Арысты асарлатып жаңғыртады

Газет мақаласы "Айқын" газеті №102

Арыс қаласының тұрғын үй қоры мен инфрақұрылымы бір айдың ішінде қалпына келтіріледі. Бұл туралы Үкімет басшысы Асқар Мамин мәлімдеді. Ел Президенті Қасым-Жомарт Тоқаевтың тапсырмасы бойынша Арысқа барып, Үкіметтік комиссияға басшылық еткен Премьер қаладағы төтенше жағдайдан зардап шеккен шағынаудандар мен әлеуметтік нысандарды аралады.

Арысты асарлатып жаңғыртады

Үкімет жетекшісі көппәтерлі және жеке үйлер орналасқан «Көктем-1» және «Көктем-2» тұрғын үй алаптарында болды, жергілікті мектептің, қалалық аурухананың және халыққа қыз­мет көрсету орталығының қира­ған ғимараттарын көрді.

Премьер-министрге тұрғын үйлік, әлеуметтік, инфрақұры­лымдық және қаланың тіршілік әрекетінің басқа да нысандарына қандай зардап келтірілгені баян­далды. Аралау кезінде А.Мамин жергілікті ақсақалдармен және төтенше оқиға салдарын жоюға тікелей атсалысқан мамандармен әңгімелесті. Олардың қатарына саперлер, медицина қызметкер­лері, құтқарушылар мен жергілікті билік органдары бар. Үкімет басшысы оларға атқарған жұ­мыстары үшін алғыс айтты.

– Бірлескен үйлесімді жұ­мыс­тың арқасында тұрғындарды уақ­тылы эвакуациялау, туындаған төтенше жағдайдың анағұрлым ауқымды салдарға соқтыруы­ның алдын алу мүмкін болды, – деді Премьер.

Аралап көру қорытындысы бо­йынша Асқар Мамин Арыс қаласында төтенше жағдайлар салдарын жою жөніндегі үкіметтік комиссия отырысын өткізді. Оның құрамына министрліктер мен облыстық әкімдіктердің басшылары кірді.

Қазіргі ахуал, төтенше жағдай салдарын жою бағытында қабыл­данып жатқан шаралар туралы Қорғаныс министрі Н.Ермекбаев, Ішкі істер министрі Е.Тұрғым­баев, Денсаулық сақтау министрі Е.Біртанов, Еңбек және халықты әлеуметтік қорғау министрі
Б.Сапарбаев, Білім және ғылым министрі А.Аймағамбетов, Эко­логия, геология және табиғи ресурстар министрі М.Мырза­ғалиев, Түркістан облысының әкімі Ө.Шөкеев және Павлодар облысының әкімі Б.Бақауов баяндады.

Хабарланғандай, бүгінде қала аумағын минадан арылту, инже­нерлік барлау жұмыстары жал­ғасуда. Өрт сөндіру есептоптары ары қарай қимылдауда. Аза­мат­тарды өз үйлеріне қайтару және олардың мал-мүлкінің қорғалуын қамтамасыз ету бойынша шаралар қабылданып жатыр. Аумақтарға жүргізілген тексерулер эколо­гиялық жағдайға қауіп төніп тұрмағанын көрсеткен көрінеді.

– Елбасы мен Мемлекет бас­шысы қаланы шұғыл түрде қал­пына келтіруді тапсырды. Арыс қаласын жедел қалпына келтіру үшін бүкіл күш-жігерімізді жұ­мылдыруымыз қажет. Арыс қала­сындағы барлық бүлінген және бұзылған нысанды 2019 жылдың 1 тамызына дейін жөндеп, салуы тиіс. Барлық міндет ұтымды, сапалы әрі мерзімінде орындалуы шарт, – деді Премьер-министр.

Қаланы қалпына келтіруге еліміздің барлық өңірі қатысады. Бұзылған тұрғын үй ғимараттарын жөнге келтіру ісін облыстар өзара бөліп алады. Құрылыс бригада­ларын да солар жіберуге міндет­теледі. Осы мақсатта құрылыс жұмыстарын ұйымдастыру үшін Арысқа барлық облыс, Нұр-Сұл­тан және Алматы қалалары әкім­дерінің орынбасарлары келді. Мемлекеттік материалдық ре­зерв­тен қажетті құрылыс мат­е­риалдары жеткізілуде.

Кеңес қорытындысы бойын­ша Үкімет басшысы А.Мамин қаланың қалыпты тіршілігін жолға қою және оның әлеуметтік-экономикалық дамуын қамта­масыз ету жөніндегі 10 кешенді шараны жария етті. Біріншіден, 1 ай ішінде қаладағы барлық тұрғын үйді жөндеу аяқталмақ. Екіншіден, қосымша әлеуметтік қолдау шарасы ретінде қаланың әрбір тұрғынына, яғни 44 781 адамға 100 мың теңгеден бір реттік өтемақы төленеді.

Үшіншіден, арыстық 4 мың бала сауықтыру лагерьлеріне жі­­беріледі. Төртіншіден, ұлттық ком­­паниялардың есебінен қала­дағы жарылыс кезінде бұзылған ғана емес, мұның сыртында то­зығы жете бастаған әлеуметтік нысан­дарды да жөндеу көзделген. Осы құрылыс жұмыстарына ірі өнер­кәсіптік кәсіпорындар мен бизнес қауымдастық та тарты­ла­тын болады. 66 әлеуметтік ны­сан­ды «Самұрық-Қазына» ұлттық әл-ауқат қоры бір өзі жөндеп береді.

Бесіншіден, бизнестің әлеу­меттік жауапкершілігі аясында арыстық 300-ден астам шағын және орта кәсіпкердің кәсіпо­р­нына «Атамекен» ҰКП арқылы ірі бизнес қаражаты есебінен қал­пына келтіру және жөндеу жұ­мыстарында көмек көрсетіледі. Алтыншыдан, қала кәсіпкер­леріне биылғы 1 шілдеден бастап 5 миллион теңгеге дейінгі мөл­шерде жеңілдікті несиелер бері­леді. Бұдан бөлек, оларға 2019 жылдың соңына дейін са­лықтық каникулдар ұсынылады.

Жетіншіден, инженерлік инфрақұрылым, электрмен жаб­дықтау және байланыс жүйелері Үкімет резервінің қаражаты есебінен қалпына келтіріледі. Се­гізіншіден, газ және сумен жаб­дықтау жүйелерін жаңғырту және реконструкциялау жоспарланған. Тоғызыншыдан, медициналық қызмет көрсету сапасын арттыру мақсатында қала тұрғындарына арналған жаңа аурухана мен 2 емхана тұрғызылады. Онын­шыдан, 2 апта ішінде қару-жарақ­тарды әкету басталады. Арсенал бас­қа жерге қайта орналас­ты­рылады.

Алдын ала бағалаулар бо­йынша, Арыста 104 көпқабатты тұрғын үй, 7 200-ге жуық жеке үй, 14 мектеп, 2 аурухана, 28 бала­бақша, аумақтық мемлекеттік орган ғимараттары бүлінген екен.