Түркістанда күнгей өңірдің әділет департаменттері өкілдерінің қатысуымен халықты білікті заң көмегімен қамтамасыз ету мәселелері бойынша көшпелі отырыс өтті. Аталған мәжіліске алтыншы сайланған Қазақстан Парламенті Мәжілісінің өкілеттіктерін іске асырудың бесінші сессиясына арналған негізгі іс-шаралар жоспарына сәйкес ұйымдастырылды.
Аталмыш жиынға арнайы келген Парламент Мәжілісінің депутаттары, Заңнама және сот-құқықтық реформа комитетінің мүшелері, сондай-ақ Nur Otan партиясы жанындағы Құқықтық кеңестің мүшелері халыққа тиімді түсіндірулер жөнінде кеңесті.
Көшпелі отырыстың алғашқы сөз кезегінде Қазақстан Парламенті Мәжілісінің Заңнама және сот-құқықтық реформа комитетінің төрағасы, Nur Otan партиясы жанындағы Құқықтық кеңесінің төрағасы, заң ғылымдарының докторы, профессор Нұрлан Әбдіров бүгінгі отырыстың мақсаты мен маңызына тоқталды.
– Киелі Түркістан жерінде Мәжілістің тұрақты комитетінің бірі Заңнама және сот-құқықтық реформа комитетінің көшпелі отырысы өтіп жатыр. Былтырғы шілде айынан бастап қолданыстағы халыққа құқықтық көмек көрсету, адвокаттық жұмыстарды нығайту сияқты төңіректегі қабылданған арнайы заң бар. Соның қарапайым халыққа тиімді жұмыс істеп жатқаны жайында жыл ішінде мониторинг өткіздік. Нәтижесінде, жергілікті жерде жұмыс істейтін адвокаттар, жеке сот орындаушылары, нотариустар және осы құқық саласындағы тиесілі қызмет етіп жүрген азаматтардың жұмысына баға бердік. Егер заң тұрғысында орын алған олқылықтар болған болса, соларды пысықтап, сондай-ақ нақты ұсыныстар болса тыңдап, әрі қарай заңды жетілдіру мәселелерін қарастыру. Ал Түркістан облысына келген мақсатымыз – жергілікті жердің тұрғындарымен кездесу, қолдан келгенше көмек көрсету. Келген 14 депутаттың да атқаратын жұмыстары осы бағытта жүрмек. Атап айтқанда, Ордабасы, Сайрам аудандары мен Кентау, Түркістан қалаларының халықтармен пікірлесу және қоғамдық қабылдау өткізу, – деді Нұрлан Әбдіров.
Түркістан облысы әкімінің орынбасары Ұлан Тәжібаев халықтың заң құқықтарын білуде осындай басқосулардың маңызы зор екендігін айтты.
«Бүгінгі Заңнама және сот-құқықтық реформа комитетінің көшпелі отырысы жайында кішігірім сұрақ туындап отыр. Осы заңнаманың аясында жұргізілетін қарым-қатынастар тікелей жүргізіледі. Яғни, азаматтар бір-бірімен немесе мемлекетпен және басқа да құжаттармен танысатын болады. Ал мәселе болып жатса, тек қана заңдар олардың құқығын қорғауға дайын. Бүгінгі таңда көп азаматтар заңдарды білгенімен, бірқатар заңның ережелерін білмейді деп ойлаймыз. Сондықтан мемлекет бұл тұрғыда түрлі шаралар қолданып жатыр. Атап айтқанда, түсіндіру, заңдарды дұрыс қолдану. Жалпы, мемлекеттің ең маңызды бір шарасы, адвокаттар арқылы тегін заң түсіндіру. Қазіргі таңда Түркістан облысы бойынша 131 адвокат қызмет атқарады. Олардың 83 пайызы қоғамдық жұмыстарға қатысып отыр. Осы жылдың 10 айында 4 467 азамат тегін заң көмегіне қол жеткізді. Тұрақты статистикамыз бойынша Түркістан облысы халықтарының саны 2 млн асады. Бұл дегеніміз – қарапайым тұрғындардың заң көмегін алу үшін 16 мыңнан аса маман қажет. Жалпы, заң тұрғысында көмек көрсететін мамандар әлі де жеткіліксіз болып отыр. Өңірде маман тапшылығы орын алып жатыр. Бұл жағдайларды реттеп адвокаттар алқасын ретке келтіру», – деді облыс әкімінің орынбасары.
Көшпелі отырыс барысында білікті заң көмегін көрсету жүйесінің одан әрі дамуы, заң көмегін көрсету саласын жетілдіру аясында заңнамалық жаңалықтардың практикалық маңызы, заң консультанттары институтын одан әрі жетілдіру, білікті заң көмегін көрсету барысында адвокатура мен құқық қорғау органдарының өзара іс-қимыл жасау мәселелері және тағы басқа мәселелер талқыланды.
Көшпелі отырыс нәтижелері бойынша қатысушылар халықты білікті заң көмегімен қамтамасыз ету саласында нақты ұсыныстарды қамтитын ұсынымдар әзірленді.
Түркістан облысы