Business Insider порталы қазіргі заманның үздік 15 боксшысын анықтады. Портал тізім жасарда басты үш критерийді негізге алды. Рейтинг бойынша Сауль Альварес әлемнің үздік бокшысы атанды.
Сауль Альварес 53 жеңіс (36 нокаут), бір жеңіліс және екі тең нәтижемен үздіктер көшін бастады. Украиналық Василий Ломаченко екінші орынға тұрақтады. Оның еншісінде 14 жеңіс (10 нокаут) және бір жеңіліс бар. Үшінші орын аса ауыр салмақтағы Александр Усикке бұйырды. Бірде-бір рет жеңілмеген ол барлығы 17 рет (13 нокаут) жекпе-жек өткізген. Орта салмақтағы IBF және IBO нұсқалары бойынша Әлем чемпионы Геннадий Головкин 9-орынға табан тіреді. Қазақстандық боксшы карьерасында 40 жеңіс (35 нокаут), бір жеңіліс және бір тең нәтиже көрсеткен.
Даңқты боксшының рейтингтегі орнына 2017 жылы Сауль Альвареске қарсы өткен жекпе-жегі әсер етті. Өйткені бұдан бұрын түзілген рейтингтерде Головкин алдыңғы қатардан көрінетін. Мансабын әуесқой бокстан бастаған ол кәсіпқой бокста әлемнің мен деген боксшыларының тізіміне енді. Әлемге Big Drama Show сөзімен танылған боксшы Канеломен екі рет кездесу өткізген соң, түзілімдегі орны алма-кезек ауысты. Мысалы, 2019 жылы WBA (Бүкіләлемдік бокс қауымдастығы) жаңартқан рейтингте орта салмақтағы 15 үздіктің тізіміне кірмеді.
Назарларыңызға 2019 жылы Prosports.kz жарияланған бірнеше рейтингті ұсынамыз. The Ring пен BoxRec қорытынды есебі бойынша Геннадий Головкин 4-орында тұр. The Ring қазақстандық боксшыға Сауль Альварестен кейінгі 2-орынды берген. WBC пен IBF Головкинді орта салмақтағы үздік боксшы деп белгілепті.
Иә, спорт тарихы мен жанкүйер жеңілісті кешірмейді. Головкин мен Альварес жұдырықтасқан бокс кеші талайды әлекке салды. Әлемдік БАҚ пен әлеуметтік желіде әлі күнге аталған кездесудің нәтижесі туралы кереғар пікір жарияланады. GGG мен Канело арасында үшінші жекпе-жекті өткізу туралы бірнеше келіссөз болды. Алғашқыда 2019 жылдың мамырына белгіленген кездесуді WBC тарапы қабылдамады. Өз кезегінде Альварес үшінші жекпе-жектің міндетті түрде өтетінін мәлімдеді. Өзінің тек мықтылармен қолғап түйістіргісі келетінін, келесі кездесуде Головкинді нокаутқа түсіруге қауқары жетерін айтты. Демек, көпшілік күткен кездесудің болары анық. Тек қос тарап қаржы жағы мен өтетін орнын айқындауы, WBC оң қабақ танытуы керек.
Головкин мен Альварес өзара жұдырықтаспаса да, 2019 жылы шаршы алаңға шықты. Геннадий 8 маусымда Стив Ролска қарсы жекпе-жек өткізіп, канадалық боскшыны нокаутқа түсірді. Украиналық боксшы Сергей Деревянченкомен өткен кездесуінде орта салмақтағы Әлем чемпионы белбеуін қайтарып алды. Ал Сауль Альварес 4 мамыр күні Дэниел Джейкобспен, 2 қарашада Сергей Ковалевпен қолғап түйістіріп, жеңіске жетті.
Айзат АЙДАРҚЫЗЫ