Талғарда тау-шаңғы туризмі дамиды

Газет мақаласы Айқын газеті №79

Алматы облысының әкімі Амандық Баталовтың төраға­лы­ғымен өткен инвесторлар­мен кездесу барысында биыл жыл басына пайдалануға беріліп, жарты жылға жетер-жетпес уақыт аралығында тауда шаңғы спортымен шұғылданып, демалғанды жақсы көретіндер мен алыс-жақын шет мемле­кет­терден келген туристердің көңілінен шыққан Талғар ауда­нындағы «Ойқарағай – Лесная сказка» тау-шаңғы кешенін одан ары дамыту жоспары мен қажетті мемлекеттік қолдау шаралары туралы айтылды. Сонымен бірге, жалпы Жетісу өңіріндегі көрікті және тарихи жерлерге апаратын жолдар мәселесі де талқыланды.

Талғарда тау-шаңғы туризмі дамиды

Аз ғана уақытта туристер мен демалушылардың сүйікті орнына айналған тау-шаңғы кешенін дамы­тудың таяу кезеңге жасалған жоспа­ры жайлы инвестор, жоба бастама­шы­сы, Alina компаниялар тобының пре­зи­денті Ерлік Балфанбаев баян­да­ды. Инвестордың айтуына қара­ғанда, өткен жылмен салыстырғанда кешенге келушілер саны бірнеше есеге артып отыр. Қазіргі кезде жаңа аспалы жолдың құрылысы қолға алынған. Қолданыстағы 13 шақырым шаңғы жолына қоса биыл тағы 7 ша­қырымдық осындай трасса жасалып жатыр. Шаңғы кешенінің халыққа жыл он екі ай қыз­мет көрсетуін қамтамасыз ету үшін жа­санды қар жасау жұмысы да жолға қойылып отыр. Осы мақсатта екі су қой­масы, жоғары қысымды трасса салы­нуда. Дегенмен бүгінде қатты байқалып тұрған басты мәселе – ин­фра­құрылым жағынан мемлекет қол­дауының қа­жеттігі. Жүздесу ке­зінде осы мәселеге баса назар аударылды.

Атап айтқанда, «Алматы – Тал­ғар» трассасынан Бесқайнар ауылы­на бұ­рылатын» жол айырығының құ­ры­лы­сы жан-жақты қолдаусыз ке­шеуілдей бе­рері анық. Сол сияқты Байбұлақ ауы­лынан «Тау-Тұран» айырығына дейінгі 1000 және 2000 КВА қосалқы стансасы бар 2 электр жеткізу жүйесі тартылатын Ақ-Тас» шоқысына де­йін­гі аралық та осы қатарда. Бұлардың жобалық-смета­лық құжаттамасы инвес­тордың қаржы­сына дайын­да­лып, мемле­кеттік сарап­та­ма қоры­тын­дысы алынған. Енді осы­­ларды жүзеге асыру керек. Тау-шаңғы ке­шенін газ­дандыру жағы да қолдау күтеді.

Облыс басшысы нысанға газ жет­кізуге көмектесудің мүмкіндігі барлы­ғын айта келе, ішкі газ тарату жүйесін инвестор өз есебінен жүргізуге тиіс екендігін атап өтті. Ал жол құрылысына қажетті қолдау көрсетіледі. Электр жет­кізу жүйесі құрылысы мәселесін зерт­теп, соған сай шешім қабылдау тиісті сала мамандарына тапсырылды.

– Бүгін сөз етіп отырған ірі жо­баның облыстағы тау-шаңғы туризмін дамытудағы маңызы аса зор. Сондық­тан біз қажетті көмек көрсетеміз. Бас­қосу барысында көтерілген мәселелер қосымша зерделенеді, соның ішінде жол құрылысы бойынша да, мүмкін­дігіне қарай жәрдем жасаймыз, – деген Амандық Ғаббасұлы облыс­тық ту­ризм, кәсіпкерлік және индус­тр­иал­ды-инновациялық даму, жолаушы кө­­лігі және автомобиль жолдары бас­қар­маларына аталған бағыттағы жұ­мыс­тарды басты назарға алуды ескертті.

    

Болат АБАҒАН,

Алматы облысы