Ауыр қылмыстарға жаза қатайтылады

Газет мақаласы "Айқын" газеті №136

Мәжіліс ел Президентінің Жолдауында қойылған міндеттермен үндес жаңа заң жобалары бойынша жұмысқа кірісті. Нұрлан Нығматулиннің төрағалығымен палатаның жаңа V парламенттік сессиядағы алғашқы жалпы отырысы өтті. Күн тәртібіндегі мәселелерді талқылар алдында сөз алған Мәжіліс төрағасы Мемлекет басшысының сессия ашылуы рәсімінде жария еткен Жолдауындағы негізгі бағыттарға депутаттар назарын аудартты.  

Ауыр қылмыстарға жаза қатайтылады

– Президент Қасым-Жо­март Тоқаевтың Жолдауында белгі­ленген нақты міндеттер заң шы­ғарушылық өрістегі жұмыс­тардың да негізгі ба­сымдық­тарын айқындайды. Мәжіліс депутаттары Жол­дау­ды сапалы заңнамалық қам­тамасыз ету үшін өз жұмысын күшейтуі қажет. Жаңа сессия­да халыққа қажетті заңдар қабылдайтын боламыз. Осы­ның барлығы, сөзсіз, Елбасы Нұрсұлтан Назарбаев негізін қалаған даму стратегиясын ары қарай іске асыру үшін тиімді ұстынға ай­налады, – деді палата спикері.

Осы жауапты міндетті абы­роймен атқару үшін бүгіннен бастап белсене іске кірісу қа­жетін еске салған Н.Нығма­тулин, әсіресе, экономиканы жаңғыртуға, әлеуметтік ахуалды жақсартуға, бюджет және салық жүйелерін жетіл­діруге, азаматтардың құқық­тары мен бостандықтарын қорғауға, шағын және орта бизнесті қолдауға, экология­лық мәселелерге ерекше көңіл бөлінетінін атап өтті.

Бұған қоса, Мәжіліс Үкі­метпен және Есеп комитетімен тізе қоса отырып, бюджет қар­жыларының өз орнына ұтым­ды жұмсалуына қол жеткізуі керек.

Палата басшысының бай­ла­мынша, депутаттық корпус сондай-ақ мемлекеттік сатып алу үдерісін ретке келтіруге баса мән береді. Сот және құ­қық қорғау жүйелерін рефор­малауға заңнамалық қолдау көрсетеді. Парламентшілер адам зорлау, педофилия, есірт­кі тарату, адам саудасы және басқа да ауыр қылмыстар, сонымен қатар браконьерлік үшін жазаны заң жүзінде қатайтатын болады.

– Президент бізге Үкімет­пен бірлесіп, жер ресурстарын тиімді пайдалану тетігін әзірлеу міндетін қойды. Бұдан бөлек, цифрлы экономиканы, отандық ақпараттық-комму­никациялық инфрақұры­лымды дамытуға бағытталған заң қабылдауға тиіспіз. Бізді Экологиялық кодекстің жаңа редакциясын даярлау жұмы­сы күтіп тұр, – деді Нұрлан Зайроллаұлы.

Сонымен бірге, ол Мә­жі­ліс­тің бүкіл заң шығарушы жұ­мысы одан ары да жариялылық режимде, азаматтық қоғам мен ақпарат құралдары өкіл­де­рі­мен өзара ынтымақ­тас­тық­та жүргізілетінін мәлімдеді.

Н.Нығматулин осы сессия­дан бастап Мәжілістің ресми сайтында бұрынғыдай тек палатаның жалпы отырысы ғана емес, сондай-ақ жұмыс топтарының, комитеттердің отырыстары да, қоғамдық маңызды жаңа заң жобала­ры­ның тұсаукесерлері де онлайн режимде, тікелей тараты­латынын хабарлады.

– Алдымызда үлкен, сал­мақты міндеттер тұр. Біз олар­мен жедел түрде айналысуға тиіспіз! – деп нықтады палата спикері.

Күн тәртібіне сәйкес, жал­пы отырыста Мәжіліс депутат­тары Үкімет әзірлеп, енгізген 18 жаңа заң жобасын жұмысқа қабылдап алды. Олардың кө­теретін мәселелері негізінен Президенттің жаңа басым­дықтарымен үндес келеді. Олардың қатарында «Астана» халықаралық қаржы орта­лығы туралы» конститу­ция­лық заңға түзетулер, Ұлттық қордан алдағы үш жылдағы ке­пілдендірілген транс­ферт­тер, өңірлік бюджеттерге жал­пы сипаттағы трансферт­тер­дің көлемі және 2020-2022 жыл­дарға арналған рес­публика­лық бюджет туралы заң жоба­лары бар. Сондай-ақ «Педагог мәртебесі туралы» және оған ілеспе заң жобасы, еңбек, ту­ристік қызмет мәселелеріне қатысты түзетулер және қыл­мыстық жолмен алынған кі­рістерді заңдастыруға, тер­ро­ризмді қаржыландыруға қар­сы іс-қимыл мәселелері бо­йынша түзетулерге қатысты қорытынды әзірлеу мерзімі белгіленді.

Жалпы отырыста Мәжіліс депутаттары Бақтияр Мәкен­нің, Гүлнар Иқсанованың өкі­леттігін мерзімінен бұрын тоқтату туралы қаулы қабыл­данды. Ал партиялық тізіммен Nur Otan атынан жаңадан сай­ланған депутаттар Г.Әбді­қалықова, Н.Әшімбетов және Ж.Омарбекова ант берді. Бұл ретте Гүлшара Наушақызы Мә­жіліс төрағасының ұсыны­сымен Әлеуметтік-мәдени даму комитетінің төрайымы болып сайланды.