Жамбылдық өнерпаздар – Жизақта

Газет мақаласы Айқын газеті №86

Биыл – Қазақстанның Өзбекстандағы жылы. Осыған орай, жамбылдық өнерпаздар Өзбекстанның Жизақ облысында болып қайтты. Шара Қазақстанның Тұңғыш Президенті – Елбасы Нұрсұлтан Назарбаевтың 2017 жылдың қыркүйегінде Өзбекстанға жасаған мемлекеттік сапары барысында екі елдің ғасырлар бойы үзілмей келе жатқан мәдени байланысын нығайту мақсатында жамбылдық өнер шеберлерінің «Жамбылдан Жизаққа тарту» атты мәдени іс-шарасы Жизақ облысы Мырзашөл ауданынан бастау алды.

Жамбылдық өнерпаздар –  Жизақта

Мұндағы қазақ халқы шоғыр­лан­ған Гагарин ауылындағы Өзбек-Қазақ мәдениет орталығында салта­натты қарсы алу шарасы өтіп, Жизақ облысы мәдениет басқарма­сы­ның басшысы Камол Фахродов келген қонақтарға ыстық лебізін білдірді. Достық деле­гациясын бастап барған Жам­был облысы әкімдігі мәдениет, архив­тер және құжаттама басқар­ма­сының басшысы Дүйсенәлі Бықыбаев іс-шараның маңызына тоқталып, екі ел арасындағы жүзеге асып жатқан игі бастамалардың жастарды рухтандырып, отаны­на деген сүйіспеншілік пен жауап­кер­шіліктерін арттыратынын нық сенім­мен айтты. К.Әзірбаев атын­дағы Жамбыл облыстық филар­мо­ниясының «Алатау» фольклорлық ансамблі А.Малдыбаевтың «Көне Тараз», Ә.Желдібаевтың «Ерке сылқым» күйлерін орындаса, Д.Басы­қараев пен Д.Байзілдаев күй тартыспен халықты тәнті етті. Мәдениет саласының үздіктері О.Азаматова, Ж.Омаров және Д.Диханбаева халық әндері мен жер­гілікті композиторлардың ән­де­рін нақышына келтіре шыр­қап, Сарысу аудандық «Айжан қыз» халықтық би ансамблі биден шашу шашты. Ал Жуалы аудандық халық театры Бақыт Беделханның «Тағдыр тақтасы» атты А.Әші­мов­тың өмір тарихына құрылған поэтикалық драмасын ұсынды. Жам­былдық өнер шеберлері жи­зақ­тықтарға шеберлік сағаттарын өткізіп, тәжірибе алмас­ты. Мырза­шөл ауданына сая­хат ұйымдасты­ры­лып, жетіс­тік­терімен танысты. Қандас бауырлармен кездесіп, қариялар­дың алғысына бөленіп қайтты. Өз кезегінде Жизақ облысы бойынша Қазақ мәдени орталы­ғының төрағасы Өтеп Сейдаманов­қа Жамбыл облысының атынан сый-сияпат табыс етілді.

Ал облыстық кино орталығы­ның мамандары Ташкент қала­сын­дағы Алишер Науаи атындағы мәдениет сарайында кино күндерін өткізді. Аталған маңызды шараға Өзбекстанның киноиндустрия саласының белгілі мамандары, көп­теген фильмді әлемге таныт­қан тұлғалар арнайы қатысты. Облыстық кино орталығының директоры Сайлаубек Лесбаев Өзбекстанның орталық телеарна­ларына шараның мақсаты мен көрсетілетін фильмдер туралы қысқаша сұхбат беріп, көрермендер «Жаужүрек мың бала», «Біздің қаланың ханзадасы» атты көркем фильм­дері мен «Мұзбалақ» ани­ма­циялық фильмін тамашалады. «Өзбеккино» ұлттық агенттігінде өткізілген баспасөз конферен­ция­сында Облыстық кино орталығы тарапынан түсірілген қысқа­метражды және деректі фильмдерге өзбекстандық мамандар үлкен қызығушылық білдірді. Алдағы уақытта меморандум аясында екі­жақты бірлестік арқылы жобалар жасау келісілді.

Жамбылдық өнерпаздардың Жизақтағы мәдениет күндері Жизақ облыстық музыкалық драма театрында өткен гала концертпен түйінделді. Жизақ облысы әкімінің орынбасары Азиз­бек Эгамбердиев, облыстық мәде­ниет басқармасы­ның басшы­сы Камол Фахродов бауырлас екі ел арасындағы жүзеге асып жатқан игі іс-шаралар ғасырлар бойы үзілмей келе жатқан мәдени байланысты одан ары нығайта түсетініне сенім білдіре отырып, жамбылдық деле­гацияға қасиетті Мекке мен Өзбекстанның ғажайып таби­ға­ты суреттелген сағатын сыйға тартса, Жамбыл облысы әкімдігінің атынан облыс шеберлерінің қолынан шыққан Жамбылдың бейнесі өрнектелген кілемше және «Көне – Тараз» картинасы табыс етілді. К.Әзірбаев атындағы Жамбыл облыстық филармония­сы­ның «Алатау» фольклорлық ансамблі мен Сарысу аудандық «Айжан қыз» халықтық би ансамблі Жизақ жұртшылығына жергілікті және Қазақстан композиторлары­ның күйлері мен әсем әндерін ұсынса, өңірлік айтыскер ақын, республикалық ақындар мен тер­ме­шілер қоғамының мүшесі Дидар Басықараев бауырлас өзбек еліне қазақтың қара домбырасымен ар­науын айтып, көрерменнің көңі­лі­нен шықты. К.Әзірбаев атын­дағы Жамбыл облыстық филармо­ния­сының әншісі, Мәде­ниет саласы­ның үздігі Оңал Азаматова өзбек халқының танымал «Кетма» әнін шырқап, көпшіліктің көңілін көтерді. Соны­мен қатар Қазақстаннан барған де­легация Жизақ облы­сының тарихи-мәдени орындарын тама­ша­лап, Орталық Азиядағы ең ірі және көне шаһар әрі Жібек жолы бойында тұрған ЮНЕСКО-ның әлемдік мұралар тізіміне енгізілген Самарқанд қаласында орналасқан «Регистан» алаңы, Әмір Темір мен Биби Ханым кесенелері, Мырза Ұлық­бек обсерваториясы, «Ша­хин-Зинда» және «Хазірет Қызыр» ме­мо­риалды кешеніне және бірқа­тар ескерт­кішке экскурсия жасады.