Түркістан облысы Шардара ауданында 35 жылдан бері құжатсыз жүрген тұрғын куәлік алды. Бұл жайында Түркістан облыстық Полиция департаментінің баспасөз қызметі хабарлады.
Шардара аудандық Полиция бөлімінің Көші-қон қызметі құжатсыз тұрып жатқан азаматтарды анықтап, оларға жеке басын анықтайтын жеке куәліктерін дайындап берген болатын. Соның ішінде азаматтығы жоқ тұрғын Аташ Баянова – осыдан 68 жыл бұрын Өзбекстанда туған. 35 жасында отбасымен бірге Қазақстанға көшіп келген. Алайда отбасылық жағдайына байланысты барлық құжатын жоғалтып, төлқұжатын осы уақытқа дейін алмапты.
Аталған жайтқа байланысты Шардара АПБ-нің қызметкерлері КҚҚТ-мен бірге Аташ Баяноваға қатысты іс-құжаттарын жинақтап, тиісті шараларды жүргізді. Тәртіп сақшылары біршама жұмыстарды тез арада аяқтап, жергілікті тұрғынды ҚР азаматтығы жоқ тұлғаға берілетін куәлігімен құжаттандырды.
