Мәжіліс жылжабар отырысын өткізуге әзірленуде. Ол жиында депутаттар бірқатар маңызды халықаралық келісімдерді ратификациялайтын жаңа заң жобаларын қарайды. Осы орайда Мәжіліс Спикері Нұрлан Нығматулиннің төрағалығымен палатаның бюросы өтіп, онда алдағы жалпы отырыстың күн тәртібінің жобасы қалыптастырылды.
Алдағы апта басында депутаттар қарауына дипломатиялық қызмет туралы заң жобасы ұсынылады. Бұл құжатты қабылдау дипломатиялық қызмет органдары жүйесінің қызметін нормативтік реттеуді жетілдіруге, халықаралық ұйымдарда жұмыс істеу үшін дипломатиялық қызмет қызметкерінің ынтасын арттыруға, осы органдардың қаржылық тәртібін нығайтуға және олқылықтарды жоюға мүмкіндік береді. Сонымен қатар ратификацияланатын заң жобалары да талқыға салынбақ. Олардың қатарында бір тараптан Еуразиялық экономикалық одақ пен оған мүше мемлекеттер және екінші тараптан Сербия арасындағы еркін сауда туралы келісім, сондай-ақ 2014 жылғы 29 мамырдағы Еуразиялық экономикалық одаққа қатысты шартқа өзгерістер енгізу туралы хаттама бар. Жалпы отырыста Мәжіліс депутаттары Каспий теңізінде қызметті жүзеге асыруға байланысты, өнеркәсіптік қауіпсіздік және ғылым мәселелері бойынша заң жобаларын екінші оқылымда қарамақ. Күн тәртібінің жобасына сәйкес, инклюзивті білім беру туралы заң жобасымен жұмысты одан әрі жалғастыру көзделген. Сондай-ақ Палатаның алдағы жалпы отырысында сот-сараптама қызметі мәселелері бойынша заң жобасын жұмысқа алу жоспарланған.Елдос СЕНБАЙ