Nur Otan партиясы жанындағы Сыбайлас жемқорлыққа қарсы іс-қимыл жөніндегі республикалық қоғамдық кеңестің мүшелері жемқорлыққа қарсы іс бойынша партиялықтардың жеке жауапкершілігін күшейтуді ұсынды. Қоғамдық кеңестің кезекті отырысы барысында партияның Шымкент пен Түркістан филиалдарындағы аймақтық кеңестер жұмысының нәтижелері талқыланды.
Жұмыс тобының мәліметінше, соңғы 2 жылда Шымкентте 72 сыбайлас жемқорлық құқықбұзушылық анықталып, ауыл шаруашылығы, білім және жер қатынастары саласында қызмет атқаратын 106 лауазымды тұлға жауапқа тартылды. Әдетте, заң бұзатын – әкімдік, оған бағынышты ұйымдар мен ішкі істер органдарының қызметкерлері. Жыл басынан бері Түркістан облысында 78 сыбайлас жемқорлық қылмыс ашылды. Аяқталған істер бойынша келтірілген шығын мөлшері 300 млн теңгеден асып жығылады. Сыбайлас жемқорлыққа қарсы іс-қимыл жөніндегі республикалық қоғамдық кеңес төрағасының орынбасары Қайырбек Сүлейменовтің айтуынша, аймақтық филиалдардың жұмысын зерттеу барысында, жұмысты жоспарлау кезінде бірдей кемшіліктерге жол берілетіні анықталған.
Өз кезегінде қоғамдық кеңес төрағасы, Мәжіліс депутаты Омархан Өксікбаев сыбайлас жемқорлыққа қарсы күресте жергілікті қоғамдық кеңестердің бірінші орында тұрғанын, сондықтан партия мүшелері мінсіз беделге ие болып, шешім қабылдағанда объективті болуы керектігін баса айтты. Сондай-ақ жиынға қатысушылар Сыбайлас жемқорлыққа қарсы партияның 2020-2025 жылдарға арналған бағдарламасын іске асыру Жол картасының жобасын талқылады. Отырыс қорытындысы бойынша жергілікті атқарушы, құқық қорғау органдары мен партия ұйымдарына анықталған кемшіліктерді жою бойынша нақты ұсыныстар жасалды.
Ерке ЕРҚОҢЫР