкімі Жеңіс Қасымбектің қолдауымен өтті.
Қарағанды облысында өткен жас жүйріктердің аламанына 18 ақын қатысты.
Жыр додасының тізгінін ақын, филология ғылымдарының докторы, профессор Аманжол Әлтай ұстады. Бәйге басталмас бұрын Асқар Ыдырысов құттықтау сөз сөйлеп, қатысушыларға сәттілік тіледі. Айтыс ақындары мен жыршы-термешілердің халықаралық одағының төрағасы Жүрсін Ерман жас ақындарға бас болып, төрелік айтты. Сәйкесінше Сәтбаев жұрты айтыс абызына құрмет көрсетіп, шапан жапты.
Кешті кестелі жырмен көмкерген 10 ақын ақтық сынға өтті. Қазылардың шешімімен Моңғолиядан келген Іңкәрбек Әділхан, Қырғызстаннан келген Садырбек Тұрдыбек, астаналық Нартай Тілеуқұл, қызылордалық Шыңғыс Құдайберген, түркістандық Дәурен Ысқақ, ақтөбелік Данияр Алдаберген, қарағандылық Ботпай Доскей, жезқазғандық Ботагөз Мұхиден алысхат пен 50 мың теңге сыйақы табысталды. Сонымен бірге ерекше көзге түскен екі ақынға арнайы жүлде тағайындалды. 60 мың теңгелік марапат елордалық Рай Дөңбай мен алматылық Жібек Шахмарданға бұйырды.
Сондай-ақ Шынболат Ділдебаев атындағы 70 мың теңгелік сертификатқа үш ақын иелік етті. Олар – Қытайдан келген ақын Бүркітқазы Әліпбек, шымкенттік Абдырауф Орал мен семейлік Айшолпан Тілеутай. Ал павлодарлық Нұрқанат Қайрат пен жаңаарқалық Сырым Бейсенбек аламаннан 3-орын алды. Қос ақынға 150 мың теңгелік жүлде берілді.
Халықаралық жас ақындар айтысының ең жас қатысушысы, Сәтбаевтың үміті Абзал Мақаш 2-орын иеленді. Ақынға 300 мың теңге көлемінде жүлде табысталды. Бәйгенің 1-орнын Шығыс Қазақстан облысының намысын қорғаған Жұлдызай Маратбек алды.
Сәтбаевты жыр бесігінде тербеткен рухани кештің бас бәйгесі Қанат Мырзаханға бұйырды. Ақынға 1 млн теңге жүлде берілді. Марапаттау салтанатында қала басшысы ақындарды жеңісімен құттықтады. Жүрсін Ерман сөйлеген сөзінде үздік деп танылған 10 ақынды айтыскерлер мен жыршылар одағына қабылдайтынын айтты.
Төл өнерді төбесіне көтерген партия мен әкімдікке жиналған жұрт риза болды. Арда өнердің жалғасын тауып, жыл айналып шайырлардың Арқаға келетініне сенім білдірді.