Биыл ұлы ақын, ағартушы Абай Құнанбайұлының туғанына – 175 жыл. Мемлекет басшысы Қасым-Жомарт Тоқаев мерейтойды жоғары деңгейде мерекелеу Жарлығына қол қойғаны баршамызға мәлім.
Ал Абай Құнанбайұлының 175 жылдық мерейтойына туған өлкесі Семей қаласы дайындықты бастап кетті.
– Біз өңірлерге ұсыныстар айтып отырмыз. Біріншіден, еңселі жаңа көпірді жарықтандыруымыз керек. Нысан жаңа кейіпке енсе, шаһардың да шырайы ашыла түседі. Одан кейін Ертіс өзенінің жағалауын абаттандыру ойда бар. Қалғаны саябақтар мен көшелерді көркейту сияқты жобалар, – дейді қала әкімі Ермак Сәлімов.
«Көп түкірсе – көл» дегендей, қаланы абаттандырып, көшелерді көркейту жұмыстарына еліміздің басқа да өңірлері үлес қосуға ниетті. Әзірге жалпы құны 9 жарым миллиард теңге болатын бірнеше жоба мақұлданған. Мәселен, Алматы қаласы мен Түркістан облысы жаңа мешіт маңайын абаттандыруға күш салмақ. Ал Алматы облысы Әуезов даңғылының бойынан жаяу жүргіншілер үшін «Абай жолы» деп аталатын жобаны жүзеге асырады.
Батыс Қазақстан облысы Әуезов алаңын қайта жаңғыртады. Бұл жұмыстарға мемлекет қазынасынан бөлек кәсіпкерлер қаржысын да тарту көзделген.