Сайлау алдындағы үгіт-насихат науқаны аясында ҚХП-ның Алматы облыстық сайлауалды штабының активі Көксу ауданындағы Н.Алдабергенов атындағы мектептің педагогикалық ұжымымен кездесу өткізді. Мектептің мұғалімдері мен техникалық қызметкерлеріне ҚХП-ның тұғырнамасы таныстырылды.
Сайлаушылармен болған әңгіме барысында мектептің техникалық қызметкерлерінің еңбекақысының төмендігі туралы мәселе қозғалды. Үлкен физикалық күш жұмсаса да, олардың жалақысы небәрі 50-60 мың. Олардың көпшілігі 55-60 жаста. Депутаттыққа үміткерлерге жұмысшының мәртебесін және оның жалақысын қайта қарау қажет екендігі айтылды.
– Өкінішке қарай, ешкім техникалық қызметкерлердің жұмысын құрметтемейді. Бізге алғыс та айтылмайды. Жалақымыз да тым төмен. Соған қарамастан, амалдауға мәжбүрміз, – деді сайлаушылардың бірі.
Көксу аудандық мәслихатының депутаттығына кандидат, бастауыш сынып оқытушысы Әнсия Шегелбаева партияның әлеуметтік бастамалары туралы сөз сөйлеп, қатысушылардың сұрақтарына жауап берді. Ол ауыл жастары үшін тұрғын үй мәселесін шешуге ерекше назар аударды. Өйткені аудандарда үй салынбайды. Қолданыстағы тұрғын үй бағдарламаларына қатысу мүмкін емес. Ауыл тұрғындары да жайлы жағдайда өмір сүргісі келеді. Сондай-ақ педагогтердің проблемасын, жалпы білім беру саласындағы мәселелерді шешу маңызды. Ауыл мектептеріндегі білім сапасы қала мектептерінен ерекшеленбеуі тиіс.
