Ұлыбританияда қазақ киносының апталығы ашылды

Қазақ кино апталығының салтанатты ашылуы Лондонның ең танымал кинотеатрларының бірі – Лестер-сквердегі «Vue West End» кинотеатрында өтті. Мәдени іс-шараның ашылуында режиссер Сәбит Құрманбековтың «Оралман» фильмі көрсетілді. Шетелдік көрерменге фильмді белгілі кинодраматург, Қазақстанның еңбек сіңірген қайраткері, картинаның сценарий авторы Нұрлан Санжар ұсынды.

Ұлыбританияда қазақ киносының апталығы ашылды

Салтанатты ашылуында сөз сөйлеген Қазақстанның Ұлыбританиядағы Елшісі Ерлан Ыдырысов кино апталығының бағдарламасы шетелдік көрермендерге отандық кинематографияның байлығы мен жан-жақтылығын ашып, Қазақстанның тарихымен, мәдениеті және дәстүрімен терең танысуға мүмкіндік беретінін атап өтті.

- Көрермен фильмді өте жақсы қабылдады. Көрсетілім кезінде жылағандар да болды. Қазақ киносы сонау Англияда көрсетіліп, халықтың көңілдерінен шығып жатқанына өте қуаныштымын. Осындай мерекелер көп болсын,– деді Нұрлан Санжар.

Көрсетілімнен кейін сценарист Н.Санжар және «Қазақстандағы фильм және бірегейлік: Орталық Азиядағы кеңестік және посткеңестік мәдениет» кітабының авторы, Линкольн университетінің саясаттану доценті доктор Рико Айзекстің қатысуымен пікірталас өтті.

Қазақ киносының апталығы «Рухани жаңғыру»  және «Ұлы даланың жеті қыры» бағдарламаларын жүзеге асыру аясында ҚР Ұлыбританиядағы Елшілігі ҚР Мәдениет және спорт министрлігінің, сондай-ақ Ш.Айманов атындағы «Қазақфильм» АҚ-ның қолдауымен ұйымдастырылды.