Сенат жұмысын түйіндеді

Газет мақаласы "Айқын" газеті №104

Сенат басшысы Дариға Назарбаеваның төрағалығымен Жоғарғы палатаның сессияжабар отырысы өтті. Онда сенаторлардың 4-сессиядағы жұмысын қорытындылаған Д.Назарбаева өткен жылдың қыркүйегінен бері депутаттар  халқымызбен бірге Қазақстан мемлекеті үшін аса жауапты әрі тарихи оқиғалардың, тағдырлы шешімдердің куәсі болғанын еске салды.

Сенат жұмысын түйіндеді

Сенаттың жұмысы қарқынды әрі нәтижелі болды: бір сессияда ғана 83 маңызды заң жобасы пысықталып, қабылданған. Олар мемлекеттің әлеуметтік мін­дет­темелерін орындауға, эконо­ми­каның жекелеген секторларындағы жағдайды жақсартуға бағытталды.

– Елбасының «Қазақстан­дық­тардың әл-ауқатының өсуі: табыс пен тұрмыс сапасын арттыру» Жол­дауын іске асыруды заңнама­лық қамтамасыз ету Сенаттың күн тәртібінің негізгі бағыты болды. Ағымдағы сессияда сенаторлар Үкіметке жүзден астам депутаттық сауал жолдады. Өткір сауалдар арқылы елімізде шешімін таппай жүрген мәселелерге тиісті мемор­гандардың назарын аударып, оларды шешу жолдарын көрсете білді. Қажет болса, болашақта сауалға жауап беретін лауазымды тұлғаны Сенатқа шақырып, пікір алмасамыз, – деді Жо­ғарғы палата төрағасы.

Осы сессия барысында депу­таттар өңірлерді екі рет ара­лап қайтты. Тұрақты коми­тет­тер аймақтарда бірқатар көшпелі отырыстарын өткізді.

– Мемлекеттік бағдарламалар және Парламент қабылдаған заң­дардың орындалуы де­пу­таттардың ұдайы бақылауында болды. Сенатта мәслихат хатшыларымен арнайы кездесу ұйымдастырылды. Алдағы уақытта осыған жауапты кеңес жергілікті өзін-өзі басқаруды жетілдіру және өңірлік дамудың өзекті мәселелері бойынша тұрақ­ты жұмыс жүргізеді. Сонымен қа­тар Сенаттағы «Өңір» депутат­тық тобы­ның белсенді жұмысын атап өткен жөн. Әріптестеріміздің ұсынысы бойынша жаңа консуль­тативтік-кеңесші орган – «Бюджет заңна­ма­сын жетілдіру жөніндегі кеңес» құ­рылды. Онда бюджет қаражатын тиімсіз пайдаланғаны үшін жауап­кершілікті күшейтуге, Есеп коми­тетінің рөлін нығайтуға қатысты бірқатар ұсыныстар ай­тылды. Біз осы бағыттағы жұмысты күзгі сес­сияда белсенді түрде жалғасты­ра­мыз, – деді Дариға Назарбаева.

Сенат жанында заң шығару процесін жетілдіру кеңесі де құ­рылды. Күзде осы мәселеге арнал­ған парламенттік тыңдау өткізу жоспарланып отыр.

– Жалпы алғанда, мемлекеттің қоғамдық-саяси және әлеуметтік-экономикалық өмірінің жаңа кезеңін заңнамалық қамтамасыз ету бойынша тыңғылықты жұмыс атқарылды деп айта аламыз. Осы орайда баршаңызға белсенді әрі нәтижелі қызметтеріңіз үшін ризашылығымды білдіремін, – деді палата басшысы.

Ол осы уақыт ішіндегі маңыз­ды саяси оқиға қатарында 9 мау­сым­да Қазақстанда Президент сай­ла­уы­ның өтуін және онда Қасым-Жо­март Тоқаевтың жеңіске жетуін атады. Қ.Тоқаев қызметке кірісу рә­сімінде сөйлеген сөзінде өзі жүр­гізетін саясаттың он бағытын тұ­жы­рымдады. Д.Назарбаеваның бай­ламынша, бұл бағыттардың әр­қайсысы Парламенттің маз­мұнды қызмет атқаруы қажетін білдіреді.

– Біріншіден, Президент тапсырмаларын ескере отырып, 2019 жылға арналған Сенаттың жұ­мыс жоспарын түзету керек. Қа­жет болса, заң жобаларын әзір­леу мен қабылдауға бастама жа­салуы тиіс. Екіншіден, заңдар­дың орында­луын қадағалау үшін Үкі­мет мү­шелерінің өз қызметі ту­ралы есеп­терін тыңдау рәсім­де­рін толық кө­лемде пайда­ланған, өзекті және резонанстық мәселе­лер бойынша парламенттік тың­дауды жиі өткіз­ген жөн. Үшін­ші­ден, аймақтармен жүйелі негізде маңызды мәселелер бойынша жұ­­мыс жүргізген абзал. Сенатор­лар­ға аймақтарды аралап, жергі­лікті мәс­лихаттармен және қоғам­дық ұйым­дармен жұмыс істеуді жос­парлау керек, – деді Жоғарғы палата төрағасы.

Төртіншіден, Сенат өз қызме­тін барынша жария және ашық түрде жүзеге асыруға ниетті. Бұл жұмыс қазірдің өзінде жүріп жа­тыр. Сенаттың веб-сайты жаңар­тылды. Күзден бастап заңнамалық және жұмыс материалдары да сонда қолжетімді болады.

Бесіншіден, қабылданған заң­дардың сапасын арттыру үшін Се­натта ауқымды «сарапшылар пулын» құру көзделген. Заңдарды талқылау, қабылдау кезінде ғылы­ми қоғамдастықтың, жастар мен гендерлік ұйымдардың, еріктілер қозғалыстарының, үкіметтік емес ұйымдардың және кәсіпкерлердің пікірлерін ескеруге мән беріледі.

Бюро шешімімен Сенат жа­нында Парламентаризмді дамыту жөніндегі кеңес құрылды, оған бұрынғы және қазіргі сенаторлар, көрнекті саяси және мемлекет қайраткерлері шақырылады.

– Біз олармен, яғни білімі мен тәжірибесі мол азаматтармен бай­ланысты үзбеуіміз қажет. Маусым айының басында Сенатта сөйлеген сөзінде Елбасы: «Біз бәріміз бір миссияны – елдің игілігі үшін қыз­мет етуді жүзеге асырып жүр­міз» деді. Біздің Құрметті сена­тор­мен кездесуге, кеңес алуға және палата отырыстарына қатысуға шақыруға мүмкіндігіміз бар. Біз үшін бұл үлкен құрмет пен жауап­кершілік, – деді Д.Назарбаева.

Ол сессия жұмысы аяқталға­нымен, депутаттардың қызметі жал­­ғасатынын қаперге салды. Се­на­торлар алдында жазғы парла­мент­тік каникул кезеңінде өңір­лер­де жергілікті тұрғындармен кез­­десіп, жаңа ой-пікірлер, сын­дарлы ұсыныстар жинақтау міндеті тұр.

Жиында журналист Айгүл Қапбарова сенатор атанып, ант қабылдады.

Сондай-ақ Жоғарғы пала­та­ның бір топ депутатына ТМД Пар­ламентаралық ассамблеясының жоғарғы марапаты тапсырылды.