Үкімет басшысы тауар бағасын арзандатуға негіз барын айтты

Үкімет басшысы Асқар Маминнің төрағалығымен жиын өтіп, онда қаңтар-мамыр айларында жалпы ішкі өнімнің өсімі өткен жылға қарағанда 4% құрағаны айтылды. Премьер экономикалық даму қарқынын арттыру бойынша шаралар қабылдауды ары қарай жалғастыруды тапсырды.

Үкімет басшысы тауар бағасын арзандатуға негіз барын айтты

Экономиканың негізгі қозғаушы күштері  құрылыстың 8,8%-ға, сауданың 7,5%-ға, көлік саласының 5,3%-ға, өңдеуші сектор, оның ішінде машина жасаудың 16%-ға, автоөнеркәсіптің  46,4%-ға өсуі жалпы ішкі өнімнің өсіміне әсер етті.

Осы жылдың 5 айының қорытындысы бойынша әлеуметтік-экономикалық даму бойынша Ақмола, Павлодар, Шығыс Қазақстан, Қостанай, Түркістан облыстарының оң жұмысы байқалды.

Премьер-Министр А. Мамин өңірлер әкімдеріне құрылыс, инвестициялар, өнеркәсіп және тұрғын үйді пайдалануға беру салаларында көрсеткіштердің өсуін қамтамасыз ету бойынша шараларды күшейтуді тапсырды.

Биылғы мамырда айлық инфляция 0,6% құрады.  Осылайша, жыл басынан бері инфляция 2,4% құрады. ҚР Үкіметінің басшысы белгіленген дәлізге (4–6%) сәйкестігіне қарамастан, бірқатар өңірлерде ауыл шаруашылығы тауарларына бағаның өсуі байқалғанын айтты.

– Қазір жеміс-жидек пен көкөністердің көп уақыты, сондықтан бағалар арзандауы керек, – деді Асқар Мамин. – Әкімдер, әсіресе, әлеуметтік маңызы бар азық-түлік тауарларының бағасын тұрақты ұстау бойынша нақты шаралар қабылдасын.

Республикалық бюджеттің орындалуы бойынша конкурстық рәсімдерді уақытылы өткізу бойынша күшейтілген жұмыстарды жалғастыру қажеттігі атап өтілді. Бұл бюджет қаражатын игеру бойынша тәуекелдерді жоюға мүмкіндік береді.

Мәселені қорытындылаған ҚР Премьер-Министрі Асқар Мамин Қазақстан Республикасының Тұнғыш Президенті – Елбасы Нұрсұлтан Назарбаевтың стратегиялық бағдарын және Мемлекет басшысы Қасым-Жомарт Тоқаевтың сайлауалды бағдарламасының толығымен жүзеге асырылуын қамтамасыз етудің маңыздылығын атап өтті. Бұл экономиканың және инфрақұрылымның тұрақты дамуы, қолжетімді баспанамен қамтамасыз ету, сонымен қатар білім беру, денсаулық сақтау мәселесін жақсарту арқылы халықтың табысын және тұрмыс сапасын арттыру. Мемлекет басшысының сайлауалды тұғырнамасының стратегиялық міндеттерін тиімді жүзеге асырудың арқасында әлеуметтік мәселелерді шешуге мүмкіндік жасалады.

– Жаңа жұмыс орындарын ашу – Үкімет жұмысының басты міндеті, – деп А. Мамин, нәтижелі жұмыспен қамту мәселелері экономиканың дамуына, тұрғындардың табысын арттыруға, бәсекелі өндірістердің ашылуына тікелей байланысты екенін атап өтті. – Барлық әкімдер және мемлекеттік органдардың басшылары инвестициялар тартуға, шағын және орта бизнестің дамуына барынша көңіл бөлуі керек.  Бұл жұмысты үздіксіз жүргізу қажет.