Балалар мерекесіне – республикалық шеру

Білім және ғылым министрлігі бүкіл Қазақстан бойынша өтетін балалар­дың және жастардың музыкалық оркестрлері мен ансамбльдерінің респуб­ликалық парадына қызу әзірленуде.

Балалар мерекесіне –  республикалық шеру

БҒМ дерегінше, барлық өңірлерде шеру өткізуге дайындық үшін арнайы жұмыс топтары құ­рылды. Мерекелік шара дайынды­ғын үйлестіруші жауапты мамандар анықталды, режиссерлер бел­гіленді, сондай-ақ парад жүре­тін бағыттар түзіліп, жергілікті ат­қа­рушы органдармен келісілген.

– Биыл шеру тек облыс орталық­тары мен республикалық ма­ңызы бар қалаларда ғана ұйым­дастырылады. Парад 1 маусым кү­ні еліміздің барлық дерлік аймағында қатар басталады: яғни, сағат 10.00-де бастау алады. Тек бірқатар өңірлерде, атап айтқанда, Қызылорда, Шымкент, Түркістан, Талдықорған, Тараз, Атырау және Ақтауда бұл күні ауа температурасының ысуына байланысты 1 маусым күні сағат 9.00-де басталады, – деп хабарлады Білім және ғылым министрлігі.

Ведомство жергілікті атқарушы органдардың мәліметіне сілтеме жасай отырып, шеруге 2,5 мың білім беру ұйымының 98 309 оқушысы, студенттері, педагогтары мен ата-аналары қатысатынын мәлімдеді.

Парадқа қатысушылардың ең көп саны Қызылорда (8,5 мың адам), Ақтөбе (7 929 адам), Нұр-Сұлтан (7 830 адам), Қарағанды (7,5 мың адам), Ақтау және Павлодар (7 мың адамнан) қалаларында тіркелген.

Шеруге қатысушылардың негізгі ұстынын 780 черлидерлер мен мажореткалар командасы, 534 қазақ және орыс халық аспаптары ансамблі, 136 барабаншылар отряды, 91 үрмелі оркестр, хор және би ұжымдары, сондай-ақ жалпы қарасы 266 команда болатын кадеттер, спортшылар, педагогтар құрамақ.

Парадқа қатысушылардың қауіпсіздігін, сонымен қатар олар­ды медициналық сүйемелдеуді және сумен қамтамасыз етуді жергілікті атқарушы органдар өз жауапкершілігіне алыпты.