Көгілдір отын – ел игілігі үшін

Газет мақаласы Aikyn 115

Nur Otan партиясы Жамбыл облыстық филиалында «Жоғары технологияларды дамыту» бағыты бойынша комиссия отырысы өтті. Онда  Жамбыл облысы бойынша елдімекендерді газдандырудың барысы туралы мәселе қаралды.

Көгілдір отын –  ел игілігі үшін

Жиынға облыстық мәслихат де­путаты Абай Нұржанов жетекшілік етті. Басқосуда облыстың Энергетика және тұрғын үй-коммуналдық шаруашылық басқармасы басшысының орынбасары Құдайберген Қорғанбаев баяндама жасады.

Оның айтуынша, аймақтағы 377 ел­ді­мекеннің 181-і көгілдір отынмен қам­тылған. Ал өңірді газдандыру 48 па­йызды құраған. Дегенмен бүгінгі таңда осы табиғи газбен қамтылған елдіме­кен­дердегі халықтың 11 пайызы әлі күнге оның игілігін көре алмауда. Оған басты себеп – тұрғын үйлердің газ тора­бына қосылу құнының жоғары­лығы. Қазіргі таңда оның құнын арзандату жолдары қарастырылып жатыр екен. Бұл мақсатта «Жамбыл-жылу» және «Теміржол-жылу» кәсіпорындарынан мамандандырылған арнайы бөлім құрылып, лицензия алған олар тұрғын үйлерге газ тарту жұмыста­рын бастап та кетіпті. Мәселен, басқа кәсіп­орындар­дың жеке тұрғын үйді газ торабына қосу қызметі 140-150 мың теңгені құраса, жаңа ашылған мекемелер оны 85 мың теңгеден қосуда. Бұдан бөлек, өткен жылы Талас пен Сарысу аудандарында жалпы құны 4,8 миллиард теңгені құ­райтын, ұзындығы 128,4 ша­қырымдық газ құбыры жүргізілсе, Т.Рыс­құлов ауданындағы «Арай» тұрғын алқабын газдандыру жұмысы екі жылдан бері жүргізіліп келеді. Сонымен қатар Тараз қаласындағы газ тарату құбырларын жаңғырту жұмыстары аясында 68 ша­қырым жерасты газ құбыры ауыс­ты­рылып, 2 289 жеке шкафтық есеп­те­гіш пункт орнатылды және 5 757 тұ­тынушы жер асты құбырына қосылған. Өткен жы­лы дайындалған 11 жобалық-смета­лық құжаттамаға сәйкес облыстық бюд­жеттен 525 миллиард теңге бөлініп, газ­дан­дыруға Байзақ ауданы –21, Жам­был – 13, Жуалы – 15, Талас – 3, Сарысу – 14, Шу ауданында 18 ел­ді­мекен енген бо­латын. Биыл осы жобаға енген 7 ны­санның құрылыс жұ­мыстары басталып, оған 6,3 миллиард теңге бөлі­ніп отыр. Жыл соңына қарай газдан­ды­рылған елдімекен санын 190-ға жеткізу жос­парлануда.

– Бұған дейін ауыл ішіне газ та­ра­татын және үйдегі құралдарды газға қосу құны облыстың кейбір жерлерінде 475-570 мың теңгені құраған еді. Мұны реттеу үшін басқарма екі кәсіпорынға арнайы лицензия алып беріп, бағаны 300 мың теңгеге дейін төмендетіп отыр. Осының арқасында қазір облыс орта­лығының Шөлдала, Шалғай-Қарасу алқаптарында басқа мердігерлер біз белгілеген бағамен жұмыс істеуде. Жыл соңына дейін Тараз қаласында 2 тұрғын алқабы, Таласта – 5, Сарысуда – 4, Бай­зақ ауданында 5 елдімекен газдан­дырылмақ. Бұл жо­балар құ­рылыспен толық іске асқан кезде облыс­тағы газ­дан­дырылған елдімекен саны 274-ке же­тіп, үлесі 73 пайызға дейін кө­теріледі, – деді Құдайберген Қорғанбаев.

Комиссия отырысында елді­ме­кендерді газдандыру мәселесі жан-жақты қаралып, өзге де мәселелер көп­шіліктің талқылауына түсті. Жалпы, пар­тиялық бақылау комиссиясының жұ­мысы барысында бірқатар кем­шіліктің орын алғаны анықталып, оны түзету туралы ұсыныстар айтылып, қаулы қабылданды.

 

Жамбыл облысы