Түркістан жұртшылығы Жолдаудың басым бағыттарын талқылады

Түркістан облысы Жастар ресурстық орталығында «ҚР Президенті Қ.Тоқаевтың халыққа Жолдауы: әлеуметтік және қоғамдық жаңару бағыты» тақырыбына дөңгелек үстел өтті,– деп хабарлайды Түркістан облысы әкімінің баспасөз қызметі.

Түркістан жұртшылығы Жолдаудың басым бағыттарын талқылады

Еуразиялық интеграция институты мен Түркістан облысы әкімдігінің қоғамдық даму басқармасы бірлесіп ұйымдастырған «дөңгелек үстелдің» мақсаты – Президент Қ.Тоқаевтың Жолдауда ұсынған басым міндеттерін талқылау. Жиынға жоғары білім жүйесінің, ардагерлер кеңесінің өкілдері, жастар мен кәсіпкерлер қатысты.

Іс-шараның модераторы, саясаттанушы Ерлан Саиров Ел Президентінің Жолдауы елдегі әлеуметтік-саяси процестердің негізгі элементі және қоғамдық болмысты байыппен жаңарту контуры екенін атап өтті.

«Президент Жолдауы еліміздегі әлеуметтік-саяси процестердің және қоғамдық сананы жаңғыртудың базалық элементі. Мемлекет пен азаматтар арасында байланыстың жаңа форматы, тұрғындармен кері байланыстың жаңа механизмдері қажет. Бұл ретте жастар қауымы ең белсенді әрі негізгі күш екені даусыз. Жолдауда әлеуметтік мәселелермен қатар қоғамдық-саяси үрдістерді жаңғырту, қоғаммен билік арасында диалог орнату мәселелері қамтылған. Өзгеріссіз бірде-бір қоғам немесе мемлекет дами алмайды. Сондықтан біз қоғамдағы жаңа өзгерістерге, даму процестеріне дайын болуымыз керек. Ол үшін ұлттың санасын көтере отырып, жаңа әлеуметтік стандардтарды жасаған абзал»,– деген саясаттанушы жаңа дәуірі басталған Түркістан облысы мен Түркістан қаласының ірі орталыққа айналатынына сенім білдірді.

Түркістан қалалық ардагерлер кеңесінің төрағасы Ж.Құлбайымбетов Президент Жолдауы саяси маусымды ашып бергенін айтты. Оның айтуынша, Жолдауда қоғамдағы ең маңызды әрі өзекті мәселелер түгел қамтылған.

Түрлі санаттағы азаматтардың пікірлерінен Президенттің алғашқы Жолдауы жоғары білім жүйесі өкілдерінің ғана емес, жастар арасында да зор қызығушылық тудырғанын аңғарылды. Сөз сөйлеушілер Жолдауға деген қызығушылығын ондағы айтылған стратегиялық, экономикалық, саяси даму векторларымен қатар, орталық пен өңірлерде жиналып қалған көкейтесті проблемаларға ерекше көңіл бөлінуімен түсіндірді.

«Түркістан облысының жастары Мемлекет Басшысының Жолдауындағы әлеуметтік және саяси бастамаларды қызығушылықпен қабылдады және осы бағыттағы жұмыстарды жүзеге асыруға атсалысады. Жолдауды талқылап қана қоймай, нақты іске көшу керек», – дейді жиынға қатысушылар.

Басқосуда демография, әлеуметтік көмек, саяси либерализация, адам капиталын дамыту, қазақ халқын кәсіпкерлікке бейімдеу және өзге де мәселелер сөз болды.